2
Nekabi nte boúbhɛ gela bende nɛbhɛda nkási kpɛɛ ang'anu, na ang'a bato nde bá nji nda Laɔdikia, na ang'a bato-li bɔbhu nde bamɔɔni-mbɛ mɛnɔ. 2 Nekóndi bende meema abɔ abɛ n'atumi na mouɔ, na bobɛ áma imoti asub'a ekóndani. Na bobɛ na úbha bhulibhu nga aɛɔngianɛ domi. Ang'a indɔ yɛu baúbha yɔnga la Mokonga nde basɔmɛi, na a nde úbha la Kilisitɔ iyɛ nganga. 3 Nga, ang'a iyɛ yɛu aɛsɔmɛni bɔɛngɛ na úbha. 4 Nenoandekei indɔ nde nga, nto a ano dhema-i nangɛbɛ a nde inde anɔbɔngɛlaga. 5 Nga, nangɛbɛ nndaga ne na benu a ngobho, mpa ne na benu gɔɛ nde a meema. Ne na bujɛmɛ a ɔna la bimoti l'anu na sinde bomesi nee boosobela l'anu ang'a Kilisitɔ.Kilisitɔ a nde tina a lenda
6 Nga, bolebei Kilisitɔ Yesu bende a nde Mokama, bolendɛ a lɔngana n'iyɛ. 7 Bolendɛ domi asub'a aɛ, na bɔmɔtɛ masa a boosobela l'anu ang'a aɛ sinde ai banogolisi nee. Na ago, bobɛ bato nde bansima Mokonga esa-li bhulibhu.
8 Bokèngemanɛ, abá-i beli nto nde a anodhema a yɔnga la maɛnɛkɔ, na nndaga atɔlɛli. Nga, yɔnga mambala indɔ atoa masa a nkani nda bato, na a bujede nde atoa a bokama nda na lɛɛngɔ nde, na nndaga atoi nɔngɔ Kilisitɔ. 9 Nga, éma-li bhulibhu nde asub'a Mokonga, n'iyu aɔnɛani ang'a Kilisitɔ a ngobho a koto. 10 Na a lɔngana na Kilisitɔ, na benu bopati inde atɔlɛli ang'anu. Iyɛ nde a na ekanda a kela nto nde a na bokama-li bhulibhu na ja la na bokama.
11 A mbènɔ nde bɔlɔngani na Kilisitɔ, botosi ngobho a koto inda ilɔlɔ, na a nde bìa bogu nde ganja ang'a Kilisitɔ. Nndaga nde gua la ganja la bato, mpa gɔɛ ganja nda Kilisitɔ na tosa l'asu a ekanda la ilɔlɔ inde ngobho ai akɔla. 12 A Mbènɔ nde banondiisi nee, banoumbi áma imoti na Kilisitɔ. Aba bojujua ang'a la bàku áma imoti n'iyɛ a sinde bobhísi boosobela l'anu a ekanda la Mokonga, mmbe ajujusi Kilisitɔ ang'a la bàku. 13 Kala, na benu boi nde bàku asub'a meema nga yɔnga la bujede nd'anu, ago boi nde bìa bande nndaga nde bàku ganja a ngobho anu nda ilɔlɔ. Mpa, Mokonga anopi lenda la mɛyɔ áma imoti na Kilisitɔ na ab'asolilia ilɔlɔ nd'asu bhulibhu. 14 Nga Tɔlati ai asonyanga, Mokonga ab'anyɔaga baloa nde ai basochoela a nyɛnɛla ang'a Yesu kulia l'asu a mosalaba. Nabana ai a limisi moandekɔ la moonda nde ai asochoela, ab'atosa iyu domi-domi na bɛtɛlaga-li antata mosalaba. 15 A nyɛnɛla la a mosalaba, Yesu ab'agɔba ekanda la basɔndɔlisi na bande bá na bokama bhulibhu ab'aebhia nee a meeme a bato bìa bato a ngolí mbusa Kilisitɔ kua la antata mosalaba.
16 Ang'a indɔ, ab'ai nto nde anolamola nee a yɔnga la eléa na noa aɔ a yɔnga la dinyɛ aɔ anjenja la mɔsɛla, aɔ a esa la sabato. 17 Éma ndɔ bhulibhu, a nde elimelime a inde alɛ abhia, mpa éma ndɔ a domi a nde Kilisitɔ. 18 Bolebea-i ɔnisa l'anu mokpata na nto nde a na ɛkɔli nd'aɛ nda na ntanga na inda bhebha la malaeka, na babhísi meema abɔ kpɛɛ a njei nd'abɔ. Úbha nd'abɔ abhii nde a maakɔ abɔ na aba bajangea indɔ, mpa a domi nndaga batɔlɛli au. 19 Bato nndaga bajuani na Kilisitɔ, mmbe nde moo a ngobho. Nga, ang'a Kilisitɔ yɛu ngobho na nsisa-li ajuani áma imoti na ab'amɔta sinde atɔlɛli nee ang'a Mokonga.
Lenda na kua áma imoti na Kilisitɔ
20 Mbènɔ nde boku áma imoti na Kilisitɔ, na ìbo yɛu boku a bujede a bokama nda na lɛɛngɔ. Nga emasina go yɛu bolenda bìa bato nde bá lɛɛngɔ ndɔ? Bolebea-i sikisa la Tɔlati mambala indɔ: 21 «Bɔbɛsa-i inde!», «Bokengea-i!», « Bɔbhɛdia-i!» 22 Indɔ bhulibhu nga nde Tɔlati na egolisi nda bato, a mbènɔ ɛdɛ akɔlɛ ye nkási ab'aujuana. 23 A nde domi, éma mambala indɔ aanga bá na bɔɛngɛ a iso a bato, nga babelea esomba nde ibɔ bamɛnɛ babhísi, boodhidhisa la inda na ntanga na tambisa la ngobho abɔ a bokpɛ. Mpa, maanɔ ndɔ nnd'aanga akɔmisa kɔla la inde ngobho akabi te akɔlɛ yu.