Yesu anamisi n'dɔtu a esa la sabato
(Olengɛ go Mat 12.9-14; Luk 6.6-11)
3
Mbusa indɔ, Yesu ab'angia go asuba a endu a sinagogi. Iyo, ai we nto nde njaga aɛ ai n'aye aku. 2 BaFalisayo ai banengelela Yesu nga baɔnɛ mbénɔ aang'anamisa n'dɔtu ndɔ esa la sabato. Ai nde kaba la yɔnga nde banchoela au. 3 Yesu ab'anngodea n'dɔtu ndɔ ate: «Bhiɛ to, omɛ a meeme a bato nde ani!» 4 Mpa ab'aengodea ate: «Iboni yɛu Maanɔ ndasu asosii a yɔnga la sabato? Kɔla la éma anja aɔ kɔla la éma ajede? Lamisa la nto aɔ kusisa laɛ?» Bato bɔbhu aba badhaa. 5 Yesu ab'atimbisa iso a boetani angala abɔ, na kuá la ngomi kpɛɛ a ɔna la sinde meema abɔ adandimani nee. Ab'anngodea n'dɔtu ndɔ ate: «Okakiɛ njaga aɔ.» Ab'akakia njaga aɛ, n'iyu ab'akɔkɔtiana. 6 BaFalisayo aba baóba na nsɛngɛ, na makanga lɛbha aba baga batulana na bato nde ba mɔamɛ Ɛlɔdɛ a mpíta. Indɔ nga baɔnɛ sinde bammóa na Yesu.Mɔlɔndɔ a bato bam'belea Yesu
7 Yesu na bagoli nde baɛ aba batoa wa, na ga labɔ na nkpalɔ a ngɛji. Da-mɔlɔndɔ a bato aba bam'belea toa la Galilaya, Yudɛa, 8 Yɛlusalɛma, Idumɛa, kubhi a Yɔlɔdani, ago na bande ba mpiti-mpiti a lɛɛngɔ a Tilɔ na Sidɔna. Bɔbhu aba bankidia Yesu nga ai baɔki mbinɔ a éma nde ai akɔla. 9 Yesu ab'aengodea bagoli nde baɛ ate babhísɛ aɛ koko nga bato bansɔ́anisa-i. 10 Nga Yesu ai n'aye aelamisi bato bati, bajegi bɔbhu ai bansɔ́anisaga nga bambhɛdiɛ. 11 Mbènɔ nde baketi ai bamɔna na Yesu, bajegi ndɔ aba bagua a ego laɛ na balaka bate: «O nde Muna-Mokonga.» 12 Yesu ai aɛkɔ́misa kpɛɛ ate bangoda-i bende a nde màni.
Yesu aɛsɔmbɔli batetei nde baɛ mɔkɔ́ na babale
(Olengɛ go Mat 10.1-4; Luk 6.12-16)
13 Mbusa indɔ, Yesu ab'atalia na mamba, ab'aekoga bande ai aekabi, n'ibɔ aba baga nɔngɔ aɛ. 14 Ab'aɛsɔmbɔla bande ba mɔkɔ́ na babale ndɔ, na pa labɔ ina la batetei nga batambɛ áma imoti n'iyɛ, na aeteɛ ga labha la yɔnga la Mokonga. 15 Na ab'aepa bokama la bèa la baketi. 16 Batetei mɔkɔ́ na babale nde ai aɛsɔmbɔli ndɔ, ina abɔ ai nde: Simoni (mmbe ai ansɔ̀i ina la Pɛtɛlɔa), 17 Yakɔbɔ muna-Jɛbɛdayɔ na mɔtɔɔ aɛ Yɔani (bande babale ndɔ, Yesu ab'aepa ina la Boanɛgɛ, a nde yɔnga la bende Bana-Tita-la-Mbúa), 18 Andeleya, Filipɔ, Batɛlɛmayo, Matayo, Tɔmasi, Yakɔbɔ muna-Alifayo, Tadei, Simoni mmbe ai bankoga bate Jɛlɔtɛ, 19 na Yuda Sikaliɔta, mmbe ai ansoli Yesu ndɔ.
Batoba-Yesu bagee bankabaga
20 Mbusa indɔ, Yesu ab'asiana nɔngɔ aɛ. Mɔlɔndɔ a bato bati aba batulana go, kida la Yesu na bagoli nde baɛ bai babóli mbènɔ a léa l'eléa. 21 Batoba-Yesu mbènɔ nde baɔki na yɔnga ndɔ, aba baga ga dhunga laɛ nga, ai bayɔnga bate: «Moo aɛ aujuani.»
Bansɔ̀i Yesu ina la Bɛlɛjɛbuli
(Olengɛ go Mat 12.22-32; Luk 11.14-23; 12.10)
22 Mpa, bangɛngɛlɛ a Tɔlati nde ai batoi Yɛlusalɛma aba bayɔnga bate: «Bɛlɛjɛbuli angi asuba aɛ. N'ekanda la mokama nde ma baketi yɛu aebèaga baketi.» 23 Yesu ab'aekoga na ngodea labɔ maibhe nde ate: «Boni yɛu Sitani aanga atɔa n'am'bèigi Sitani? 24 Nabana bato nde ba ɛbɔamɛ imoti bakatanigi nkunguanabɔ, ɛbɔamɛ ndɔ nnd'aanga amá. 25 Ago bato nde ba mba imoti n'aye bakatanigi nkunguanabɔ, mba ndɔ nnd'aanga amá. 26 Na nabana Sitani aanga ammanisa Sitani, bɔkpɛ laɛ n'abuani, ɛbɔamɛ ndaɛ nnd'aanga amá. Kesi sungia-li a a ndɔ.
27 Nnd'a na nto nde aanga atɔa n'angi asub'endu a nto makpɛ ga ula la nkumba ndaɛ na annyangigi-mbɛ. Annyangaga mbɛɛ mpa ab'aula nkumba ndaɛ. 28 Nenongodei domi, Mokonga alilia mande ilɔlɔ bhulibhu nda bato, na ɛɔti bhulibhu nde ai bamɔtigi nee. 29 Mpa, nabana nto amɔtigi Meema Mbhumani, Mokonga nnd'alɛ akua n'alilii ilɔlɔ ndɔ. Ilɔlɔ ndaɛ aika lɛ kida la mɛyɔ.» 30 Yesu ai aengodei bo nga, ai bayɔngi bate: «A na nketi majede asub'aɛ.»
Amá-Yesu na bana-amáɛ
(Olengɛ go Mat 12.46-50; Luk 8.19-21)
31 Mpa, amá-Yesu na bana-amáɛ aba bakida. Aba bamaga na nsɛngɛ, na aba bankogisisa. 32 Mɔlɔndɔ a bato ai baiki na bantimbi Yesu, na ngodea laɛ bate: «A a nde amáɔ na bana-amáɔ ba na nsɛngɛ ani nde, baokabaga.» 33 Ab'aesisila ate: «Màni yɛu a nde amámi na bana-emá?» 34 Mpa, ab'atimbisa iso aɛ anga a mɔlɔndɔ a bato nde bai bantimbi ndɔ, ab'aengodea ate: «Emá na bana-emá yɛu ba ba nde. 35 Nga, mmbe atamba sinde Mokonga akondi nee, mmbɔ yɛu a nde muna-emá, alɔmi na emá.»