Bibɔtiibi Gbɔmpeepeekaaku 14

Jeerooboowaam jipɔɔn kúm bɔti

1 Ŋyunti gbanti mbaanti poonee, Jeerooboowaam jipɔɔn Abiiya nìn dōoǹ iween pu. 2 Niinee ní Jeerooboowaam bí u-nimpuu yii: «Yīkìm̄, kpántí a-ba binib ń taa béé yii a sá man Jeerooboowaam nimpuu, kí nīn cá Siiloo tiŋkin. Niin ní Unimbɔti bɔnaatiliu Abiiya kóò. Úǹ di nìn tùkū-mi yii m làá dāá jī Isirayeel tiŋki pu dibeel. 3 Á kpáaǹ kpɔnɔb saalaa nì tisiil dibool kí cùú ká-u. U làá tùkù-si kun làá bàń kibiki nee puee.» 4 Ní Jeerooboowaam nimpuu lafun ŋá míǹ. U nìn yíkì ki nín cá Abiiya dumpu. Too, tiputi puee, Abiiya kaa nìn gíti wāĺ. 5 Ama ti-Dindaan nìn bí Abiiya yii: «Jeerooboowaam nimpuu làá dāan̄ a-cee. U làá kpántí u-ba kí dāá bàlifì-si u-jipɔɔn un būǹee pu.» Ní Unimbɔti tùkū-u tin u máaǹ kí sòoǹee.

6 Ŋyunti ŋun Abiiya gbìl̄ u-taaŋi pu u bāań kipunyɔkɔpuee ní u bí yii: «Jeerooboowaam nimpuu, kɔ́nní! Ba pu ní a kpántì a-ba bí taa béé-si? Tin m cáá kí tùkù-see gba kaa sá tibɔmɔntiil. 7 Nín̄ gítí kí tùkù Jeerooboowaam yii ti-Dindaan Isirayeel Nimbɔtiu bí-u yii: <Man di lēē-si samaa kansikin ki dū-si ki kāaǹ m-nibul Isirayeel pu ubɔti. 8 M fōō Daafiidi dicaŋkun dibeel ki dūu tīī-si, ama aa dī m-tɔntɔnliu Daafiidi un nìn ŋúb́ m-marab, ki nóó-mi nì u-pɔbil kɔkɔ, ki ŋáań tin kítì m-nimbiinee tabɔbiliŋ. 9 A gíti ŋá ikpiti ki jítiǹ bin līntiǹ-see kɔkɔ. A mɔ́ɔ́ awaa ki gbítì m-ŋuul ní ki fātì a-boon ki tīī-mi. 10 An puee m làá cáań nnaabu kí tɔ̄ a-dicaŋku pu. M làá kpɔ̀ kí céetí a-dicaŋkun iyumbu nì bin tɔ́ bi-ba ki sá bininjab ki bí Isirayeel tiŋkinee. M làá nàan̄ a-naantiibi kii bi nín ŋàtī timool puee ní^a. 11 A-dicaŋkun unil un yaa kpíì kitiŋinee, iboo di làá ŋmɔ́-u. Un di yaa tí kpíì tisatinee, kaajiikub di làá jī u-nanti.> Ti-Dindaan nín sòon̄ puee dee.»

12 Ní Unimbɔti bɔnaatiliu nìkī ki lī yii: «Ama sii Jeerooboowaam nimpuu, á yīkì kí nīn kùǹ. A tin pée lì yii a làá kɔ́ kitiŋinee, a-bikee làá kpú. 13 Isirayeel yab kɔkɔ làá kàl̄ ki-kpool ní kí síb́-kì, di sá yii Jeerooboowaam dicaŋkunee, un baba bi làá pée ŋmā kí síb́ee dee. Jeerooboowaam dicaŋkunee, un baba bɔti fáatiǹ ti-Dindaan Isirayeel Nimbɔtiuee dee. 14 Ti-Dindaan làá kàan̄ ubɔtipɔɔn ubɔ Isirayeel tiŋki pu. Úǹ di làá kpɔ̀ kí céetí Jeerooboowaam dicaŋkun yab kɔkɔ. Díǹ gba ní an sá. M bí yii an sá kɔŋkɔnnee bɔti ní! 15 Ti-Dindaan làá dáaĺ Isirayeel yab tafal. Bi-wunti làá dāá nīn jìkì kii tikati tin sí nnyiminee nín jìkì puee ní. U làá dāá fùkù Isirayeel yab kí nyāntí kitimmɔntii kin u nìn dūu tīī bi-naanjabee poon ní kí cáá-bi kí yàl̄ Babiloon mɔɔl Eefiraati gbandi lapu pu yal, kun puee bi kpítì idɔcɔbikaa ki gbítì ti-Dindaan ŋuul. 16 Jeerooboowaam nín ŋá ikpiti ki yāntì Isirayeel yab mun ŋá ikpiti puee, u làá dū-bi kí fá.» 17 Niinee ní Jeerooboowaam nimpuu yíkì ki nín kùǹ ki tin bàn̄ Tiirsa tiŋkin. U nín pée dū u-taal ki tāā u-cindee ní u-bikee sīntì. 18 Isirayeel yab kɔkɔ nìn síb́-kì ní ki súń ki-kpool kii ti-Dindaan nín dī u-bɔnaatiliu Abiiya pu ki lī pu ki síiǹee.

