Yɔnga anga bato a mbea
12
A mbènɔ ndɔ, da-mɔlɔndɔ a bato-li ai baga na babia kpɛɛ, aba bakɛngɛtisa dɛtanaga. Yesu ab'akɛngɛtisa ngodea la bagoli nde baɛ ate: «Bolengelelɛ hɛlɛ mbɛɛ nde ebhetebhete nda baFalisayo ndɔ! Aanjana nde bía masau nde a asuba sembo a mokate. 2 Bhulibhu nde bato basɔmɛa aúbhianana mande, na inde ba nee a bɔsɔmbi aóba mande na nsɛngɛ. 3 Ìbo yɛu, bhulibhu nde bɔyɔnga a dhoda, bato baɔka mande yu etonge, na inde bɔyɔngɛla a etue asuba endu, balabha mande yu a ntɔ́ndɔ.»Màni yɛu atɔlɛli bonteɛ?
4 Nenongodei benu badhami nte: «Bootea-i bato nde baɔla masa ngobho, na nnda ba na inde bakɔla go atɔɔ mbusa indɔ. 5 Nenoangelisa mmbe atɔlɛli bonteɛ: Bonteɛ gɔɛ nde mmbe a na bokpɛ la móa na maa lanu asuba Gɛɛnaa. Nenongodei domi, mmbɔ yɛu atɔlɛli bonteɛ.
6 Nnda boúbha bende bamachiɔ batanɔ baesombisa nde na nyia-ntondɔ ibale? Nangɛ ìbo, Mokonga nnda am'boseli naa moti angala abɔ.
7 Mpa go, aúbha nangɛbɛ etangi a sia-moo anu. Botea-i nga bɔɔnyɛni dhɔlɔ bamachiɔ bati.»
8 «Nenongodei, mmbe amolebea mosá la bato bía nkɔbɛ nde mamɔ, Muna-Nto n'iyɛ anebea mande mosá la bamalaeka nde ba Mokonga. 9 Mpa na mmbe amɔkɔma mosá la bato, Muna-Nto ankɔma mande n'iyɛ mosá la bamalaeka nde ba Mokonga.
10 Mmbe ayɔnga mande yɔnga ajede anga Muna-Nto, Mokonga aang'anilia. Mpa mmbe amɔtigi Meema Mabhu, Mokonga nnd'anilia mande.
11 Mbènɔ nde banoga nee, asuba endu a sinagogi, nangɛbɛ abɛ mosá la baamɛ aɔ go mosá la bamangɛsɛ, mpa boba-i na maamaa a yɔnga nde boba mande bosisa na yɔnga-li. 12 Nga, Meema Mabhu anogolisa mande a mbènɔ ndɔ, yɔnga nde boba mande bɔyɔnga.»
Maibhe a nto a lua
13 Nto moti angala mɔlɔndɔ a bato ndɔ ab'anngodea Yesu ate: «Ngolisi, onngodeɛ muna-ebha bende, bebuɛ moando nde abhasu asɔdɔlɛi.» 14 Mpa, Yesu ab'ansisila ate: «Dhami sa! Màni yɛu amobhísi nebɛ nsɔ̀i-yɔnga, aɔ nto a gabha la moando ndanu?» 15 Mpa, ab'aengodea bɔbhu ate: «Bolengɛ hɛlɛ a konda la ntondɔ, nga nto nnd'alenda nde a yɔnga la ntondɔ ndaɛ, nangɛ abɛ na ntondɔ ati.»
16 Mpa, ab'aemaela maibhe nde ate: «Nto a ntondɔ moti ai agubhi eléa ati a tio aɛ. 17 Nto ndɔ ab'aeulisa bende: ‹Éma sina yɛu aanga nɛkɔla? Nga a yu nde nnda ne na áma nebhísa egubhɔ namɔ nde.› 18 Ab'ayɔnga go ate: ‹Ibende yɛu nɛkɔla, nɛgbɔla mande endu ngundu namɔ, nehia mande atɔɔ ati kpɛɛ. Mpa, nebhísa mande au eléa namɔ na nkumba namɔ bhulibhu.› 19 Mbusa indɔ, nenngodea mande meema ami nte: ‹Dhami sa, o na nkumba ati kpɛɛ nde obhísi a elemɔ ati. Mpa oyombiɛ, oléɛ, onoɛ, obɛ a bujɛmɛ.› 20 Mpa, Mokonga ab'anngodea ate: ‹Mbhobho nde sa! Kia a ndiende, neuta ndende meema aɔ. Mpa, màni yɛu atiga na da-nkumba nde obhísi nde?›» 21 Indɔ yɛu ankidia mande mmbe abhísa lua ndaɛ iyɛ nganga, mpa go na nnd'a na éma a iso a Mokonga.
