Bibɔtiibi Gbɔmpeepeekaaku 13

1 Ŋyunti ŋun Jeerooboowaam dá láá sí nsaraafan caŋin ki ŋáań saraayee ní Unimbɔti yāntì u-bɔnaatiliu ubɔ nyánní Juuda tiŋkin ki dɔ́miń. 2 U bāańee ní ki sòon̄ ti-Dindaan nyɔɔbundi nee ki tɔ́ nsaraafan pu yii: «Nsaraafan! Nsaraafan! Pīlifì tin ti-Dindaan bíi sòoǹee! Bi làá dāá màal̀ kibininjabiki kiba Daafiidi dicaŋkun. Bi làá dāá pɔ̄-kì diyindi yii Joosiyaasi. U làá dāá kpɔ̀ ŋgbantamu pu saraaŋaliibi bin tùutī a-pu talaalutuukaabee kí ŋá saraa a-pu. Bi làá dāá dū anikpab kí páań a-pu kí wà ŋŋmi^a.» 3 Ŋwiin gbanti mbaantee ní Unimbɔti bɔnaatiliuee gíti lī yii: «Kudaaŋŋu kun ti-Dindaan tīīyee sɔ̀. Nsaraafan làá wīī, ní ŋkpam min pá ŋu-puee ń lítí kitiŋ.»

4 Ŋyunti ŋun ubɔti gbìl̄ tin Unimbɔti bɔnaatiliuee sòon̄ ki tɔ́ Beeteel saraafaŋŋuee puee, ní u tāntì u-ŋal nsaraafan pu ki bí yii: «Cúúmaan-u!» Ama ní u-ŋal ŋun u tāntèe dūu fáká, waa ti ŋúń ki gúkúǹ-ŋu. 5 Dibòol pu niin niin ní nsaraafan wīī ní ŋkpam min pá ŋu-puee lítì kitiŋ kii Unimbɔti nín bàà yāntì u-bɔnaatiliu sòon̄ puee. 6 Niinee ní ubɔti bí Unimbɔti bɔnaatiliuee yii: «M gbàam̄-si, mèè ti-Dindaan a-Nimbɔtiu ú dū m-kpitii kí pɔ̄-mi kí cáaǹ m-ŋal kí tīī-mi.» Unimbɔti bɔnaatiliuee nìn mēē ti-Dindaan ní ubɔti ŋal fātìi ŋáŋkì ki gítì kii ŋu nín nìn bí puee.

7 Niinee ní ubɔti bí Unimbɔti bɔnaatiliuee yii: «Dāan̄ tí cù man dumpu á jī tijin, ḿ kpáàa pɔ̄-si tiba.» 8 Ama ní Unimbɔti bɔnaatiliuee bí ubɔti yii: «Báà a yaa yākatì a-gaajawanti mili ki dū dijandi ki tīī-mi, maa làá kɔ́ a-dumpuɔɔɔ, kaa làá jī tijinaaa, kaa làá nyɔ̀ nnyim mpaan nee pu. 9 Di sá yii ti-Dindaan nín tùkū-mi puee dee yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>» 10 U lī mimmee ní ki dī nsan ŋubɔ ki nín gítí. Waa nìn gíti dī nsan ŋun ní u dī ki dɔ́miń Beeteelee.

Unimbɔti bɔnaatiliu yīntiǹ Unimbɔti

11 Unimbɔti bɔnaatiliu ubɔ nìn kóò Beeteel tiŋkin ki púĺ. U-jipɔmbi nìn dɔ́miń ki máafì-u tin kɔkɔ ní Unimbɔti bɔnaatiliuee ŋá ŋwiin gbanti Beeteel tiŋkin nì tin u tùkū ubɔtee. 12 Niinee bi-baa bālifì-bi yii: «Nsan ŋulɔŋu ní u dī ki nín gítí?» Ní u-jipɔmbi dàkā-u nsan ŋun Unimbɔti bɔnaatiliu un nyánní Juuda tiŋkin ki dɔ́mińee dēe. 13 Ní u bí u-jipɔmbi yii: «Kpàl̄maan m-maŋki kí tīī-mi.» Ní u-jipɔmbee kpàl̄ kimaŋ ki tīī-u ní u máĺ ki kāl̀ ki-pu. 14 Niinee ní u nín jì Unimbɔti bɔnaatiliuee boon ní ki tin ká-u u kā teereebinti subu bubɔ taapu, ní u bālifì-u yii: «Sii di sá Unimbɔti bɔnaatiliu un nyánní Juuda tiŋkineeee?» Ní u kíí yii: «An sá man.» 15 Ní Unimbɔti bɔnaatiliu un kóò Beeteelee bí-u yii: «Dāan̄ tí cù man dumpu á ká tiba kí jī.» 16 Ní u kíí-u yii: «Maa ŋūǹ kí táá-si kí gítáaa, kaa tí máaǹ kí jī tijinaaa, kí nyɔ̀ tiba doo. 17 Di sá yii ti-Dindaan bí-mi yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>» 18 Ama ní Unimbɔti bɔnaatiliu utikpilee bí-u yii: «Ma mun sá Unimbɔti bɔnaatiliu kii siiyee ní. Ntuun ŋubɔ di dɔ́miń ki dū ti-Dindaan nyɔɔbundi nee ki tùkū-mi yii ḿ fàtīí gíiǹní-si á jī tijin kí nyɔ̀ nnyim.» Ama Unimbɔti bɔnaatiliu utikpilee nìn bíi mɔ́ntí-u ní. 19 Niinee Unimbɔti bɔnaatiliu un nyánní Juuda tiŋkinee táá-u ki nín gítí ki jíń tijin ki nyùn̄ nnyim.

