3
Mpa sinde bojujui nee áma imoti na Kilisitɔ, bokabɛi inde a n'egoo, áma nde Kilisitɔ aiki a njaga nd'akpɛ nda Mokonga. 2 Boakɛ a inde a n'egoo, makanga a inde a na lɛɛngɔ. 3 Nga boku, mpa lenda l'anu aɛsɔmɛni áma imoti na Kilisitɔ asuba Mokonga. 4 Mbènɔ nde Kilisitɔ, mmbe a na lenda, aóbela mande nee, iwa yɛu na benu boóbela mande áma imoti n'iyɛ asub'a boumu nd'aɛ.Lenda nda kala na inda mbènɔ-mbènɔ
5 Ang'a indɔ, bɔɔlɛ inde a nde inda lɛɛngɔ asub'anu: Bosalati, bujede, kɛnɛaga la éma, maakɔ ajede na kónda la eléa, indɔ yɛu a nde ebhebhɔ a baesòmba. 6 A nde ang'a indɔ yɛu mokpata nda Mokonga akida mande. 7 Na benu kàla, ai botamba asub'a yɔnga ndɔ, mbènɔ nde lenda l'anu ai asub'a ilɔlɔ.
8 Mpa ndiende, botosɛ inde bhulibhu: bosunulɔ, ja la na bokpɛ, bujede. Naa ɛɔti imoti atoa i a nyɔɔ anu. 9 Bodhemana i, nga aye botoi ang'a nto nde ai bo ang'aɛ kala na nkani nd'aɛ. 10 Mpa na benu aye bɔnɔli nto matɔɔ nde maa mbènɔ-mbènɔ, mmbe aetii maa mbènɔ-mbènɔ nga abɛ bía mmbe ai antɛlɛkisi. 11 Iani nnda ani moGiliki na moYuda, mmbe aye aɔni ganja na mmbe aɔni-mbɛ, bagɛndɔ, bande bakodi iso, bakɔbɛ na bande nndaga bakɔbɛ, mpa Kilisitɔ yɛu a nde bhulibhu asub'a bhulibhu.
12 Mpa nga Mokonga aye anɔsɔmbɔli na anokóndi, bootii adha bato nde ba Mokonga. Bobɛ na meema a lilia, meema a bookikisa, bobɛ bawɛdɛ na bobubila. 13 Bobubilanɛ na lilia la nto n'aye a na molakɔ ang'a dhaɛ. Bolilianɛ sinde Mokama ai anolilii nee. 14 Mpa mosá la éma li bhulibhu, bɔlɔlɛ ekóndi, inde yɛu aangisa mande na bojuani. 15 Bɔkɔlɔ nda Kilisitɔ aikɛ asub'anu, a nde bɔkɔlɔ ndɔ yɛu bagesi ang'anu bía ngobho moti. Ago bobɛ bato a sìma. 16 Yɔnga nda Kilisitɔ aikɛ asub'anu na botì, na bogolisana na hanana na bɔɛngɛ li bhulibhu, na bonembela Mokonga lembɔ na bonsega na ebhebhɔ asub'a meema anu. 17 Bhulibhu inde aanga bɔyɔnga na kɔla, bɔkɔlɛ a ina a Mokama Yesu, na bonsìma Mokonga Ebha ang'aɛ.
Sinde bato aanga balenda nee asub'a mbaa
18 Benu bake, boosikisɛ bamuny'anu, sinde atɔlɛli nee asub'a Mokama.
19 Benu baboo, bookóndɛ bake banu, na bobá i na bokpɛkpɛ ang'abɔ.
20 Benu baní, boosikisɛ babɔti anu asuba yɔnga li bhulibhu, nga indɔ yɛu am'bɔngɛla Mokama.
21 Benu baebha, boobhóma i baan'anu, babhia i nga babhia i batena meema.
22 Benu bakɔbɛ, boosikisɛ baomi nde banu bande ba na lɛɛngɔ asub'a yɔnga li bhulibhu. Bɔkɔla i íbo n'aye nga banɔɔna, aɔ a nkabɔ a bende banokóndɛ,mpa gɔɛ na bona bɔɔ la Mokama. 23 Bhulibhu nde bɔkɔla, bɔkɔlɛ na meema bía bande babhɛda nkási nda Mokama, kanga inda bato. 24 Nga boúbha bende bɔdɔ̀a mande moando nd'anu nde toa la ang'a Mokama bía ɛmbɔ 25 Nto na nto nde akɔla bujede, banéa mande sinde bujede nd'aɛ a nee, nga Mokonga nnda mmbe ankóndi nyɛna la badhaɛ.