Abɔngi tia la tambela lanu
13
A mbènɔ ndɔ, bato aba babhia bantɔmila Yesu mbinɔ a bato nde ba Galilaya, bande Pilatɔ ai aemoisisi a mbènɔ nde ai bangabhea Mokonga bɔɛmbɔ ndabɔ. 2 Yesu ab'aesisila ate: «Boaka nde bote yɔnga nde ai aekidili baGalilaya ndɔ ai nde nga bai bato a ilɔlɔ nyɛna la baGalilaya la bande batɔɔ? 3 Iisi, nenongodea na benu, na nnda bootii a doa la ilɔlɔ ndanu, benu bɔbhu botinda mande masa bía ibɔ. 4 Bookanisɛ bato nde ba mɔkɔ na lalɔ ndɔ bande ebòmbò ai aegulii naa Silɔamu. Boaka bende bai bajede nyɛna la bato batɔɔ bɔbhu bande ba Yɛlusalɛma? 5 Iisi, nenongodea na benu, na nnda bootii a doa la ilɔlɔ ndanu, benu bɔbhu botinda mande masa bía ibɔ.»Maibhe la mee nde nnd'abɔta
6 Yesu ab'aemaela maibhe nde ate: «Nto moti ai na mee a motini, inde ai bakoni a tio aɛ. Ab'abhia akabaga au mbùa, ab'abola. 7 Amɛnɛ a tio ndɔ ab'anngodea nkɔbɛ nde maɛ ate: ‹Kelemɔ isalɔ yunde na nebhia nekaba mbùa a mee a motini nde na nnd'aki nɛɔna au éma, ɔngɔtɛ. Nga boni yɛu aanga abá aujisa dodo bosa?›» 8 Mpa nkɔbɛ ndɔ ab'anngodea ate: «Mokama, odoɛ mbɛɛ go yu a kelemɔ imoti. Netongea tine na duiaga-li a gesa la au mɔbɔa. 9 Kosà a kelemɔ nde abhia nde aang'abɔta mbùa. Makanga indɔ, ɔb'ɔgɔtisisa yu.»
Yesu anamisi nke a esa la Sabato
10 Esa imoti la Sabato, Yesu ai n'agolisa asuba endu a sinagogi nda baYuda. 11 Ai wa nke moti mmbe a na baketi nde ban'dɔtisi a elemɔ mɔkɔ na lalɔ. Ngɔngɔ aɛ ai n'aeluti na nnd'ai atɔa mesa-li. 12 Yesu ɔna la nke ndɔ, ab'ankoga na ngodea laɛ ate: «Emá sa! Olami a ɛdɔtu ndaɔ ndɔ.» 13 Ab'abhísa njaga aɛ antate aɛ. A mbènɔ ndɔ ngɔngɔ aɛ ab'ama n'iyɛ ab'akɛngɛtisa bhebha la Mokonga.
14 Omi nde ma endu a sinagogi nda baYuda ndɔ, ab'anɛma ɔna la sinde Yesu anamisi na nto ndɔ a esa la Sabato. Ab'aengodea mɔlɔndɔ a bato nde bai wa ate: «A weli esa motoba nda nkási. Na a esa ndɔ yɛu bobhiɛ áma a lamisa lanu, makanga esa la Sabato.» 15 Mokama ab'ansisila ate: «Benu bato a ebhetebhete nde sa! Angala anu a beli mmbe nnd'aanga ankodaga ntɛ aɔ ponda nde mmaɛ a keleba, ga nusa laɛ íbo esa la Sabato? 16 Mpa nke nde, a nde muna-Abolaimu, Sitani ai n'aye mɛnɔ annyangi a elemɔ mɔkɔ na lalɔ nde, nnd'atɔlɛli kodaga laɛ a ngolí ndaɛ nde nga a nde esa la Sabato?» 17 A yɔnga ndɔ, banjiu aɛ aba bakua soni, na da-mɔlɔndɔ a bato nde bai beli aba bajangea éma a bangisana-li bhulibhu nde ai akɔli.
Ɛbɔamɛ nda Mokonga akengi nde éma sina?
