Lenda l'a domi mosá la Mokonga
3
A sungia, badhami, bojangɛ a yɔnga la juana l'anu na Mokama. Nnd'aanga neloa andekela l'anu éma mangele a imoti nga, indɔ atɔlɛli ang'anu. 2 Bokèngemanɛi ang'a bato nde batukumisa gua la ganja ndɔ. Bato ndɔ baɛbhɔnisisa bía bamboáa, na inde bagolisa a ajede. 3 Besu yɛu gɔɛ be nde bagu-ganja niina nga, bembhebha Mokonga a Meema a Bobhu. Beetombelaga Kilisitɔ Yesu. Nndaga beesobeli sinde ngobho asu aiki nee.4 Nangɛ eme, aanga adhu neesobela yɔnga la ngobho. Mpa bato batɔɔ, nabana aanga baaka bende baesobela ngobho abɔ, nangɛ indɔ, eme yɛu mbɛɛ ɛnyɛna ibɔ kpɛɛ. 5 Eme ai negu ganja esa l'inda lalɔ mbusa a bɔtɛana l'ami. Ne nde nyia-moIsilaɛli, a endu-li nda Bɛnyamina, moEbhalania tɔtɔ́. Ai netamba a Tɔlati nda Mósa, bía moFalisayo† domi domi. 6 A yɔnga la mouɔ, ai neenobisi kpɛɛ bande banebei Yesu†. Na a yɔnga la domi nde atoa asub'a Tɔlati nda Mósa, nnd'ai na nto nde aanga amosolea au.
7 Éma ndɔ bhulibhu nde ai na ɛmbɔ ang'ami, indɔ aye nɛɔni yu nde bía bungisa la mbènɔ bosa a yɔnga la Kilisitɔ. 8 Ɛnyɛna indɔ, éma bhulibhu aye nɛɔni yu nde bía bungisa la mbènɔ bosa, a yɔnga la sei nde a anja kpɛɛ, úbha la Kilisitɔ Yesu Mokama nde mamɔ. A yɔnga l'aɛ, nelebei bungisa la éma ndɔ bhulibhu, na aye nɛɔni indɔ bhulibhu nde bía ɛgbɛlɛ, nga nɛn'dɔ̀ɛ Kilisitɔ, 9 na juana la n'iyɛ domi-domi. Nndaga nekaba bende domi l'ami abɛ nde inde atoa asub'a Tɔlati. Abɛ gɔɛ nde inde atoa a yɔnga la boosobela la Kilisitɔ†, domi nde atoi nɔngɔ a Mokonga, inde aepa bande banebei. 10 Inde nekóndi a nde bende nemúbhɛ Kilisitɔ na ekanda la jujua l'aɛ a kukua, na nenobɛ sinde n'iyɛ ai anobi nee, a nde bende kènga l'aɛ kida l'a kukua. 11 Na neesobeli bende na eme nejujua lɛ angal'a bàku.
Ga la mbangɔ na kida la sungia la tamba
12 Nndaga negii bende aye nɛdɔ̀i, aɔ go bende aye nɛmɔti a meema. Mpa nebubila gɔɛ nde a dɔ̀a la bɔɛmbɔ, nga Yesu Kilisitɔ aye amɔdɔ̀i aɛ. 13 Badhami, n'eme nnda neaki bende aye nɛdɔ̀i éma ndɔ. Mpa, éma imoti nde nɛkɔla a nde: bosela la éma nde a mbusa ami, na suilila la kaba la inde a mosá. 14 Ang'a indɔ, nekamanaga a yɔnga la bende nekidɛ a sungia, nga nɛdɔ̀ɛ bɔɛmbɔ nde Mokonga amokogei toa la na kobha ang'a Kilisitɔ Yesu.
15 Besu bande aye bɛmɔti a meema, bebɛ na maakɔ nde. Na nabana bo na maakɔ atɔɔ a yɔnga imoti bende, Mokonga anoangia mande na indɔ n'iyu hɛlɛ. 16 Nangɛ abɛ boni, atɔlɛli áma nde aye bekidili nde, betambɛ a asii moti.
17 Badhami, benu bokèngelɛgɛi tambela l'ami. Boolengɛi bato nde tambela l'abɔ akèngani na ind'asu. 18 Nga, aye nenongodei yɔnga nde nkobà ati, na mbènɔ nde go nesilii anu yu na negáma: bato bati baetii bía banjiu a mosalaba nda Kilisitɔ a tambela l'abɔ. 19 A sungia, babungaga mande. Nga, bhul'a éma nde batukumisa a nde inde ngobho abɔ akua sei. Baebhebhela éma nde aanga adhu aekusisa soni†. Na maakɔ abɔ a masa a éma nda na lɛɛngɔ oni. 20 Mpa besu gɔɛ, nɔngɔ asu a nde na kobha. Bebondeaga na sei kida la Namisi nde masu, Mokama Yesu Kilisitɔ, mmbe atoa mande we. 21 Iyɛ, atia mande ngobho asu nda soni nde, nga atiɛ yu bía ngobho aɛ nda boumu. A na ekanda la kɔla la indɔ nga a na bokama la bhísa la éma bhulibhu a kusi a ego l'aɛ.