Baloa l'inda imoti inde Pɔlɔ aeandekei
BaTɛsalɔnika
Kɛngɛtisa
Baloa l'inda imoti inde nkɔbɛ Pɔlɔ aeandekei Batɛsalɔnika: (1. 1). Na ab'agesa iyu nga abɛ adha hale a Bibilia, na ai a elemɔ a ekomi itanɔ na imoti (51) mbusa a bɔtɛana la Yesu Kilisitɔ. Ai aandeki baloa l'inda imoti a kanisà nda Tɛsalɔnika na ba a mpuɔ imoti na Sila bona Timɔtɛɔ na baiki Kolinto a ɛkɔngɔ nda Makedonia a mbènɔ a tamba nd'aɛ nda ibale a labha la Mbinɔ Anja nda Yesu (Ɛkɔli 17: 1-9). Inde ai baandeki a ketabo nda Ɛkɔli bende kanisà ai akɛngɛtisi na bàlebei bande ai ba na nkani nda BaYuda, na inda BaGiliki.
Pɔlɔ asub'a Tɛsalɔnika nnd'ai agɔbi esa enda makanga kɛngɛtisa la kanisà ndɔ, ɔna la noba mati inde ai n'aye a kɛngɛtisa ang'a bàlebei, Pɔlɔ ab'aeandekea bàlebei ndɔ na ɔngia na l'abɔ yɔnga atì a sinde bakilisitɔ aanga balenda nee. Ai ndɔ, Pɔlɔ ab'aɛɔngiana sinde Kilisitɔ asiana nee, nga bakilisitɔ nde ba kanisà ndɔ ai bakaba lengisa la mbènɔ. Pɔlɔ ai atɔmia mbènɔ ndɔ nga bende bhia la Kilisitɔ a nkobà ibale a lenda la bende bajangisɛ Mokonga (5: 6-8).
Mbusa mbènɔ ɛdɛ mosá la toa la Tɛsalɔnika, Pɔlɔ ab'antea Timɔtɛɔ nga aɔkɛ adha mbinɔ nda bàlebei nde ba we. Mbènɔ nde Timɔtɛɔ asiani nee nɔngɔ Pɔlɔ, Pɔlɔ ab'adhodea meema aɛ kpɛɛ a yɔnga nde aɔki. Mbusa-li ab'akɛbɛa baloa a bhebha l'abɔ na dhodeisa la meema a bàlebei nde ba Tɛsalɔnika.