Bibɔtiibi Gbɔmpeepeekaaku 16

1 Ti-Dindaan nìn sòon̄ nì Ananii jipɔɔn Jeewuu, u-bɔnaatiliu ú tùkù Bayeesa yii: 2 «Aa nìn bí tiban, ama ní m lēē-si ki dū-si ki kāaǹ m-nibul Isirayeel pu ubɔti. Díǹ pu nee, a nóó Jeerooboowaam tabɔbiliŋ, ki yāntì Isirayeel yab ŋá ikpiti ki gbítì m-ŋuul. 3 An puee m làá kúntí sii nì a-dicaŋku, m làá ŋá-ni kii m nín ŋá Neebaati jipɔɔn Jeerooboowaam dicaŋku puee ní. 4 A-dicaŋkun unil un yaa kpíì kitiŋinee, iboo di làá ŋmɔ́-u, ní un yaa kpíì tisatinee, inoon ń jī u-nanti.»

5 Bayeesa tuuŋŋi ŋin kɔkɔ u túńee nì u-pɔ́ɔǹtam ŋmàn̄ ki kā Isirayeel bɔtiibi tuuŋŋi gbɔŋkun. 6 U kpíì ki cūtìi ŋàl̄ u-baabee ní bi síb́-u Tiirsa tiŋkin. U-jipɔɔn Eela di fōō u-yil ki kpántì ubɔti.

7 Ti-Dindaan nìn dī u-bɔnaatiliu Ananii jipɔɔn Jeewuu pu ní ki sòon̄ nì Bayeesa nì u-dicaŋku pu. Di sá yii mpeepeekaamee u nìn yīntiǹ ti-Dindaan. U nìn gbítì ti-Dindaan ŋuul kun puee u nìn ŋá ikpiti kii ubɔti Jeerooboowaam nín nìn ŋá puee ní. Nliliitiimee, u nìn kūū ki céetì Jeerooboowaam dicaŋkun yab kɔkɔ.

Isirayeel bɔtiu Eela bɔti

8 Juuda bɔtiu Asaa nín kāl̀ dibeel abin mmuŋku nì aluu poonee ní Bayeesa jipɔɔn Eela kpántì Isirayeel bɔtiu. U nìn kóò Tiirsa ní ki jíń dibeel abin ali. 9 Ama u-janjakpiliu Simrii, ujanjakpil un kpèé janjatɔrɔkubee bɔ́ntì ki jáń nì u. Ubɔti nìn bí Tiirsa tiŋkin un kpèé kubɔtinaakoouee dumpu ki nyù ndaam ki gbéè. 10 Niin ní Simrii kɔ́ ki kūū-u. Tíǹ jítì ŋyunti ŋun ní Juuda bɔtiu Asaa jíń dibeel abin mmuŋku nì aluli poonee ní. Simrii nìn fōō Eela yil ki kpántì ubɔti. 11 U kpántì ubɔti ki kāl̀ dibɔtijal puee ní ki kūū Bayeesa dicaŋkun yab kɔkɔ, waa nìn kíǹ-u uninjaaa, kaa kíǹ-u kinabikaaa, kaa kíǹ-u bɔɔ mun. 12 Simrii nìn kūū ki céetì Bayeesa dicaŋkun yab kɔkɔ ki nóó nì ti-Dindaan nín nìn dī u-bɔnaatiliu Jeewuu pu ki sòon̄ puee ní. 13 An nìn jítì míǹ kun puee Bayeesa nì u-jipɔɔn nìn ŋá ikpiti ní ki yāntì Isirayeel yab mun ŋá ikpiti, ki dū bi-waaŋi ki gbítì ti-Dindaan, Isirayeel Nimbɔtiu ŋuul.

14 Eela tuuŋŋi ŋin kíǹee, nì tin u ŋée kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

Isirayeel bɔtiu Simrii bɔti

15 Juuda bɔtiu Asaa nín jíń dibeel abin mmuŋku nì aluli poonee, ní Simrii kpántì Isirayeel bɔtiu. U nìn kóò Tiirsa ní ki jíń dibeel iwiin iluli. Isirayeel janjaliibi nìn cūtì ŋyunti gbanti kí já nì Fiiliistii yab tiŋki Giibeetɔn. 16 Bijanjaliibi bin nìn bíń kujaauee nín gbìl̄ yii Simrii bɔ́ntì ki jáń nì ubɔti ki kpáàa kūū-uee, ní bi ŋá kinyɔɔbaantii dijanjanaapaal pu niin ki lēē ujanjakpil Oomirii ú kpántí Isirayeel bɔtiu. 17 Niinee Oomirii nì u-janjakitil yíkìń Giibeetɔn ki dɔ́miń ki māntìi tú Tiirsa tiŋki. 18 Simrii nín ká yii bi ŋman fōō kitiŋ ki dóòyee ní u nín kóò ubɔti dibiki kiban. U nìn gāā ŋŋmi ki tūū ní an wùn̄ ki kūū-u. 19 An nìn jítì míǹ kun puee Simrii nìn ŋá tin kaa fáatiǹ ti-Dindaanee. U nìn ŋá ikpiti, ki nóó Jeerooboowaam tabɔbiliŋ ki yāntì Isirayeel yab kɔ́ ikpitin.

