Baloa nda Pɔlɔ ang'a
BaFilipi
Moo a yɔnga
Pɔlɔ ai aandeki baloa nde n'aha aiki asub'a ngɔmɔ (1.13), ab'aeandekea nde bande banebei Kilisitɔ naa Filipi. Na indɔ ai nde a elemɔ 61 mbusa a bɔtɛana la Yesu Kilisitɔ. Aúbhianani bende a mbènɔ ndɔ ai naa Lɔma. Filipi ai nde nji mati nde ai asub'a ɛkɔngɔ nda Makedonia. N'iyu yɛu ai nde kanisà nda mosá-mosá nde Pɔlɔ bona Sila ai bakɛngɛtisi a lɛɛngɔ a Makedonia na baha áma imoti. Bakpɛga nde ba bɔma nda Filipi ai baenyangi ngbuluana kiia imoti na bá asub'a nji ndɔ (Ɛkɔl 16).
A nde bía Pɔlɔ ai na maakɔ ati inde ai aangisi aandeka baloa nde. Ai aeandekei nga aesìmɛ bato a nkɛbɛa nde ai bankɛbɛigi mbènɔ nde baɔki nee bende Pɔlɔ a asub'a ngɔmɔ (4.10-19). Ai go akaba nde tɔmila l'abɔ mbinɔ aɛ asub'a ngɔmɔ ndɔ, na kaba la ngodea la kanisà mbénɔ Timɔtɛɔ na Epafɔlɔditɔ ba nde ba màni (2.19-30) nga baepikilɛ hɛlɛ na sikisa la bɔsɔndɔlisi abɔ.
Buanaga la baloa
1. Baloa nde akɛngɛtisi nde na nseseɔ nda Pɔlɔ a Kanisà nda Filipi (1.1-2)
2. Mbusa indɔ aɛtɔmili adha mbinɔ a éma nde antimbi, na éma-éma nde ai aɔni bende ankɛndɛlisa (1.3—2.30)
3. Mbusa go aepi asii ati nda belea a ika la asub'a Kilisitɔ na kɔlɛla l'aɛ nkási (3.1—4.9)
4. Na a sungia Pɔlɔ asìmi Kanisà nda Filipi a nkɛbɛa nde ai bankɛbɛi na sesea l'abɔ (4.10-23).