Bibɔtiibi Gbɔmpeepeekaaku 18

Eelii nì diwaal Baal bɔnaatiliibi

1 Ŋyunti ŋubɔ boon, ŋkùm biŋŋi ditataatiil poonee ní ti-Dindaan bí Eelii yii: «Nín̄ cá kí dū a-ba kí dàkà ubɔti Akaab, di sá yii m làá yàntī utaa ń nì kitiŋ pu.» 2 Ní Eelii nín cá kí dū u-ba kí dàkā Akaab.

Samaarii tiŋkinee, ŋkùm nìn pɔ̄ɔ̄ ŋkpitim pu. 3 Akaab nìn yíiń Oobadiya, bin kpèé dibeecindee kpiliu. - Oobadiya nìn fàŋkí ti-Dindaan tikpil. 4 Míǹ puee ŋyunti ŋun Jeesabeel nìn yāntì bi kūū ti-Dindaan bɔnaatiliibee, Oobadiya nìn fīī bi-kansikin dilaataal ní. U nìn kpáfì-bi akiti ali pu ní dikitil kamaa cáá binib imuŋku ili nì saalaa ní ki nìn dū-bi ki bál̀ itaŋkpalɔkɔ ili poon. U nìn tìì-bi tijin bi jīǹ nì nnyim bi nyù. - 5 Niinee ní Akaab bí Oobadiya yii: «Yàntī tí cù kí kpèè inyimbul nì ibun kɔkɔn ti yaa kāntí timool kí cáań kí tīī itaamu nì imamboon í taa kpú. An yaa kaa sá míǹ, ti làá dāá kpɔ̀ ti-waŋkuti.» 6 Niinee ní bi sòon̄ ki bɔ́ntì báà ŋma nín làá túĺ laakiŋyee. Akaab nìn túĺ laaba pú ní Oobadiya mun dūu túĺ laaba pú.

7 Oobadiya tàkā u-saŋŋu ki cée, u bí yii ú kpèèyee, Eelii dee. Oobadiya béè-uee ní ki tātìi dōoǹ u-nimbiin dicincibil ní ki bí yii: «Sii ní an lafun sáa, m-dindaan Eelii?» 8 Ní Eelii kíí-u yii: «Man dee! Cùú tùkù a-kpiliu Akaab yii: <Eelii dòoń!>» 9 Ní Oobadiya bí yii: «Tikpitil tilati ní m ŋá ní a là kí dū man a-tɔntɔnliu kí ŋá Akaab ŋaan ú kpɔ̀-mi ní? 10 M pūtì ti-Dindaan a-Nimbɔtiu un bí dimaŋfalin nee yii ditimbundi àá dibeel diba kaa kíǹ m-kpiliu Akaab kaa tú binib bí nyàab̀-si. Ditimbundi àá dibeel diba nib yaa bí yii baa ká-see, see ubɔti ń gíti yàntī bí pùtī yii baa lafun ká-si. 11 Ní kɔŋkɔnnee, sii bíi lì yii ḿ cùú tùkù m-kpiliu yii: <Eelii dòońaa!> 12 Ama m yíkí a-cee doo kí cùú tùkù Akaab yii a dòońee ní ti-Dindaan Fam ń yòon̄-si kí cáá búntí laaba, ní u nín dɔ́miń doo kaa ká-see, ní ú kpɔ̀-mi. Man a-tɔntɔnliu mun, doooo m-naacimpɔntin ní m fàŋkí ti-Dindaan. 13 M-dindaan, baa kalin máafì-si tin m ŋá ŋyunti ŋun ní Jeesabeel kūū ti-Dindaan bɔnaatiliibeeee. M nìn dū ti-Dindaan bɔnaatiliibi dilaataal ní ki bál̀. M nìn yākatì-bi akiti ali pu ní dikitil kamaa cáá binib imuŋku ili nì saalaa ní m dū-bi ki bál̀ itaŋkpalɔkɔ ili poon, ki tìì-bi tijin nì nnyim. 14 Ní kɔŋkɔnnee sii ń tùkù man yii: <Cùú tùkù a-kpiliu yii Eelii dòońaa!> U làá kpɔ̀-mi ní!» 15 Ama ní Eelii bí-u yii: «M pūtì ti-Dindaan Mpɔŋkɔdaan un tundin m bí nee yii díǹ nee gba, m làá cù kí sīĺ Akaab nimbiin.»

