Bibɔtiibi Gbɔmpeepeekaaku 15

Juuda bɔtiu Abiyaam bɔti

(Kpèè 2 Kroo 13.1-3,22-23)

1 Neebaati jipɔɔn Jeerooboowaam nín kāl̀ Isirayeel tiŋki pu dibeel abin saalku nì ata poonee ní Abiyaam kpántì Juuda tiŋki bɔtiu. 2 U nìn jíń dibeel Jeerusaleem abin ata ní. U-na nìn sá Abisaloom bisal ní bi yíì-u yii Maaka. 3 U nìn pée ŋá ikpitibaanti in u-baa nìn ŋée ní. U-pɔbil kaa nìn bí diba nì ti-Dindaan u-Nimbɔtiu kii u-naanja Daafiidee. 4 Daafiidi puee, ti-Dindaan u-Nimbɔtiu nìn tīī-u jipɔɔn un làá nīn sá ubɔti u-kpátam boonee. Mimmee dibeel kaa nyēē u-dicaŋkun ní Jeerusaleem ń nīn gbíntìi bí ki sá ubɔti tiŋki. 5 Di sá yii Daafiidi nìn ŋá tin fáatiǹ ti-Dindaanee, ní u-maŋfal wiiŋyi kɔkɔ poonee, waa nìn fātì u-boon ki tīī tin u nìn kpáafì-uee, see ueetija Urii bɔtee baba^a.

6 Rooboowaam maŋfal wiiŋyi kɔkɔ poonee, kujaau nìn pée bí u nì Jeerooboowaam kansikin ní.

7 Abiyaam tuuŋŋi ŋin kɔkɔ u túńee ŋmàn̄ ki kā Juuda bɔtiibi tuuŋŋi gbɔntin. Kujaau nìn pée tí bí u nì Jeerooboowaam kansikin ní^b. 8 Abiyaam kpíì ki cūtìi ŋàl̄ u-baabee ní bi síb́-u Daafiidi Tiŋkin. U-jipɔɔn Asaa di fōō u-yil ki kpántì ubɔti.

Juuda bɔtiu Asaa bɔti

(Kpèè 2 Kroo 14.1-2, 15.16-19, 16.1-6,11-14)

9 Jeerooboowaam nín kāl̀ Isirayeel tiŋki pu dibeel abin mmuŋku poonee, ní Asaa kpántì Juuda bɔtiu. 10 U nìn jíń dibeel abin imuŋku ili nì diba ní Jeerusaleem tiŋkin. U-na di sá Abisaloom bisal Maaka. 11 Asaa nìn ŋá tin fáatiǹ ti-Dindaanee, kii u-naanja Daafiidee. 12 U nìn jìn̄ bininjab nì binimpoobi bin nìn bí awaadiinni ki ŋáań alaakpaatuunee, ní ki kúntì awaa ŋin u-naanjab nìn mɔ́ɔ́yee^c. 13 U nìn lēē u-na Maaka tinimpubɔtiilin, kun puee u nìn kpítì diwaal ki nántiǹ ntimbiil waal Aseera. Asaa nìn gāā diwaalee ki lúkú ní ki cáá-dì ki cūnnì Seedrɔn buŋgbandi ki tūū ŋŋmi. 14 Ama waa nìn kúntì laakin bi tòotī awaa ŋgbantamu puee. Nì míǹ kɔkɔee, Asaa maŋfal wiiŋyi kɔkɔ poonee, u-pɔbil nìn bí diba nì ti-Dindaan ní. 15 U nìn cáań ti-Dindaan Diikun tin kɔkɔ ní úǹ u-ba nì u-baa nìn dūu sú Unimbɔtee, an dàkà yii animbil nì sindaariya nì asambil.