19 Jeerooboowaam tuuŋŋi ŋin kíǹee, u nín jáń tijáti nì u nín jíń dibeel puee bɔti kɔkɔ ŋmàn̄ ki kā Isirayeel bɔtiibi tuuŋŋi gbɔnti poon. 20 Abin ŋin Jeerooboowaam dūu kāl̀ Isirayeel tiŋki pu dibeelee nyáń abin mmuŋku nì ali. U kpíì ki cūtìi ŋàl̄ u-baabee ní u-jipɔɔn Nadaab fōō u-yil ki kpántì ubɔti.

Juuda bɔtiu Rooboowaam beel bɔti

(Kpèè 2 Kroo 12.1-16)

21 Saloomɔn jipɔɔn Rooboowaam di nìn kā Juuda tiŋki pu dibeel. U nìn cáá abin imuŋku ili nì dibindi diba ní ki nín kpántì ubɔti. U nìn jíń Jeerusaleem, kitiŋ kin ti-Dindaan nìn lēē Isirayeel naakɔti kɔkɔ kansikin bí nīn jáaḿ-uee pu dibeel abin saalku nì ali ní. U-na nìn sá uamɔnnimpu ní bi yíì-u yii Naama. 22 Juuda yab nìn ŋá tin kaa kítì ti-Dindaan nimbiinee. Bi nìn ŋá ikpiti ki gbítì u-ŋuul ki jítiǹ bi-naanjab nín nìn ŋá puee. 23 Bi mun nìn máń awaadiin ŋgbantamu pu, ki cóoǹ ataŋkpee nì idɔ in pu bi cɔ̀b̀ ticɔbikaalee ŋgbantamu pu nì isuboon kɔkɔ taapu^b. 24 Bininjab nì binimpoobi nìn bí niin gba ki ŋáań alaakpaatuun ki jáaḿ awaa. Atimbun ŋin ti-Dindaan nìn jìn̄ ki fōō bi-timmu ki tīī Isirayeel yabee nín nìn ŋáań ntimbiil tuuŋŋi ŋin kɔkɔee, míǹ deedee ní bi mun nìn ŋáań^c.

25 Rooboowaam nín kāl̀ dibeel dibiŋŋmooŋmootiil poonee ní Eejipiti bɔtiu Siisaaki dɔ́miń ki jáń nì Jeerusaleem tiŋki. 26 U nìn yōoǹ tigaajawan tin bí ti-Dindaan Diikunee nì tin bí dibeecindinee. U nìn pée yōoǹ kɔkɔ ní. U nìn yōoǹ ki kpáaǹ agbampɔɔ ŋin Saloomɔn nìn dū sindaariya ki mɔ́ɔ́yee kɔkɔ^d. 27 Niinee ní ubɔti Rooboowaam dū tasa kúti ki mɔ́ɔ́ agbampɔɔ ki téeǹ ŋin bi yōoǹee pu, ní ki dū-ŋi ki ŋá bijanjaliibi bin cí ubɔti naakooku punyɔmmuee kpiliu ŋaan ú nīn kpèé. 28 Ubɔti yaa nìn pée yíkì ki kóò kunimbɔtidiinee, bijanjaliibi nìn yòontí agbampɔɔ gbanti ní ki līī ní kí fàtīí gíiǹní-ŋi.

29 Atuun ŋin kɔkɔ Rooboowaam nìn túńee ŋmàn̄ ki kā Juuda bɔtiibi tuuŋŋi gbɔŋkun. 30 Kujaau nìn pée bí Rooboowaam nì Jeerooboowaam kansikin ní kaa gbèentí. 31 Rooboowaam kpíì ki cūtìi ŋàl̄ u-baabi ní bi síb́-u u-baabi kaakulin Daafiidi Tiŋkin. U-na nìn sá uamɔnnimpu ní bi yíì-u yii Naama. Rooboowaam jipɔɔn Abiyaam di fōō u-yil ki kpántì ubɔti.