Eelii dū u-ba ki dàkā Akaab

16 Niinee ní Oobadiya nín cá Akaab cee ki dūu máafì-u, ní Akaab nín cá kí tūŋkì Eelii. 17 Ŋyunti ŋun Akaab ká Eeliiyee ní u bí-u yii: «Sii un cáań agìń ki tɔ́ Isirayeel yab puee, sii deeee?» 18 Ní Eelii kíí-u yii: «An kaa sá man di cáań digìńdi ki tɔ́ Isirayeel yab pu, ama an sá sii nì a-baa dicaŋkun yab, kun puee ni fātì ni-boon ki tīī ti-Dindaan marab ki cūtìi nóó diwaal Baal. 19 Ama kɔŋkɔnnee, tɔ̄ binib bí yíiń Isirayeel yab kɔkɔ nì diwaal Baal bɔnaatiliibi alaataa anaa nì imuŋku ili nì saalaayee, nì diwaal Aseera bɔnaatiliibi alaataa anaa bin boon Jeesabeel pée, bí kóoǹ kí kpāfì Kaarmeel jool pu.»

20 Niinee ní Akaab tú bi yíiń Isirayeel yab kɔkɔ nì bibɔnaatiliibee, ní bi kóoǹ ki kpáfì Kaarmeel jool pu. 21 Eelii nìn sútì ki pìl̄ samaa kɔkɔ ní ki bí-bi yii: «Kí cáá sāā ŋyunti ŋulɔŋu ní ni làá lēē kí nóó nlandɔkɔbaanti ní? Ti-Dindaan di yaa sá Unimbɔti, nín̄ nóómaan-u. Diwaal Baal di yaa tí sá Unimbɔtee, ní nóó-dì!» Ama samaa kansikinee, báà ubɔ kaa nìn wāaǹ kinyɔkɔ ní kaa nín kíí tiba.

22 Niinee ní Eelii bí samaa yii: «Man baba di kíǹ ki sá ti-Dindaan bɔnaatiliu, ní diwaal Baal bɔnaatiliibi sá binib alaataa anaa nì imuŋku ili nì saalaa. 23 Ní tīī-ti inajaa ili: diwaal Baal bɔnaatiliibi ń lēē ubɔ, kí càkà kí dūú páań idɔ pu kí ŋá saraa, ama bí taa kpāā ŋŋmi. Ma mun làá yòon̄ unaja un kíǹee kí bɔ́ntí kí páań idɔ pu, ma mun kaa làá kpāā ŋŋmi. 24 Boonee bí mèè bi-waal ní ma mun ḿ mèè ti-Dindaan. Un Nimbɔtiu yaa kíí ki yāntì ŋŋmi fōō saraayee di lafun sá Unimbɔti.» Ní samaa kɔkɔ kíí yii: «Ti kíí míǹ.» 25 Niinee ní Eelii bí diwaal Baal bɔnaatiliibi yii: «Lēēmaan unaja ubɔ kí bɔ́ntí-u, di sá yii nimbi di wīikí. Ní mèè ni-waal, ama ní taa kpāā ŋŋmi.»

26 Ní bi lēē inajaa in bi cáańee ubɔ ki bɔ́ntì saraa, ní ki kúuǹ ki yíiń Baal ki yōoǹ kutaafaau ki cáa sāā kuwiŋkuluu ki lì yii: «Baal, kíí-ti!» Ama baa nìn gbìl̄ nneen ŋubɔ puɔɔɔ, ubɔ mun kaa nìn kíiń-bi. Bi nìn ŋōō ki màntī nsaraafan ŋun bi nìn máńee. 27 Kuwiŋkuluuee ní Eelii kíĺ ki bíi bèel̄-bi ki lì yii: «Nín̄ kūuntímaan mpɔn! U sá unimbɔti ní! An yaa yíì u bíi dàkafī tiba pu àá waa bí, àá u cūtì nsan. An yaa yíì u dɔ̄ ki gèeǹ ní an sá ní fìntī-u.» 28 Niinee ní bi bíi kūuntí mpɔn, kii bi-koobiliŋ poon nín sá puee. Bi nìn cáá njimu nì ŋkpamu ki gífí bi-ba áli fatiku dāa kíǹ ki pùub̀ bi-wunti pu. 29 Kuwiŋkuluu gbáń ki jítèe ní an fītì-bi yam ní bi kíǹ ki tátí mpɔn áli kuwiŋkuluu saraau yuntiŋu dāa sāā, ama baa nìn gbìl̄ nneen ŋubɔ puɔɔɔ, ubɔ kaa nìn kíiń-baaa, baa nìn ká báà kudaaŋŋu mun.

