Baloa l'inda imoti inde Pɔlɔ aeandekei
BaTɛsalɔnika
Nseseɔ
1
Eme Pɔlɔ, Sila na Timɔtɛɔ besesei Kanisà nda Tɛsalɔnika, bato nde ba Mokonga Ebha, na Mokama Yesu Kilisitɔ.Bobɛ na boangɔ na bɔkɔlɔ.
Batɛsalɔnika bambhebha Mokonga
2 Bembhebha Mokonga esa-li bhulibhu a yɔnga l'anu benu bɔbhu na beaka ang'anu asub'a ɛmɛmi nd'asu makanga loa. 3 Mpa, benokanisa a yɔnga la nkási nde boosobela nd'anu akɔla mosá la Abhasu Mokonga, na a nkási a ekóndi nd'anu na a bɔɛkɛtɛla niina nd'anu ang'a Mokama nde masu Yesu Kilisitɔ. 4 Badhami, beúbha gela bende, Mokonga ai anokóndi na ai anɔsɔmbɔli nga, bobɛ bato nde baɛ. 5 Nga, mbènɔ nde ai bɛnɔtɔmili Mbinɔ Anja, nndag'ai yɔngaga bosa. Mpa ai gɔɛ nde a ekanda na a botabeli a Meema Mbhumani, na ai bebhísi meema asu au bende, a nde domi. Boúbha sinde ai betambi nee a meeme anu, na ai anja ang'anu. 6 Na benu, ai bobelei tambela nd'asu nd'anja na inda Mokama. Nangɛ sinde ai bo nee asub'a enobɔ mati ndɔ, ai bolebei Mbinɔ Anja, a bujɛmɛ la Meema Mbhumani. 7 Ìbo yɛu, boangelisi tambela anja ang'a bàlebei bɔbhu nde ba Makedonia na Akaya. 8 A nde bende, a yɔnga l'anu yɛu aangisi yɔnga nda Mokama andanda toa la nɔngɔ anu kida la Makedonia na a Akaya. Mpa gɔɛ, baúbha a lɛɛngɔ-li bhulibhu bende bonebei Mokonga. Ìbo ndɔ, nnd'aye be na yɔnga atì nda ngodea la bato. 9 Bato-li aba batɔmiaga sinde ai bosopikili nee nɔngɔ anu na sinde ai bootiili nee ang'a Mokonga. Aba boedoa baesòmba na kɔlɛla la Mokonga nde aha aɔnɛa na domi. 10 Mpa, bom'bondelaga Naɛ Yesu toa la na kobha, mmbe Mokonga ai anjujusi angal'a bàku. Na iyɛ yɛu asotosi a mokpata nda Mokonga inde a bhi.