baKɔlɔsai
Moo a yɔnga
Ntetei Pɔlɔ yɛu ai aandeki baloa nda baKɔlɔsai nde (1.1). Ai aandeki yu n'a asub'a ngɔmɔ a bɔma nda Lɔma. A nde bía ai aandeki yu nde a elemɔ 60 mbusa a bɔtɛana la Yesu Kilisitɔ. Baloa nde na ind'atɔɔ nda baƐfɛsɔ na Filɛmɔnɔ aki bakoga yu nde bate, baloa nda asub'a ngɔmɔ nga, Pɔlɔ ai aandeki yu nde n'a asub'a ngɔmɔ. Ai aeandekei baloa nde nde baKɔlɔsai. Iyɛ yɛu nndag'ai akɛngɛtisi kanisà nda Kɔlɔsai sinde hale l'inda 2.1 ayɔngi nee ndɔ, mpa a nde bía ai aɔni bende a na nkási nde aanga akɔla a kanisà nde. Kosà Epafala yɛu ai akɛngɛtisi kanisà-li nga, iyɛ ai nde nyia-Kɔlɔsai.
Pɔlɔ ai akóndi úbhisa la bàlebei bende, babelea-i mɛnɔ bolabhɛ nda bàgolisi a mbéa, bande ai baóbeli a kanisà nda Kɔlɔsai. A nde bía ai we boio a baYuda nde ai baetii bakilisitɔ, bandɔ ai bakaba sɔ́a la bakilisitɔ la bande batɔɔ bende babeleɛ nkani nda koYuda nde ai asub'a Nsaeɔ nda Kala, kpɛɛ mbɛɛ yɔnga la ɔnisa la bato ganja. Indɔ yɛu ai aangisi aengodea bende Kilisitɔ a antat'a éma-li bhulibhu nda na lɛɛngɔ, na kobha nangɛ bato, bamalaeka na baketi. Pɔlɔ ai aekanisisi bàlebei nde ba Kɔlɔsai bende, bolamisi a domi a nde inde Mokonga asopi ang'a Kilisitɔ. Lenda la asub'a juana la na Kilisitɔ yɛu asopi bɔɛkɛtɛla la bolamisi.
Buanaga la baloa
Baloa nde abuanigi nde a hale ini:
Nseseɔ nda Pɔlɔ ang'a bàlebei nde ba Kɔlɔsai (1.1-2)
Pɔlɔ aúbhisi botì la Kilisitɔ a manisa la egolisi a mbéa (1:3-3:4)
Lenda la mbènɔ-mbènɔ asub'a Kilisitɔ (3:5-4:6)
Mɔkɔ̀ nda sungiaga (4:7-18).