Unimbɔti dáaĺ u-bɔnaatiliuee tafal

20 Ŋyunti ŋun bi-liitil kā ki jīǹee ní ti-Dindaan sòon̄ nì u-bɔnaatiliu un fātìi gíiǹní un béeyee. 21 Niinee ní úǹ dūu nāatì Unimbɔti bɔnaatiliu un nyánní Juuda tiŋkinee. U nìn bí-u yii: «A yīntiǹ ti-Dindaan. Aa tɔ́ ti-Dindaan a-Nimbɔtiu marau un u tīī-see. 22 A gítìń Beeteel ki jíń tijin ki nyùn̄ nnyim. Ama ti-Dindaan mun nìn bí-si yii a taa ŋá míǹ. A nín ŋá mimmee puee, a làá kpú ní baa làá síb́-si a-naanjab kaakulin.>»

23 Bi jíń ki nyùn̄ ki dóòyee ní Unimbɔti bɔnaatiliu utikpilee kpàl̄ u-maŋki ki tīī Unimbɔti bɔnaatiliu un u fātìi gíiǹnée 24 ní u nín cá. U cée ní gbikinti ubɔ kíntì-u nsanni ki kūū-u. U nìn dɔ̄ nsanni ní kimaŋ nì gbikintee yú ki kɔ́ĺ-u. 25 Bisanjitiliibi nìn ká dinikpilee dɔ̄ nsanni gbikinti yú ki kɔ́ĺ, ní bi dɔ́miń ki dū tibɔtee ki máafì kitiŋin, laakin Unimbɔti bɔnaatiliu utikpilee nìn kóòyee. 26 Unimbɔti bɔnaatiliu un nìn cūtì ki gíiǹní-uee nín gbìl̄ tin jítèe ní u bí yii: «Unimbɔti bɔnaatiliu un nyánní Juuda tiŋkinee dee, úǹ di yīntiǹ ti-Dindaan maraauee. Ti-Dindaan dū-u ki tīī gbikinti ní u cúú-u ki kūū, kii ti-Dindaan nín nìn tùkū-u puee.» 27 U lī mimmee ní ki bí u-jipɔmbi yii: «Kpàl̄maan-mi kimaŋ!»

Ŋyunti ŋun bi kpàl̄ kimaŋ ki dóòyee, 28 ní u nín cá ki bàn̄ ki ká dinikpilee dɔ̄ nsanni, kimaŋ nì gbikinti yú ki kɔ́ĺ. Gbikintee kaa nìn ŋmɔ́ dinikpileeyaaa, kaa ŋá kimaŋ mun tiba. 29 Niinee ní Unimbɔti bɔnaatiliu utikpilee yōoǹ dinikpilee ki dūu páaǹ kimaŋ pu ki gíiǹní Beeteel. U nìn súń u-kpool, ní ki síb́-u. 30 U nìn dū-u ki ŋá úǹ u-ba kaakulin, ní ki gāā nlan yii: «Áù, m-nabiki kpíì!» ki súń u-kpool.

31 U síb́-u míǹ ki dóòyee ní ki bí u-jipɔmbi yii: «M yaa láa kpíìyee, ní dāá síb́-mi dikaakul din poon ní m síb́ Unimbɔti bɔnaatiliu neeyee. Ní dāá dū m-kpabiŋ kí bíĺ kí kɔ́ĺ u-kpabiŋ. 32 Di sá yii ti-Dindaan bɔti tin u dī u-pu ki sòon̄ ki tɔ́ Beeteel saraafaŋŋu pu nì awaadiin ŋin bí ŋgbantamu pu Samaarii timmunee làá lafun ŋá míǹ.»

33 Nì míǹ kɔkɔee, Jeerooboowaam kaa nìn fá u-bimbikpitim. U nìn gbíntìi nìkì ki lèekī binib samaa kansikin ki kàantí-bi bisaraaŋaliibi ŋgbantamu pu. Ubɔ yaa nìn lèe, u nìn bàtī ŋkpam kí sìtī udaan yil pu ní kí kàan̄-u ú nīn sá usaraaŋal ŋgbantamu pu waadiiŋŋin. 34 An bimbim nìn yāntì Jeerooboowaam dicaŋku kɔkɔ nib kɔ́ ikpitin, an pu ní Unimbɔti nāaǹ kudicaŋu gbanti ki céetì-kù kitiŋ pu.