Boti la Kilisitɔ na boodhidhisa l'aɛ
2
Mpa sinde bojuani na Kilisitɔ nde, indɔ nnd'anopa mouɔ? Ekóndi aɛ nnd'adhodeisa meema anu? Meema Mbhumani nnd'anotulisana? Nndaga bo na ekóndi na ngomi a sasana anu? 2 Mpa ìbo botumisɛ meema ami na bujɛmɛ, na bɔɔkana. Bobɛ n'ekóndi imoti, meema imoti, na maakɔ imoti. 3 Bɔkɔla-i mɛnɔ éma na meema a eteba aɔ nga bande batɔɔ banotukumisɛ, indɔ nndaga éma. Mpa gɔɛ, boedhidhisɛ nde, boodhungɛ bande batɔɔ bía bande baúbha éma tesa la benu. 4 Abá-i na nto nde akaba masa ɛmbɔ nd'aɛ iyɛ amɛnɛ, mpa akabɛ na bonja la bato batɔɔ. 5 Bobɛ na tambela bía inde Kilisitɔ Yesu ai nee.6 Iyɛ nde ai na nkani nda Mokonga,
mpa nndag'ai aɔni indɔ bía éma la bɔɛɔkɔkisa l'au, iisi.
7 Mpa gɔɛ, ab'akɔ́ma boumu nd'aɛ, ab'abɛsa nkani nda bakɔbɛ†.
Ab'aetia nto, na bato bɔbhu ai bamɔna bía nto.
8 Ab'aedhidhisa na ɔka la Mokonga kida la bhunaba a kukua, kuá antat'a mosalaba!
9 Ang'a indɔ yɛu Mokonga ab'antálisa n'egoo kpɛɛ na sɔ̀a l'aɛ ina nde anyɛni ina bhulibhu.
10 Nga gela bende, a ina a Yesu, bande ba na kobha, bande ba na dodo na bande ba n'ebholime bɔbhu babúnɛ moo-a-kuu l'abɔ†,
11 na bɔbhu baesengɛ go bende Yesu Kilisitɔ a nde Mokama a boumu la Ebha Mokonga.
Atɔlɛli bakilisitɔ bangengɛ bía sangala asub'a na lɛɛngɔ
12 Ang'a indɔ, badhami sɛ, bía nde ai bɔmɔɔka nee na neha a nsɔlɔ anu, mpa sinde nnd'aye ne na benu nde, atɔlɛli bɔmɔɔkɛ mpa go kpɛɛ. Bosuililɛ nga gɔbɛlaga la bolamisi anu na bɔkpɔkpɔma na bonsikisa Mokonga. 13 Nga a nde Mokonga yɛu agɔbɛlaga nkási ndɔ asub'a meema anu na pa l'anu ekanda la kónda na kɔla la éma nde am'bɔngɛla.
14 Bɔkɔlɛ bhulibhu makanga booania na bóaka 15 nga abá-i banosoleaga na bobɛ bana-Mokonga makanga nkiki a nsɔlɔ a bato nde baebungisaga ibɔ nganga na bato bajede kpɛɛ†. Angal'a bato ndɔ, bobɛ bía sangala nde angenga na lɛɛngɔ, 16 na bokumbɛ yɔnga la lendisa. N'aye bɔkɔla ìbo, nebá mande na bujɛmɛ a yɔnga l'anu a esa nde Kilisitɔ abhia mande nee. Nga, kesi nebá mande bía mmbe nndag'akɔli éma na noba la bosa.
17 Mpa nɛngɛbɛ batàngisɛ nsangi ami bía bɔɛmbɔ† inde bogabha a yɔnga la boesobela l'anu, indɔ amopa bujɛmɛ na nejanga na benu bɔbhu. 18 Ìbo yɛu na benu bobɛ na bujɛmɛ, na bojangɛ áma imoti n'eme.
Pɔlɔ antei Timɔtɛɔ na Epafɔlɔditɔ
19 Neesobeli Mokama Yesu bende nentea mande nɔngɔ anu Timɔtɛɔ dia, nga meema ami akɔlɔmanɛ a mbènɔ nde nɛɔka mande nee na mbinɔ anu. 20 Nndaga ne na nto matɔɔ dhɔlɔ aɛ, mmbe asùa yɔnga l'anu kpɛɛ bía eme. 21 A nde bende, bande batɔɔ bɔbhu bakaba masa ɛmbɔ nd'abɔ ibɔ nganga makanga ind'a Yesu Kilisitɔ. 22 Mpa, benu boúbha sinde Timɔtɛɔ ai aangelisi nee tambela l'aɛ anja na sinde ai abhɛdi nee nkási na eme na belabha Mbinɔ Anja bía nii n'antabela abhaɛ. 23 Ìbo yɛu, nekabi nte nenteɛ nɔngɔ anu mbusa a lenga la mbénɔ yɔnga namɔ asía mande nde iboni. 24 Neesobeli bende a ekanda la Mokama, na eme nebhia nɔngɔ anu mbènɔ-mbènɔ.
25 Mpa abɔngi ang'ami nenteɛ mbɛɛ dhami Ɛpafɔlɔditɔa nɔngɔ anu. Iyɛ a nde mbhɛdi-nkási áma imoti na eme, ago a nde m'bibia dhami. Ai bontei bhia tabela l'ami a éma nde ai ne nee bungu. 26 Ai nɛkɔli ìbo nga, ai akua sei a ɔna l'anu benu bɔbhu, na aika masa n'anoba nga ai bɔɔkí mbinɔ a jega l'aɛ. 27 Domi adhuma ajegi, sùa bende akuɛ. Mpa Mokonga ab'akua elúngu aɛ na makanga masa iyɛ, nɛngɛbɛ na eme, nga bende ngomi ami ajuluana-i. 28 Indɔ yɛu aangisi nekamisaga tea l'aɛ nɔngɔ anu. Nga, n'aye bɔmɔni go bojangɛ, na eme ngomi ami abhɔmbɔɛ. 29 Ìbo, bompikilɛ na bujɛmɛ mati asub'a Mokama. Na boosikisɛ bato bía mmbɔ, 30 nga adhuma sùa bende akuɛ a yɔnga la nkási nda Kilisitɔ. Auma aanga aekusisa a yɔnga la tabela l'ami a inde benu nndag'ai bɔtɔi.