4
Ang'a indɔ, badhami, benu nde nenokóndi, ne na sei a ɔna l'anu kpɛɛ. Ne na bujɛmɛ ang'anu, nga bo nde bɔɛmbɔ a tɛmba nde alɛ nɛdɔ̀a. Ìbo yu ndɔ badhami bakóndaga nde bamɔ, bomɛ hɛlɛ na bojuanɛ na Mokama.Maanɔ ntuantua
2 Alɔmi Ɛɔdia neogámeligi, na owɛ alɔmi Sitikɛ neogámeligi: bobɛ na maakɔ imoti asub'a Mokama. 3 Na owɛ, dhami a domi owɛ nde ɔbhɛda nkási hɛlɛ na eme, oetabelɛ bake nde. Nndag'a bosa, ai baenobisi a nkási a tandisa la Mbinɔ Anja áma imoti na eme na Kɛlɛmá, na bato a nkási badhami batɔɔ, bande ina abɔ baandeki asub'a ketabo a lenda la mɛyɔ†.
4 Bobɛ na bujɛmɛ ang'a Mokama esa-li bhulibhu, nesilii go nte bobɛ na bujɛmɛ!
5 Bɔwɛdɛ anu aúbhiananɛ na bato-li bɔbhu. Mokama aye a bhi. 6 Boonobisa-i† mɛnɔ, mpa a éma-li bhulibhu, boangelisɛ Mokonga inde bo nee sei, asub'a ɛmɛmi, gámelaga na sìma. 7 Na bɔkɔlɔ nda Mokonga, inde atesi bɔɛngɛ-li bhulibhu, alanga mande meema anu na maakɔ anu asub'a Kilisitɔ Yesu.
8 Mpa, badhami, a sungia, bobhísɛ maakɔ anu a éma bhulibhu nde abɔngi, n'a inde asikisa, n'a inde a nde domi, n'a inde nnd'a na bujede, n'a inde abɔngɛlaga, n'a inde a na ebhebhɔ anja, n'a inde atɔlɛli songa-li, n'a inde atɔlɛli sìma-li. 9 Bɔkɔlɛ éma-li bhulibhu nde ai nenopi na golisaga l'anu, inde ai bɔɔkí na nɛyɔnga, na ɔna la sinde nɛkɔla nee. Na Mokonga Amɛnɛ a bɔkɔlɔ abá na benu.
Pɔlɔ aesìmi baFilipi a yɔnga la ɛmbɔ nde ai bankɛbɛi
10 Auma nejangi kpɛɛ ang'a Mokama, nga a sungia boangelisi go bende boha na sei ami. Domi ai bo na sei ndɔ, mpa nndaga boi na mbènɔ a kɔla-li. 11 Nndaga nɛyɔngi indɔ nde nga ne na bungu! Iisi, negoli jangea la inde ne nee. 12 Neúbha lenda la asub'a buyɛnɛ ago neúbha na lenda la asub'a mɛkɛnɛ. Esa-li bhulibhu na mpuɔ-li bhulibhu negoli ekuta na kuá la nja, bá l'asuba a mɛkɛnɛ na bá la asub'a bungu. 13 Aanga nɛtɔa éma-li bhulibhu a nyɛnɛla la Kilisitɔ mmbe amopa ekanda. 14 Nangɛ aba bo, ai bosingani kpɛɛ gámisa l'ami asub'a enobɔ namɔ.
15 Boúbha hɛlɛ, benu baFilipi bende, mbènɔ nde netoi nee Makedonia, a elemɔ nde ai nɛkɛngɛtisi nee labha la Mbinɔ Anja, nnd'ai be kanisà atɔɔ nde ai amotabeli. A masa ind'anu yɛu ai na eme a mbènɔ a dɔ̀a l'ami na a mbènɔ a bungisa l'ami. 16 Ago mbènɔ nde ai na neha Tɛsalɔnika, ai bɔmɔkɛbɛaga inde ai ne nee bungu†. 17 Nndaga nekaba nte bɔmɔkɔ̀mɛɛgɛ! Inde nekaba a gɔɛ nde bende ɛmbɔ a nkási nd'anu abiɛ anu. 18 Éma-li bhulibhu amokidii, n'iyu aye ati. Epafɔlɔditɔ aye amokidisili éma nde ai atoi nɔngɔ anu ndɔ. Nkɛbɛa nd'anu a nde bía sù a nkoki a bɔɛmbɔ nde Mokonga alebei na am'bɔngɛli†. 19 Mokonga nde mamɔ anopa mande éma bhulibhu nde bo na sei-li sunga na boumu a botondi nd'aɛ ang'a Kilisitɔ Yesu. 20 Bembhebhɛ Mokonga Abhasu a mɛyɔ na mɛyɔ! Abɛ bo.
Mɔkɔ̀ nda sungia
21 Booseseɛ bato nde ba Mokonga bɔbhu, bande banebei Kilisitɔ Yesu. Badhami nde ne na ibɔ ani banosesei. 22 Bakilisitɔ-li bɔbhu banosesei. Kpɛɛ mbɛɛ bande babhɛda nkási nɔngɔ a mɔamɛ mati Kaisali, banosesei kpɛɛ.
23 Boangɔ nda Mokama Yesu Kilisitɔ abɛ na benu.