Baloa nda Pɔlɔ ang'a
BaFilipi
Nseseɔ
1
Eme Pɔlɔ na Timɔtɛɔ, bakɔbɛ nde ba Kilisitɔ Yesu, ang'anu bato nde ba Filipia, benu nde Kilisitɔ Yesu ai anɔsɔmbɔli nga bobɛ bato nde baɛ, ang'a balangi-kanisà na benu badiakoni, benosesei. 2 Abhasu Mokonga, na Mokama Yesu Kilisitɔ, anopɛ boangɔ na bɔkɔlɔ!Pɔlɔ ansìmi Mokonga ang'a baFilipi
3 N'aye aki nenokanisa, aki nensìma Mokonga nde mamɔ. 4 Mbènɔ bhulibhu nde nɛmɛma anu benu bɔbhu, aki nɛmɛma masa na bujɛmɛ. 5 Nga ai bomotabeli a ndandisa la Mbinɔ Anja, toa la esa l'inda imoti† kida la mbènɔ nde. 6 Éma nde nelebei domi a nde bende: Mokonga, mmbe ai akɛngɛtisi nkási anja ndɔ a meema anu, aga mande nee mosá na gɔbɛlaga-li kida la esa nde Kilisitɔ Yesu† abhia mande nee. 7 A nde domi ang'ami bende aba nɛɛɔka bo a yɔnga la benu bɔbhu. Nenokóndi kpɛɛ, nga bɔlɔngani n'eme a ngɛbɛ nde Mokonga amopi, nangɛ neikɛ mbènɔ nde asub'a ngɔmɔb, na nɛyɔngɛla na sikisa la Mbinɔ Anja. 8 Ebo, neku ngomi anu kpɛɛ n'ekóndi nda Kilisitɔ Yesu, Mokonga a nde ntɔndɔlisi nde mamɔ!
9 Inde yɛu nɛmɛmi ang'a Mokonga: Ekóndani nd'anu amɔtɛ kpɛɛ, asub'a úbha la hɛlɛ na bá la na bɔɛngɛ kpɛɛ 10 nga, boúbhililɛ éma anja nde atɔlɛli kɔla-li. Nga bende, a esa nde Kilisitɔ Yesu aja mande nee, bobá mande na tambela anja, inde nto nnd'aanga anosolea au. 11 A ekanda la Yesu Kilisitɔ, Mokonga abɔngisɛ ɛkɔli nd'anu, nga tukumisa l'aɛ na bhebha l'aɛ.
Pɔlɔ andandisa Mbinɔ Anja nda Kilisitɔ
12 Badhami, inde nekóndi nte boúbhɛ a nde bende, éma nde ai amokidii, ai atabeli a ndandisa la Mbinɔ Anja. 13 Indɔ, balangi-endu a mɔamɛ mma a ɛkɔngɔ bɔbhu na bato batɔɔ bɔbhu, baúbha bende, bamonyangi nde nga nɛnkɔlɛla Kilisitɔc. 14 Nga a nde bo, a yɔnga la nyanga l'ami, adha badhami bakilisitɔ bati aye baesobeli Mokama ɛnyɛna mosá, na ang'a indɔ aye ba na mouɔ kpɛɛ a tɔmia la yɔnga nda Mokonga makanga bɔɔ.
15 Bato bimoti banabhaga Kilisitɔ na meema a boso na meema a esani. Na batɔɔ n'ibɔ banabha na maakɔ anja. 16 Bande bakɔla indɔ n'ekóndi, nga baúbha bende ne asub'a ngɔmɔ nde nde nga yɔngɛla la Mbinɔ Anja. 17 Bande batɔɔ ndɔ n'ibɔ, batɔmia yɔnga nda Kilisitɔ nde na meema a eteba, kanga na meema anja. Ibɔ, baaka bende batɔdisa nde enobɔ namɔ asub'a ngɔmɔ nde.
18 Nnd'a be yɔnga! Bonja-li a nde bende a asii-li bhulibhu, abɛ a maakɔ anja, nangɛ a maakɔ ajede, banabha Kilisitɔ. Na eme a yɔnga la indɔ, ne na bujɛmɛ. Ago nɛgɛlɛanaga mande asub'a bujɛmɛ ndɔ. 19 Nga, neúbha domi gela bende, inde ai amodhondi nde aetia mande bolamisi ami, a yɔnga la ɛmɛmi nd'anu na nga bende Meema a Yesu Kilisitɔ amotabela. 20 Nebondeaga na sei kpɛɛ na boosobela bende, nnd'alɛ nekua naa soni, iisi. Nebá gɔɛ nde na mouɔ nga, a tambela l'ami bhulibhu nɛɔngiana lɛ boumu nda Kilisitɔ, a mbènɔ nde na esa-li bhulibhu, abɛ a lenda l'ami, nangɛ a kukua l'ami.
21 Indɔ nde bende, ang'ami, lenda a nde a yɔnga la Kilisitɔ. Kukua a nde ɛmbɔ. 22 Mpa nabana aanga go nelenda a lɛɛngɔ nde, na n'aye indɔ amɔtɔisisa kɔla la nkási anja, kesi, nndaga neúbha ind'a sɔmbɔla. 23 Akáligi ang'ami sɔmbɔla la imoti angal'a ind'a ibale nde: ne na sei a ga ika la na Kilisitɔ áma imoti, nga indɔ yɛu a anja kpɛɛ. 24 Mpa a nde a yɔnga l'anu yɛu atɔlɛli nelendɛ go a lɛɛngɔ nde. 25 Nga nelebei indɔ, neúbha bende nelenda mande, neika mande na nebá mande a mpiti anu benu bɔbhu nga tabela l'anu a ga la mosá na bá la na bujɛmɛ asub'a boosobela. 26 Ang'a indɔ, n'aye mande nesiani go nɔngɔ anu, bujɛmɛ nd'anu asub'a Kilisitɔ aetia mande ati nga yɔnga l'ami.
Emani a yɔnga la Mbinɔ Anja
27 Mpa, botambɛ ye bía nde Mbinɔ Anja nda Kilisitɔ akabi nee. Bɔkɔlɛ bo, nga nangɛ na nebhii bhia lenga l'anu, aɔ go na nndaga ne be, nɛɔkɛ mande a yɔnga l'anu bende: bome hɛlɛ na meema imoti, na manela-li áma imoti a yɔnga la boosobela la Mbinɔ Anja. 28 Bootea-i bamasani l'anu. Ang'abɔ, mouɔ nd'anu ndɔ a nde mbunde la bungaga, na ang'anu a nde mbunde la bolamisi, inde Mokonga abhìsi. 29 A yɔnga la indɔ, Mokonga anopi ngɛbɛ a kɔlɛla la Kilisitɔ nkási, kanga masa a boosobela l'aɛ, mpa go na noba a yɔnga l'aɛ. 30 A nde bende, bongi a emani mambala inde ai bɔmɔɔni au mosᆠndɔ, na inde bɔɔka bende aha nemana nde.