Ɛkɔli
nda Batetei
Moo a yɔnga
Ketabo nda «Ɛkɔli» nde atɔmii nde sinde kanisà ai akɛngɛtisi naa nji nda Yɛlusalɛma, ga-li a lɛɛngɔ a baYuda na Samalia kida l'a lɛɛngɔ a dhɔlɔ-dhɔlɔ, bía nde Yesu Kilisitɔ ai aesosii na bàgoli nde baɛ mosá la tália l'aɛ na kobha (Ɛkɔl 1.8). Nto nde aandeki ketabo nde a nde Luka, mmbe ai aandeki go ketabo nda Mbinɔ Anja nda Luka. Ai nde nsake mati, ago n'a na bɔɛngɛ nde akáli a andeka la mbinɔ nde a nde domi. Luka aandekei ketabo nda ibale nde a nde Tɛɔfili, moGiliki. Mpa, aiki go nde bía aeandekei ketabo nde nde bakilisitɔ bɔbhu, abɛ baGiliki aɔ baYuda (1.1).
Ketabo nde ai baandeki yu nde a nsɔlɔ a elemɔ 60 kida la 64 mbusa a bɔtɛana la Yesu Kilisitɔ. Beúbha inde nga, Pɔlɔ ai na atoi-mbɛ asub'a ngɔmɔ sinde sungia la ketabo nde aɔngiani nee. Na Luka n'iyɛ ai batambi bona ntetei Pɔlɔ. Ang'a indɔ, a nde bía ai aandeki ketabo nda Ɛkɔli nde nde a nji nda Andiokia. Ketabo nde a nde gbutu a ketabo nda Mbinɔ Anja nda Luka. Akɛngɛtisi nde na mbinɔ a tália la Yesu na kobha. Inde aangisi Luka aandeka ketabo nde a nde maakɔ imoti na inda Mbinɔ Anja nd'aɛ ndɔ. Ai akóndi bende Tɛɔfili na bakilisitɔ la bande batɔɔ baɔnɛ kodomi la éma nde ai baegolisa. Na ang'a indɔ ai aandeki mbinɔ niina a yɔnga la lenda la Yesu na a yɔnga la ndanda la kokilisitɔ.
Ketabo nda Ɛkɔli asɔɔngii sinde kanisà nda mosá-mosá ai nee, na sinde bato ai balendi nee asub'a boosobela ang'a Yesu. Batetei basɔɔngii nde sinde na besu aanga bɛɛkɛtɛla na ekanda la Meema a Bobhu nga, bendandisɛ Mbinɔ Anja ang'a bato batɔɔ.
Buanaga la ketabo
Ketabo nde abuanigi nde a hale lalɔ:
Meema a Bobhu aesìmii bàgoli na bía la kanisà (1.1—8.1).
Nobisa la kanisà na sɛdɛa-li bhale a Yɛlusalɛma (8.2—12.23).
Tamba la bolabhɛ nda mosá-mosá nda Pɔlɔ (12.24—14.28).
Mpíta mati nda Yɛlusalɛma a yɔnga la sinde bakilisitɔ nde ba mbènɔ-mbènɔ balenda nee (15.1—35).
Tamba la bolabhɛ nda ibale nda Pɔlɔ (15.36—18.22).
Tamba la bolabhɛ nda isalɔ nda Pɔlɔ (18.23—20.38).
Dhunga la Pɔlɔ naa Yɛlusalɛma (hale 21-26).
Ga la na Pɔlɔ naa Lɔma (hale 27-28).