Bhísa la meema anga Mokonga
22 Mbusa indɔ, Yesu ab'aengodea bagoli nde baɛ ate: «Indɔ yɛu aangisi nenongodea bende, boba-i na maamaa a lenda lanu, a inde aanga boléa na a ngɔmbɛ́ nde bɔlɔla. 23 Nga, lenda anyɛni eléa na ngobho ab'anyɛna ngɔmbɛ́.» 24 Boolengɛ bakikɔlɔli: «Nnda ba na tio, nnda bagubha na nnda ba na ngundu, mpa go Mokonga aki aelisa. Benu sa, nnda boúbha bende boonyɛni bambabu ndɔ?»
25 Maani angala anu yɛu, n'aye a na maamaa aanga atɔdisa kia ɛdɛ a lenda laɛ? 26 Nabana nnda bo na ekanda a éma ɛdɛ bía indɔ, mpa anga éma sina yɛu bo na maamaa a inde atigiligi? 27 Bolengɛ agɔmbɛ: Nnd'atɛ̀la ngolí aɔ oka la ngɔmbɛ́. Nenongodea bende: Nangɛbɛ Sɔlɔmɔnɔ iyɛ nganga a boumu laɛ bhulibhu, nnd'ai alɔlani bía agɔmbɛ nde. 28 Nabana Mokonga alɔlisa kasa inde a beli ndiende asuba tio, na uma-li ab'asumba a nsa, nga éma sina yɛu nnd'aanga anɔkɔlɛla ìbo benu, bato a boosobela ɛdɛ?
29 Na benu, bokabaga-i inde bolea mande aɔ go inde bonoa mande, na kanga boonobisa a indɔ. 30 Indɔ bhulibhu, bato nde ba lɛɛngɔ nde bakabaga, mpa abhanu aye aúbhi kala bende na benu bo na sei a indɔ. 31 Bokabɛ mbɛɛ nde Ɛbɔamɛ ndaɛ, na indɔ bhulibhu iyɛ atɔdɛisa anu.
Bobhísɛ lua ndanu nɔngɔ Mokonga
32 Botea-i, banyia-mɔlɔndɔ a bamboli nde bamɔ, nga am'bɔngɛli Abhanu pa lanu Ɛbɔamɛ. 33 Bosombisɛ inde bo nee na bogabhɛ iyu a bɔɛmbɔ. Bɔkɔkɔtiɛ anu njombi nde nnd'aanga aujuana, a nde bende lua nde nnd'asia alɛ na kobha. Nnd'a we naa nkukuba na bankɛɛngɛ, bande aanga baujisa. 34 Nga, áma nde oki obhísa lua ndaɔ meema aɔ aki ba be.
Bokengemana a bondelaga la Muna-Nto
35 Boikɛ masa na ngɔmbɛ a nkási na tala ndanu aikɛ n'alola. 36 Na bobɛ bía bande bam'bondeaga mokama nde mabɔ n'atoa áma ehali, nga a kida laɛ n'aye akɔgɔlisi balingisanaga-i a ukuila laɛ. 37 Bujɛmɛ anga bakɔbɛ nde, a kida la mokama nde mabɔ, aedhonda na bakengemani. Domi nenongodea, abɛsa lɛ ngɔmbɛ a nkási, na bhísa la bakɔbɛ nde baɛ áma eléa na pa labɔ. 38 Mpa nabana asiana nde a meeme a kiia aɔ mbusa wa go, ab'aedhondi n'aha bakengemani, aba nde bujɛmɛ angabɔ! 39 «Boúbhɛ bende: nabana amɛnɛ a endu ai aúbha mbènɔ nde nkukuba abhia nee, mmbɛ nnd'ai aanga adoa ate bagbɔlɛ ebombo a endu aɛ. 40 Na benu, bokengemanɛ nga, Muna-Nto abhia mande a mbènɔ nde nnda boúbha.»
