Nkási nde Pɔlɔ akɔli naa Tɛsalɔnika
2
Badhasu, benu bamɛnɛ boúbha bende bhia l'asu nɔngɔ anu, nndag'ai nda bosa. 2 Boúbha bende, mosá la kida l'asu nɔngɔ anu, ai basonobisa na ɔtaga l'asu a bɔma Filipi. Nangɛbɛ bato ai bakabaga kɔ́misa l'asu, Mokonga ab'ai asopa mouɔ a yɔnga la Mbinɔ Anja nd'aɛ. 3 Nga, bolabhɛ nd'asu nndag'ai au mbéa, aɔ meema ajede, aɔ kaba la dhema la nto, iisi. 4 Mpa, bɛyɔnga sinde Mokonga akóndi nee, ab'asopa nkási a labha la Mbinɔ Anja. Nndaga bende beejangisɛ bato, mpa benjangisɛ gɔɛ nde Mokonga, mmbe aúbha bhulibhu nde a asub'a meema asu. 5 Boúbha gela bende, nndag'ai bɛyɔnga yɔnga nga bende bato basokóndɛ, iisi na nnd'ai bɛyɔnga mbéa nga bende basopɛ ɛmbɔ, iisi. Mokonga yɛu a nde ntɔndɔlisi. 6 Na nndag'ai bekabaga ebhebhɔ nda bato na ind'anu, nangɛ inda bato-li bɔbhu, iisi. 7 Na sinde bei nee áma imoti na benu bía batetei nde ba Kilisitɔ, bei na bokama la sosia l'anu bende bosotabelɛ, mpa bei bakɔlɔ ang'anu, bía sinde nke aelanga na ban'aɛ. 8 Ìbo yɛu, ai benokóndi kpɛɛ. Nnd'ai bejangi masa a labhela l'anu Mbinɔ Anja nde atoi nɔngɔ a Mokonga, iisi, mpa go gabha la lenda l'asu a yɔnga l'anu nga, ai n'aye bootii bakóndaga nde basu. 9 Badhasu, bokanisɛ, enobɔ na eloɔ nd'asu. Ai bɛkɔla nkási kiia na etonge nga, bebá-i nkumba ang'a nto, a mbènɔ nde ai belabha nee Mbinɔ Anja nda Mokonga.10 Benu bo nde batɔndɔlisi nde basu, na Mokonga n'iyɛ bende, tambela l'asu, mosá l'anu benu bàlebei, ai anja, na inda domi na inde nnd'aanga basolea. 11 Na boúbha bende, ai bɛnkɔlɛla kela nto anja bìa abha-bàni a meeme a ban'aɛ. 12 Nnd'ai bedu dhodeisa la meema anu, a kandisaga l'anu na gámelaga l'anu bende bolendɛ sinde Mokonga akóndi nee. Mokonga iyɛ yɛu anokogi nga, bongiɛ a ɛbɔamɛ na a boumu nd'aɛ.
13 Be na éma atì nde bensìma au Mokonga esa-li bhulibhu. A nde bende, mbènɔ nde bebhii anu na Yɔnga nd'aɛ aba bolebea iyu nga ai nde nd'aɛ, na nnd'ai bolebei bìa inda koto. Na Yɔnga nde aga n'akɔla nkási asub'anu, benu nde bonebei. 14 Badhasu, bonobi na bato nde ba nɔngɔ anu, bookengi bato nde banebei Kilisitɔ Yesu a kanisà nda Mokonga naa Yudɛa. N'ibɔ ai banobi na bato nde ba nɔngɔ abɔ, a nde bende baYuda. 15 BaYuda yɛu ai bammói Mokama Yesu na baúbhilili nde ba kala na nobisa l'asu. A nde bato nde nnda banjangisi Mokonga, ago ibɔ yɛu ba nde banjiu ang'a bato-li bɔbhu. 16 Basɔkɔmisa labhela la bande nndaga baYuda Mbinɔ Anja, a yɔnga la bende balama-i. Ang'a indɔ yɛu, aha bakɔla ilɔlɔ esa-li bhulibhu, na mokpata nda Mokonga aekidii.
Pɔlɔ ago na sei a tambela la bakilisitɔ nde ba Tɛsalɔnika
17 Badhasu, a mbènɔ ɛdɛ ai bedoani na benu, ago n'a nde a ngobho bosa makanga a meema. A mbènɔ ndɔ bhulibhu, ai be na sei a ɔna l'anu go kpɛɛ na kɔla la bhulibhu nga bekidilɛ a indɔ. 18 Ang'a indɔ yɛu, ai bekóndi bhia la nɔngɔ anu, eme Pɔlɔ, ai nekengei indɔ nkobà imoti na inda ibale, mpa Sitani ai asɔkɔmisa. 19 Màni yɛu a nde boosobela l'asu, na bujɛmɛ na mbidha nd'asu, mosá l'a mbènɔ a bhia la Mokama nde masu Yesu, na nndaga masa benu? 20 A nde bende, benu yɛu bo nde boumu na bujɛmɛ nd'asu.