Bibɔtiibi Gbɔmpeepeekaaku 17

Eelii nāatì yii ŋweel làá nyā

1 Unimbɔti bɔnaatiliu ubɔ nìn bí bi yíì-u yii Eelii. U nìn sá Tiisbee timbiliikin, Galaadi tiŋkin. U nìn bí ubɔti yii: «Isirayeel Nimbɔtiu, ti-Dindaan un bí dimaŋfalin m sá u-tɔntɔnliu nee yindi puee, dimalindi àá utaa gíti kpá kí jōō kitiŋ pu abin ŋin làá páanní nee poon, see m yaa láa bí yii dimalindi àá utaa ń nì^a.»

Eelii bí Keeriiti bùmbiki gbandi

2 Niinee ní ti-Dindaan bí Eelii yii: 3 «Yīkì doo, nín̄ cá ŋwìiń nyalaŋki pú kí báĺ Keeriiti bùmbiki kin bí Jɔɔdan ŋwìiń nyalaŋki púee caŋin. 4 Mimmee a ŋūǹ kí nīn kāntí nnyim mbunee poon ki nyù. M làá tīī agaliŋgaa mara bí nīn cāabìń-si tijin niin.» 5 Niinee ní Eelii nín cá ki ŋá kii ti-Dindaan nín bí yii ú ŋá puee. U nìn cūtì ki kíǹ ki kóò Keeriiti bùmbiki caŋin, Jɔɔdan buŋŋu ŋwìiń nyalaŋki pú. 6 Agaliŋgaa nìn cāabìń-u tijin nì tinan kutaafaau nì kujoou, ní u nyù kibùmbikee nyim.

Eelii cūtì ki kíǹ ki bí Sareepita ukpiipu ubɔ cee

7 Ama an dāa bàn̄ ŋyunti ŋubɔee, kibùmbikee nyim fóotì, kun puee utaa kaa nìn gíti nìn̄ kitiŋee pu. 8 Niinee ti-Dindaan bí Eelii yii: 9 «Yīkìm̄, nín̄ cá Sareepita tiŋki kin bí Siidɔn tiŋgbaŋkinee kí nīn kíǹ ki kóò niin. Di sá yii m tīī unimpukpiipu ubɔ niin mara ú kpíiǹ-si^b.»

10 Ní Eelii kíĺ nsan ki nín cá Sareepita. U bàn̄ kí kɔ́ kitiŋee ní ki ká unimpukpiipu ubɔ bíi píikí idɔ. U nìn yíiń-u ki bí-u yii: «M gbàam̄-si ní, cùú jōoń diboolin nnyim fiii kí pɔ̄-mi ḿ nyɔ̀.» 11 Ŋyunti ŋun unimpuee nín cá kí jōō nnyim kí cáań-uee ní u fātìi yíiń-u ki bí-u yii: «M gbàam̄-si, á kpáàa cáań-mi tijin mun.» 12 Ní unimpuee kíí-u yii: «Nì ti-Dindaan a-Nimbɔtiu un bí dimaŋfalin nee puee, m pūtì-si yii maa ŋá tijin tiba ki síiǹ. Kun pée kíǹ-mee di sá ŋyim diŋaaŋkul an kā kulɔŋŋun nì ŋkpam fiii mun kā kibaŋŋin. M nín dɔ́miń ki tōō idɔ nee, m làá kɔ́ ní kí dū tin pée kíǹee kí ŋá tijin man nì m-jipɔɔn tí jī kí nīn kíǹ ki kā ki cí ŋkúm.» 13 Ní Eelii bí-u yii: «Taa fàŋkì! Nín̄ cá kí ŋá kii a nín lī puee. Ama dū tin a cááyee kí ŋá tijin fiii kí cáań man kí wàatī. Boonee á ŋá kí tīī sii nì a-jipɔɔn mun. 14 Di sá yii ti-Dindaan Isirayeel Nimbɔtiu nín sòon̄ puee sèé: <Ŋyim kpá kí lóó kulɔŋŋuee poon, ní ŋkpam mun kpá kí fóotí kibaŋŋee ni kí cáá sāā ŋwiin ŋun ní ti-Dindaan làá yàntī utaa ń nèe.»

15 Ní unimpuee nín kóò ki ŋá kii Eelii nín bí yii ú ŋá puee. An ŋá mimmee ní úǹ nì Eelii nì u-jipɔɔn ká ki jíń iwiin kupaau. 16 Ŋyim kaa nìn dóò kulɔŋŋun ní ŋkpam mun kaa fóotì kibaŋŋin, kii ti-Dindaan nín nìn dī Eelii pu ki sòon̄ puee.

Eelii fīkitì unimpukpiipuee jipɔɔn

17 Míǹ boon an kaa yúntì ní unimpukpiipu un fōō Unimbɔti bɔnaatiliu Eelii u-dumpuee jipɔɔn búŋkì. U-weeŋyee nìn pɔ́ɔkì áli u dāa lántì dimaŋfal. 18 Ní unimpuee bí Eelii yii: «Unimbɔti niliu, ba pu ní a ŋá-mi míǹ? A dɔ́miń kí téetí Unimbɔti ikpiti in ní m ŋée kí kpɔ̀ m-jipɔɔn níii?» 19 Ní Eelii kíí-u yii: «Cáań-mi a-jipɔɔn!»

U fōō unaacimpɔɔnee unimpuee ŋaan ní ki cáá-u ki kɔ́ǹ kudii kun poon u dɔ̀ee aditɔntɔkɔ yilpu, ní ki dū-u ki bíl̀ u-lambaŋki pu. 20 Míǹ boonee ní u mēē Unimbɔti mpɔn ki lī yii: «Ti-Dindaan m-Nimbɔtiu, mimmee a là kí kɔ́ǹ unimpukpiipu un pu m kóò nee dinimbinaamandin ki kūū u-jipɔɔnaaa?»

21 Eelii lī mimmee ní ki dōoǹ kibikee pu ŋfunyɔm mita, ní ki mēē ti-Dindaan yii: «Ti-Dindaan m-Nimbɔtiu, gíiǹ kibiki nee fooku kí ŋá ki-ni.» 22 Ti-Dindaan nìn fōō Eelii wimmeem ní ki gíiǹ kibikee fooku ki tīī-kì, ní kì kíĺ ki bíi fòotī. 23 Eelii yōoǹ kibikee ki nyáń u-diikun ki kpákatì, ní ki dū-kì ki tīī ki-na ki lī yii: «Kpèè, a-jipɔɔn bí dimaŋfalin.» 24 Ní unimpuee bí Eelii yii: «Tiŋman, m béè kɔŋkɔnnee yii a lafun sá Unimbɔti niliu, ní tin ti-Dindaan dì a-pu ki sòoǹee mun sá mbaamɔn.»