18 Yesu ab'ayɔnga ate: «Ɛbɔamɛ nda Mokonga akengi nde na éma sina? Aanga nekenganisa nde na éma sina? 19 A nde bía nyia-mbùa a aladali, inde nto abɛsi na kona-li a nyia-tio aɛ. Nyia-mbùa ndɔ ab'atɛla, ab'aetia mee, na bambabu aba bahia endu abɔ a ntabhi-ntabhi-li.»
20 Yesu ab'ayɔnga go ate: «Aanga nekenganisa ɛbɔamɛ nda Mokonga nde na ee? 21 Akengi nde na masau, inde nke moti abɛsa ab'asɔlɔmisa na jɔ isalɔ la ntubhu a nganɔ. Masau ndɔ ab'abimbisa bhulibhu.»
Ngia a ɛbɔamɛ nda Mokonga
22 Yesu ai aga Yɛlusalɛma, n'anyɛna asuba bɔma na banyia-nji ntua-ntua n'agolisa. 23 Nto moti ab'amulisa ate: «Mokama, Mokonga aelamisa lɛ masa bato bɛdɛ a bhia laɛ?» Na Yesu ab'ansisila ate: 24 «Bɔkɔlɛ a ekanda lanu bhulibhu ngia la a mpume la inde abɔkɔtani. Nga nenongodea domi bende bato bati alɛ bakaba ngia la au, na nnd'alɛ batɔa.
25 A mbènɔ nde amɛnɛ a endu amá mande na kpema la mpume, benu, botiga mande na ntanga. Bɔkɔgɔlisa mande mpume na bɔyɔnga bote: ‹Mokama, osoukuilɛ sɛ!› N'iyɛ ab'anosisila ate: ‹Nnda nenoúbha!›
26 Mpa na benu auma bɔyɔnga bote: ‹Ka ai beléa na noa áma imoti na owɛ. Ago oi ogolisaga nde a ahe nda nji asu.› 27 N'iyɛ auma anosisila ate: ‹Nnda neúbhi mbénɔ bo nde bato nde ba iwani. Botoɛ a mpiti ami, benu bɔbhu nde aki bɔkɔla bujede.›
28 Esa nde alɛ bɔmɔna Abolaimu, Isaka, Yakɔbɔ na baúbhilili-li bɔbhu a Ɛbɔamɛ nda Mokonga, na maa lanu na ntanga, iwa yɛu abá alɛ ngamɔ na gega la minyɔ. 29 Bato alɛ batoa a hale ini nda asuba lɛɛngɔ-li bhulibhu a bhia bɛsa la mpuɔ a bujɛmɛ nda Ɛbɔamɛ nda Mokonga.
30 Na ìbo yɛu, bande ba na sungia alɛ bama mosá-mosá, na bande ba mosá-mosá alɛ baetia bande ba na sungia.»
Yesu agamei Yɛlusalɛma
31 A mbènɔ ndɔ, baFalisayo batɔɔ aba basɛdɛa a mpiti a Yesu, aba banngodea bate: «Otoɛ ani, ogɛ, nga mɔamɛ Ɛlɔdɛ akaba moisisa laɔ.» 32 Yesu ab'aesisila ate: «Bogɛ bonngodeɛ majakala ndɔ bende: ‹Neebea baketi na lamisa la bajegi ndiende na uma. Na a kia l'inda isalɔ aba mande nde gɔba la nkási namɔ.› 33 Mpa, atɔlɛli negɛ mosá na tamba namɔ ndiende, uma na bhaa uma, nga nnd'a anja múbhilili kulia la dhɔlɔ, atɔlɛli akuliɛ masa Yɛlusalɛma.»
Molakɔ anga Yɛlusalɛma
34 «Chaa Yɛlusalɛma! Chaa Yɛlusalɛma! Owɛ nde ɔɔɔla baúbhilili na móa la na ɛtɛ bande Mokonga aetea anga aɔ. Aye mɛnɔ nekengeigi tulanisa la baanaɔ bía kɔkɔ nde aebomba baanaɛ asuba epupe laɛ, mpa bɔkɔmi! 35 Mpa nga indɔ, bɔma ndaɔ aji esimɔ. Nenongodea domi bende, nnd'alɛ bɔmɔɔna kida la esa nde bɔyɔnga mande bote: Abhebheanɛ mmbe abhia a ina a Mokama†.»