baKɔlɔsai
Nseseɔ
1
Eme Pɔlɔ, ntetei nde ma Kilisitɔ Yesu sinde Mokonga akóndi nee, yɛu neandeki baloa nde áma imoti na dh'asu Timɔtɛɔ.2 Baloa nde, benoandekei nde benu bato nde ba Mokonga nde boiki Kɔlɔsai, benu badh'asu nde bɔlɔngani na Kilisitɔ domi. Abhasu Mokonga anopɛ boangɔ na bɔkɔlɔ.
Pɔlɔ ansìmi Mokonga a yɔnga la baKɔlɔsai
3 Bensìma Mokonga, Abha-Mokama nde masu Yesu Kilisitɔ, mbènɔ bhulibhu nde bɛmɛma a yɔnga l'anu. 4 A nde bende, aye bɛɔki mbinɔ a boosobela nd'anu ang'a Kilisitɔ Yesu, na ekóndi nde bo nee ang'a bato nde ba Mokonga bɔbhu. 5 Tine a ekóndi ndɔ, a nde boosobela nde bo nee a éma nde Mokonga abɔngisi anu na kobha. Ai boúbhi bɔɛkɛtɛla ndɔ mbénɔ nde banɔtɔmili yɔnga la domi, n'a nde Mbinɔ Anja nda Mokonga†. 6 Mbinɔ Anja nde ai akidi nɔngɔ anu ndɔ, andandi a lɛɛngɔ-li bhulibhu, ab'alɛmbisa mbùa. Mbènɔ nde bɔɔkí na mbinɔ a boangɔ nda Mokonga, ai bɔɔkí yu sinde a nee domi. Mpa, aye botamba bía nde Mokonga akóndi nee na etangi a bato nde balebea yu aga n'abía nɔngɔ anu. 7 Mbinɔ Anja ndɔ, nkóndaga na dh'asu nkɔbɛ Epafala yɛu ai anogolisi yu. Iyɛ, a nde nkɔbɛ nde ma Kilisitɔ a domi. 8 Iyɛ yɛu asongodei go mbinɔ a ekóndi nde Meema a Bobhu ai anopi.
9 Ang'a indɔ yɛu, toa la esa nde bɛɔki na mbinɔ anu, nnda bedu mɛma la Mokonga a yɔnga l'anu. Bɛmmɛma nga bende, anoúbhisɛ inde akóndi na pa l'anu bɔɛngɛ na maɛnɛkɔ nde atoa ang'a Meema a Bobhu. 10 Ang'a indɔ, bolenda mande sinde Mokonga akóndi na kɔla la éma nde am'bɔngɛla Mokama. Bɔkɔla mande ɛkɔli ntuantua anja na úbha la Mokonga hɛlɛ kpɛɛ. 11 Mokonga anopɛ ekanda bhuu, meema a kinia la éma na meema a bubila. 12 Bonsìmɛi Ebha Mokonga, mmbe anopi ekanda la ja la na moando a éma nde aebhísii bato nde nnda ba na bujede a ɛbɔamɛ nd'aɛ nda bobhu. 13 Iyɛ yɛu asokodigi a ekanda la dhoda†, ab'asongisa a ɛbɔamɛ nda Naɛ nkóndaga. 14 Tesela la ang'a Kilisitɔ yɛu nde Mokonga asolamisi na gɛgia la ilɔlɔ nd'asu† nde.
Kilisitɔ na ɛkɔli nd'aɛ
15 Kilisitɔ a nde elimelime a Mokonga, mmbe nnd'aɔnɛana. Iyɛ a nde ngula, anyɛni éma bhuu nde Mokonga ai atɛlɛkisi†. 16 Nga, a tesela l'aɛ yɛu Mokonga atɛlɛkisi éma bhulibhu nde a na kobha, na inde a na dodo, inde baɔna na inde nnda baɔna, ekanda na baketi nde ba na bokama†. Indɔ bhuu, Mokonga atɛlɛkisi tesela l'aɛ na a yɔnga l'aɛ. 17 Ai alendi mosá la éma bhulibhu, na éma bhulibhu a beli a yɔnga l'aɛ. 18 Kanisà a nde ngobho a Kilisitɔ, iyɛ yɛu a nde moo a kanisà-li. Ago a nde kɛngɛtisa a éma bhulibhu. A nde ngula, mmbe ai ajujui mosá-mosá a nsɔlɔ a bàku nga bende, iyɛ nganga abɛ antat'a éma bhulibhu. 19 Nga, Mokonga iyɛ nganga ai akóndi bende koto l'aɛ bhulan'aɛ aɔnɛanɛ ang'a Naɛ. 20 Tesela la Naɛ yɛu Mokonga ai alɔnganisi éma bhulibhu nda na lɛɛngɔ n'iyɛ. Mbènɔ nde Kilisitɔ adui na nsangi aɛ a mosalaba†, mpa Mokonga ab'asikisa bɔkɔlɔ a nsɔlɔ aɛ na éma bhulibhu nde ai atɛlɛkisi, inde a na dodo na inde a na dodo†.
21 Kala, na benu boi dhɔlɔ na Mokonga, na boi banjiu aɛ a yɔnga la maakɔ anu na tambela l'anu ajede. 22 Mbènɔ nde mpa, Mokonga anɔlɔnganisi n'iyɛ a yɔnga la kukua la Naɛ mmbe ai anobi a ngobho aɛ la koto nga bende, anokidisɛ mosá l'aɛ, bambhumani, makanga éma nde aanga banosolea au. 23 Mpa, atɔlɛli bosùililɛ boosobela, bodhodeɛ meema kanga doa la bɔɛkɛtɛla nde ai bɔdɔ̀i mbènɔ nde ai bɔɔkí Mbinɔ Anja. Eme Pɔlɔ, ne nde nkɔbɛ a tɔmiaga-li a lɛɛngɔ bhulibhu.
Ɛkɔli nda Pɔlɔ asub'a kanisà
24 Mpa, mbènɔ nde, ne na bujɛmɛ a enobɔ nde ne au a yɔnga l'anu. A nde bende, a ngobho ami ne asub'a enobɔ nde Kilisitɔ ai asubi a yɔnga la ngobho aɛ, inde a nde kanisà†. 25 Eme aye neetii nkɔbɛ nde ma kanisà sinde Mokonga amobhísi nee ang'anu bende, nɛnɔtɔmilɛgɛ yɔnga nd'aɛ. 26 Yɔnga ndɔ yɛu a nde éma nde ai aɛsɔmɛni ang'a bato bɔbhu toa la kala mɛnɔ. Mbènɔ nde mpa yɛu, aɔngiani ye yu hɛlɛ ang'a bato nde baɛ.
27 A yɔnga nde Mokonga akóndi ɔngiana la bato ndɔ hɛlɛ, sinde esomba ndɔ a nee mati n'a na boumu nde aekidii bato nde nndaga baYuda. Na indɔ a nde bende, Kilisitɔ aiki a meema anu, mpa bobá na bɔɛkɛtɛla a ika la áma imoti n'iyɛ áma boumu nda Mokonga. 28 Besu, bɛɛtɔmilaga bato bɔbhu, yɔnga la Kilisitɔ. Beehana na golisa la bato bɔbhu na bɔɛngɛ bhuu nga bende, bembhiɛ na kela nto mosá la Mokonga nga amɔtɛ a meema asub'a juanisa l'abɔ na Kilisitɔ. 29 Ang'a indɔ yɛu nde nɛkɔla nkási na mana a ekanda nde Kilisitɔ amopa.