30 Niinee ní Eelii bí samaa kɔkɔ yii: «Ní sútiń kí pìl̄maan-mi!» Ní samaa kɔkɔ sútì ki pìl̄-u. Ní u ŋáŋkì ti-Dindaan saraafaŋŋu ŋun nìn lítèe. 31 U yōoǹ ataŋkpee saalaa nì ali ki nóó nì Jaakɔb jipɔmbi naakɔti saalaa nì tilee, Jaakɔb gbanti ní ti-Dindaan nìn bí yii: «Bi làá nīn kíǹ ki yíì-si yii Isirayeel ní^a.» 32 Ataŋkpee gbanti ní Eelii nìn fātìi dūu máń nsaraafan ki dū-ŋu ki sú ti-Dindaan. U nìn gbìn̄ dibɔbil din poon nnyim liitirib mmuŋku nì saalaa ŋūǹ kí kɔ́ee ki tú nsaraafan. 33 U ŋá míǹ ki dóòyee ní ki bɔ́ntì idɔ ki páaǹ nsaraafanee pu, ní ki càkā unajee ki bɔ́ntìi páaǹ idɔee pu. 34 Niinee ní u bí bin nìn bí niinee yii: «Lúḿmaan nnyim kí gbéeǹ aboo anaa kí sìtī saraa nì idɔ nee pu.» Ní bi ŋá míǹ. Ní u gíti bí yii: «Gíti ŋámaan míǹ nliliitiim.» Ní bi gíti ŋá míǹ. Ní u gíti tí bí yii: «Gíti tí ŋámaan míǹ ntataatiim.» Ní bi gíti tí ŋá míǹ ntataatiim. 35 Nnyim nìn kíǹ ki pùub̀ nsaraafan pu ní áli dibɔbil din bi gbìn̄ee gba gbí.

36 Ŋyunti ŋun bi ŋáań kuwiŋkuluu saraauee bàn̄ee ní Unimbɔti bɔnaatiliu Eelii sútìi pìl̄ nsaraafan ní ki bí yii: «Ti-Dindaan Abraam nì Isaaki nì Jaakɔb Nimbɔtiu, yàntī bí béé díǹ yii sii di sá Isirayeel Nimbɔtiu ní man sá a-tɔntɔnliu, ní sii di bí yii ḿ ŋá tin kɔkɔ m ŋá nee. 37 Kíí-mi, ti-Dindaan, kíí-mi kí yàntī samaa nee ń béé yii sii ti-Dindaan di sá Unimbɔti, ní a là kí fàtīí gíiǹní-bi a-cee.» 38 Ní ti-Dindaan yāntì ŋŋmi nyánní yilpu ki wùn̄ saraayee nì idɔee nì ataŋkpeeyee nì ŋkpɔŋkpɔm, ní ki yāntì nnyim min kā dibɔbilinee fóotì. 39 Samaa nín ká mimmee ní bi-kɔkɔ tātìi dōoǹ kitiŋ dicincibil ki bí yii: «Ti-Dindaan di lafun sá Unimbɔti! Ti-Dindaan di lafun sá Unimbɔti!» 40 Ní Eelii bí-bi yii: «Ní cúúmaan diwaal Baal bɔnaatiliibee! Ní taa yàntī báà ubɔ ń ŋmátí!» Ní bi cúú-bi, ní Eelii cáá-bi ki sīntì Kiisɔn buŋgbandi ki lāntì bi-kɔkɔ niin.

Utaa fātìi nìn̄

41 Boonee ní Eelii bí Akaab yii: «Jɔ̄m̀ kí jī kí nyɔ̀, di sá yii m gbìl̄ ditaadundi pu.» 42 Ní Akaab nín jɔ́ḿ kí jī kí nyɔ̀, ní Eelii úǹ nín jɔ́ḿ Kaarmeel jool yilpu, ki tātìi gbāaǹ ki dū u-yil ki fákáǹ u-tabiŋyiliŋ kansikin. 43 Niinee ní u bí u-tɔntɔnliu yii: «Jɔ̄m̀ kí kpèè tiŋku watil pú.» Ní utɔntɔnlee jɔ́m̀ ki kpēē ní ki fātìi gítìń ki bí yii: «Tiba kpá.» Ŋfunyɔm miluli pu ní Eelii bí-u yii: «Gítí kí kpèè.» 44 Ŋfunyɔm miluli puee ní utɔntɔnlee bí yii: «Kpèè, kitagbambilii kiba nyánní tiŋku watil pú ki jɔ́miń. Kaa gbìfì ki bàn̄ unil ŋaŋfaau gba.» Ní Eelii bí-u yii: «Jɔ̄m̀ kí tùkù Akaab yii: <Kpàl̄ a-taamuu kí kpákatí utaa ń taa cúú-si nsanni.>»

45 An kaa pée súŋkì ní utaa yíiń ki bɔ̄ntì kpíŋkpiŋkpim ní kubuŋu bíi jītí, ní utaakpaan ubɔ dɔ́miń ki nìn̄. Ŋyunti gbantee Akaab kā u-tɔrɔkuun ki gítí Jisirayeel tiŋkin^b. 46 Ti-Dindaan nìn tīī Eelii mpɔn ní úǹ gbìn̄ u-dambalau ki sáǹ ki līntì Akaab tɔrɔkuu nyɔkɔpu ki tin kɔ́ Jisirayeel tiŋkin.