20 Simrii tuuŋŋi ŋin kíǹee nì u nín bɔ́ntì pu ki kūū ubɔtee ŋmàn̄ ki kā Isirayeel bɔtiibi tuuŋŋi gbɔŋkun.

21 Simrii kúm boonee ní Isirayeel yab cúu yākatì mili: dijandi diba nìn là Giinaati jipɔɔn ń nīn sá ubɔti ní dijandi din kíǹee lēē Oomirii. 22 An dāa kúntèe, bin nìn dī Oomiriiyee di jáń ki pɔ́ɔkiǹ bin nìn pá Giinaati jipɔɔn Tiibinii boonee. Tiibinii kpíìyee ní Oomirii kpántì ubɔti.

Isirayeel bɔtiu Oomirii bɔti

23 Juuda bɔtiu Asaa nín jíń dibeel abin mmuŋku nì saalaa nì diba poonee, ní Oomirii kpántì Isirayeel bɔtiu. U nìn jíń dibeel abin saalaa nì ali ní. U nìn dáá kóò Tiirsa tiŋkin ní ki jíń dibeel abin aluu. 24 Míǹ boonee ní u cūtìi ká Seemeer ní ki dá u-cee Samaarii gbantaŋki animbil kúti jitɔmbi kutukub biluu. U nìn máń digundi ki tú kigbantaŋee ní ki pú kitiŋ kin u náańee diyindi yii Samaarii ki nóó nì uwandaan yindi Seemeer. 25 Oomirii nìn ŋá tin kaa fáatiǹ ti-Dindaanee. U nìn gíti ŋá tin jítiǹ bibɔtiibi bin līntiǹ-uee. 26 U nìn pée dī Neebaati jipɔɔn Jeerooboowaam un nìn yāntì Isirayeel yab ŋá ikpiti ki dū iwaatooti ki gbítì ti-Dindaan ŋuulee tabɔbiliŋ ní.

27 Oomirii tuuŋŋi ŋin kíǹ u túńee nì u-pɔ́ɔǹtam kɔkɔ ŋmàn̄ ki kā Isirayeel bɔtiibi tuuŋŋi gbɔŋkun. 28 U kpíì ki cūtìi ŋàl̄ u-baabee ní bi síb́-u Samaarii tiŋkin. U-jipɔɔn Akaab di fōō u-yil ki kpántì ubɔti.

Isirayeel bɔtiu Akaab bɔti

29 Juuda bɔtiu Asaa nín jíń dibeel abin ali kpá imuŋku ili poonee ní Oomirii jipɔɔn Akaab kpántì Isirayeel bɔtiu. 30 Ama Oomirii jipɔɔn Akaab nìn ŋá tin kaa fáatiǹ ti-Dindaanee ki jítiǹ bibɔtiibi bin kɔkɔ līntiǹ-uee. 31 U nín nìn nóó Neebaati jipɔɔn Jeerooboowaam kpitii tabɔbiliŋee kaa bàn̄-uee, ní u gíti cūtìi cáá Siidɔn yab bɔtiu Eetibaal bisal Jeesabeel. U nìn cūtìi bíi gbàantí diwaal Baal nimbiin ki jáaḿ-dì^a. 32 Kudii kun u nìn máń Samaarii tiŋkinee poonee, u nìn máń nsaraafan ki tīī diwaal. 33 Akaab nìn kpítì ndɔ ŋun pu bi cɔ̀b̀ ticɔbikaalee ki cóoǹ. U nìn gíti ŋá tin jítiǹ mimmee ki gbítì ti-Dindaan Isirayeel Nimbɔtiu ŋuul ki jítiǹ Isirayeel bɔtiibi bin kɔkɔ nìn līntiǹ-uee.

34 U-beel yuntiŋu ní ubeeteelja Yiil máń digundi ki tú Jeeriikoo tiŋki. Ama kii ti-Dindaan nín nìn dī Nuuni jipɔɔn Joosuwa pu ki sòon̄ puee, míǹ ní an nìn jítì. Ŋyunti ŋun bi bíi gbì kí bíĺ kitiŋee nyeelee ní u-jipɔŋkpiliu Abiiram kpíì, ní ŋyunti ŋun bi bíi cōontí kitiŋee punuubee ní u-jipɔnjoolkaau Seeguub mun kpíì^b.