16 Kujaau nìn pée bí Asaa nì Isirayeel bɔtiu Bayeesa kansikin ní. 17 Isirayeel bɔtiu Bayeesa dɔ́miń dalba kí já nì Juuda tiŋki, ní ki máń digundi ki tú Raama timbiliiki kí pìin̄ Juuda bɔtiu Asaa nsan. 18 Niinee ní Asaa kɔ́tì animbil nì sindaariya un kɔkɔ nìn bí kunimbɔtidii nimbikpaafidiikun nì ubɔti nimbikpaafidiikunee ki tīī u-tɔntɔnliibi bí cáá cùnnì Damaasi kí tīī Siirii bɔtiu Been-Adaadi, Tabirimɔn jipɔɔn nì Eesiyɔn naantiiu. U nìn bí bí tùkù-u yii: 19 «Yàntī mpèé ń nīn bí man nì sii kansikin kii an nín nìn bí man baa nì sii baa kansikin puee. Kpèè animbil nì sindaariya ní m dūu tú bí cáań kí tīī-si nee. Míǹ puee cùú kpìtī mpèé ŋun bí si nì Isirayeel bɔtiu Bayeesa kansikinee ú taa ti dāan̄ kí já nì mi.» 20 Been-Adaadi nìn gbìl̄ ki tīī nì ubɔti Asaa ní ki dū u-janjakpilib ki tú bí cùú já nì Isirayeel timmu. Bi nìn jáń ki fōō Iyɔn nì Daani nì Abeel-Beeti-Maaka timmu nì Kiineereeti tiŋki kɔkɔ nì Neefitalii timmu kɔkɔ. 21 Bayeesa nín gbìl̄ tibɔti gbantee ní u gbēeǹ kaa ti bíi māā Raama timbiliiki gundi ní ki nín gítí ki cūtìi kāl̀ Tiirsa. 22 Niinee ní ubɔti Asaa yíiń Juuda yab kɔkɔ kaa gāntì báà ubɔ. U nìn yāntì bi cáań ataŋkpee nì idɔ in Bayeesa nìn cáa bíi māā Raama gundee. Ubɔti Asaa nìn yāntì bi dū ataŋkpee nì idɔ gbanti ki máń digundi ki tú Beenjameen tiŋki Geeba nì Miisipa timmu.

23 Atuun ŋin kɔkɔ ní Asaa nìn túńee nì u-pɔ́ɔǹtam nì ntimu mun u máń agun ki túee kɔkɔ ŋmàn̄ ki kā Juuda bɔtiibi gbɔŋkun. Ama u-puti poonee, u nìn búŋkì ní u-taaŋi dūu fàl̄. 24 U kpíì ki cūtìi ŋàl̄ u-baabee ní bi síb́-u ki kɔ́ĺ u-baabi, u-naanja Daafiidi Tiŋkin. U-jipɔɔn Joosafaati di fōō u-yil ki kpántì ubɔti.

Isirayeel bɔtiu Nadaab bɔti

25 Juuda bɔtiu Asaa nín kāl̀ dibeel, dibinliliitiil poonee, ní Jeerooboowaam jipɔɔn Nadaab kpántì Isirayeel bɔtiu. U nìn jíń dibeel Isirayeel tiŋki pu abin ali ní. 26 U nìn ŋá tin kaa fáatiǹ ti-Dindaanee. U nìn dī u-baa saŋŋu ní ki nóó u-baa nín nìn yāntì Isirayeel yab kɔ́ ikpitin puee tabɔbiliŋ. 27 Niinee ní Ayiiya jipɔɔn Bayeesa un sá Isakaar naakookunee bɔ́ntì kí já nì u. Ŋyunti ŋun Nadaab nì Isirayeel janjaliibi cūtì kí já nì Fiiliistii yab tiŋki Giibeetɔn ki māntìi tú-kèe ní Bayeesa kūū-u. 28 Juuda bɔtiu Asaa nín kpántì ubɔti dibintataatiil poonee ní Bayeesa kūū Nadaab ní ki fōō u-yil ki kpántì ubɔti. 29 U nín pée kpántì ubɔtee ní u kūū Jeerooboowaam dicaŋkun yab kɔkɔ kaa kíǹ báà unibaanti. U nìn kūū ki céetì bi-kɔkɔ ki nóó nì ti-Dindaan nín nìn dī u-bɔnaatiliu usiilooja Ayiiya pu ki sòon̄ puee ní. 30 An nìn jítì míǹ kun puee Jeerooboowaam nìn ŋá ikpiti ní ki yāntì Isirayeel nibul mun ŋá ikpiti, ki gbítì ti-Dindaan Isirayeel Nimbɔtiu ŋuul.

31 Nadaab tuuŋŋi ŋin u túńee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

32 Asaa maŋfal wiiŋyi kɔkɔ poonee, kujaau nìn pée bí u nì Bayeesa kansikin ní.

Isirayeel bɔtiu Bayeesa bɔti

33 Asaa nín kpántì Juuda bɔtiu dibintataatiil poonee ní Ayiiya jipɔɔn Bayeesa kpántì ubɔti. U nìn kóò Tiirsa ní ki jíń dibeel abin mmuŋku nì anaa. 34 U nìn ŋá tin kaa fáatiǹ ti-Dindaanee. U nìn dī Jeerooboowaam saŋŋu ní ki nóó u nín nìn yāntì Isirayeel yab kɔ́ ikpitin puee tabɔbiliŋ.