4
Na benu bakama, bɔɔkɔlɛlɛ bakɔbɛ nde banu bonja na a domi, nga na benu boúbha gela bende bona Mokama nde manu na kobha.Maanɔ
2 Aba bɔmɛma esa-li bhuu, na a mɛma bokèngemanɛ a bhebha la Mokonga. 3 Na besu, bɔmɛmɛ asu, nga Mokonga aukuɛ asu asii a labha la yɔnga nd'aɛ na tɔmia mbinɔ nda Kilisitɔ inde ai n'aye basɔmɛi kia atì. Nga indɔ yɛu aangisi ne asub'a ngɔmɔ. 4 Ang'a indɔ, bɔmɛmɛ ami nga nelabhɛ kilikili Mbinɔ nd'aɛ sinde aanga nɛtɔisa ndende nee.
5 Mbènɔ bhulibhu nde bobá bimoti na bato nde banebei-mbɛ Yesu, bɔɔngiɛ bɔɛngɛ a tambela l'anu. 6 Na yɔnga l'anu abɛ anja esa-li bhulibhu, ajɔgɛ bìa nkuá, nga bende oúbhɛ sinde onsisila kela nto a bonja.
Yɔnga la sungia
7 Tikikɔ, ntika asu nkóndaga mmbe nde nkɔbɛ manja a nkási nda Mokama, iyɛ yɛu a anopa mbinɔ ami bhuu. 8 Nentei nɔngɔ anu, nga anongodeɛ sinde bega aande mosá na dhodeisa la meema anu. 9 Abhia áma imoti na Ɔnɛsimɔ, ntika asu nkóndaga manja, mmbe nde nto nde ma nɔngɔ anu. Banongodea bhulibhu nde anyɛna nɔngɔ asu ani.
10 Alisitalikɔ, mmbe a áma imoti n'eme a ngɔmɔ, anosesei. Malekɔ n'iyɛ muna-nto baɛ na Balanaba anosesei. Aye bona mbinɔ atì a yɔnga l'aɛ. Mbènɔ nde abhia nɔngɔ anu, bonseseɛ hɛlɛ. 11 Yesu nde aki bankoga bate Yusitɔ, anosesei. Angal'a baYuda nde banebei Yesu Kilisitɔ, bande basalɔ nde yɛu bakɔla nkási a ɛbɔamɛ nda Mokonga áma imoti n'eme. N'ibɔ badhodea meema kpɛɛ.
12 Epafala, nto nde ma nɔngɔ anu, anosesei. N'iyɛ nde nkɔbɛ nde ma Yesu Kilisitɔ, mmbe nndaga adu mɛma la kpɛɛ Mokonga ang'a benu, nga bokalɛ a boosobela l'anu, na nga bɔmɔtɛ asub'a meema a bhulibhu nde atɔlɛli ang'a Mokonga. 13 Nɛntɔndɔlisa Epafala bende, abhɛda nkási kpɛɛ ang'anu na ang'a bato nde bá Laɔdikia na Nɛapɔli. 14 Luka, namisi nkóndaga na Dɛma, banosesei.
15 Booseseɛ batika asu nde bá Laɔdikia, Nimufa na Kanisà nde aki batulana asub'a endu aɛ. 16 Mbusa a sɔma la baloa ndɔ, bɔkɛbɛɛ iyu asub'a Kanisà nda Laɔdikia nga n'ibɔ basɔmɛ yu. Na bɔsɔma ndende baloa nde atoi naa Laɔdikia. 17 Bongodeɛ Alakipɔ bende: «Agɛ masa mosá na nkási nde Mokama amoi, na agɔbɛ yu. »
18 Eme amɛnɛ Pɔlɔ yɛu neandeki sesea nde na njaga ami. Bobosela-i gela bende ne asub'a ngɔmɔ. Boangɔ nda Mokonga abɛ na benu.