41 Mpa, Pɛtɛlɔ ab'amulisa ate: «Mokama, maibhe ndɔ osongodei masa besu, aɔ a nde anga bato-li bɔbhu?» 42 Emesunga na Mokama ate: «Màni yɛu a nde mbhísi-lua nde a domi, ago nto a maɛnɛkɔ? A nde mmbe mokama nde maɛ ambhísi asuba endu aɛ na langa la badhaɛ na pa labɔ eléa a mbènɔ nde ba na sei-li. 43 Aba mande bujɛmɛ anga nkɔbɛ ndɔ, nabana mokama nde maɛ a siana laɛ, andhondia n'aha akɔla nkási ndɔ. 44 Domi nenongodea bende, mokama nde maɛ ammòa mande ekanda la mɛlɛla la nkumba ndaɛ bhulibhu. 45 Mpa, nabana nkɔbɛ ndɔ aanga ayɔnga iyɛ nganga ate: ‹Aa! Mokama nde mamɔ nnd'abhii dia.›» Ab'akɛngɛtisa binda la bakɔbɛ badhaɛ, baboo na bake. Ab'aikila léa, noa na bokundilia. 46 Mpa, mokama nde maɛ ab'abhia a esa na mbènɔ nde nndaga ai aúbha. Mokama ndɔ, ab'ankɔla bía nde aki baɛkɔlɛla bakɔbɛ nde bakɔmi ɔka la yɔnga nda bakama nde babɔ.
47 A nde bende, nkɔbɛ nde aúbha inde mokama nde maɛ akaba angaɛ mpa, na nnd'akɔli éma na ɔka inde mokama nde maɛ ansosii, amɔna mande nde mokpata. 48 Mpa, mmbe nnd'ai aúbha inde mokama nde maɛ akaba, n'akɔla ajede, bam'bɛta mande ɛdɛ. Mmbe bammòi éma ati, bammɛma mande go éma ati. Nto nde bampi bokama antata éma ati, bamulisa mande go éma ati.
Yesu a nde tine a katanaga
49 Nebhii nde, bhia lolisa la nsa na lɛɛngɔ†. Na nekaba nde nte alolɛ dia kpɛɛ. 50 Ne na ndiisɔ nde nengia mande au, na meema ami aulua kida la mbènɔ nde indɔ aóbela mande. 51 Boaka nde bote, nebhii nde na bɔkɔlɔ asuba lɛɛngɔ? Nnd'a bo! Nebhii gɔɛ nde a katanisaga la bato. 52 Toa la mbènɔ nde, bato batanɔ n'aye ba a endu imoti, bakatanaga mande. Bato babale nnd'aba baɔkana na bato basalɔ, na bato basalɔ nnd'aba baɔkana na bato babale.
53 Ebha akatana mande na naɛ, na nyia-muluana bona abhaɛ. Èma akatana mande na nyike nde maɛ, na nyike bona amáɛ. Amá-muluana akatana mande na nka-naɛ, na nka-naɛ bona amá-munyaɛ.
Úbha la mbènɔ
54 Yesu ab'aengodea mɔlɔndɔ a bato ate: «Mbènɔ nde bɔɔna ebundu n'aobela saka áma máni aki ala, aba bogea bote: ‹Asaki alɔɛ.› Na mbúa-li ab'alɔa. 55 Mbènɔ nde bɔɔna kukisa n'atoa saka kusib bote: ‹Máni abɛta ndende kpɛɛ.› N'iyu aba a nde bo. 56 Bato a ebhetebhete sa! Boúbha úbhilila la éma nde aɔnɛana na dodo na egoo. Mpa, nga éma sina yɛu nnda boúbha mbunde la mbènɔ nde be au nde?»
Lɔngana la na dhaɔ mosá la sɔ̀a la yɔnga ndanu
57 «Anga éma sina yɛu nnda bɔtɔisa sɔ̀a la yɔnga ndanu kilikili benu nganga? 58 N'aye boga na dhaɔ áma ntua a sɔ̀a la yɔnga ndanu, atɔlɛli okabɛ na iyɛ bɔkɔlɔ a asii-li bhulibhu n'aha boga. Nga kesi aokidisa mosá la nsɔ̀i-yɔnga, na mmbe ab'aobhísa a njaga baboo nde baɛ na bande aba baomaa asuba endu a bande baenyangi. 59 Neongodea bende, nnd'oong'otoa a endu ndɔ, na ɔgɔbi-mbɛ lèa la muunda ndaɔ bhulibhu, kida la anga kichɛlɛ nde maa na sungia.»