Pɔlɔ antei Timɔtɛɔ naa Tɛsalɔnika
3
Mbènɔ nde bɛɔni bende nnd'aanga bɛtɔa bubila la bondeaga go, aba belamola tíga l'a bɔma nda Atɛnɛ besu nganga. 2 Aba bentea dh'asu Timɔtɛɔ nga bende, agɛ amɔtisɛ na dhodeisa la meema anu asub'a boosobela. Iyɛ a nde mbhɛdanigi dh'asu a nkási nda Mokonga a labha la Mbinɔ Anja nda Kilisitɔ. 3 Adhuma bɛkɔli ìbo, nga abá-i angal'anu mmbe aang'abá na maamaa a yɔnga la noba nde be au nde. Na benu boúbha bende, Mokonga ai alebei bende betesɛ a enobɔ ndɔ. 4 Boúbha bende, mbènɔ nde bei nee nɔngɔ anu, ai benongodea bende besu na benu benoba mande. Mpa ayunde akidi nde. 5 Ang'a indɔ yɛu, akidi mbènɔ nde nndaga nɛtɔi bubila, aba nentea Timɔtɛɔ nɔngɔ anu, nga nebɛ na mbinɔ a boosobela nd'anu. Adhuma nɛkɔli bo a tea la bende kosà Sitani, ndhemigi ndɔ, anodhema-i, kesi nkási nd'asu aku nde bosa.6 Mpa ayunde Timɔtɛɔ akidi nɔngɔ asu toa la nɔngɔ anu. Abhii na mbinɔ anja a yɔnga la boosobela nd'anu na ekóndi anu. Asongodei bende esa-li bhulibhu, bosokanisa a bonja na bende bo na sei a ɔna l'asu bía na besu be na sei a ɔna l'anu. 7 Ang'a indɔ, badhasu, meema asu adhodeani mpa kpɛɛ a yɔnga la boosobela nd'anu. Nangɛbɛ sinde basonobisa nee kpɛɛ nde. 8 Mpa, beheumi, nga benu aye bome mpa hɛlɛ ang'a Mokama. 9 Mpa a nde mambala sìma sina yɛu aanga bensisila Mokonga a yɔnga l'anu? Aanga bensìma nde boni a bujɛmɛ mati nde be nee mosá l'aɛ a yɔnga l'anu? 10 Kiia n'etonge bɛmmɛma Mokonga na mouɔ bende bɛɔnɛ iso anu, na tɔdɛisa la inde abólani a boosobela nd'anu.
11 Bɛmmɛma Mokonga nde masu, Abhasu, na Mokama nde masu Yesu, asoukuilɛ asii a bhia la nɔngɔ anu. 12 Mokama atɔdɛisɛ ekóndani angal'anu na ang'a bato bɔbhu, sinde besu be na ekóndi atì ang'anu. 13 Ago amɔtisɛ meema anu, nga bobɛ bambhumani na bande nnd'aanga baesoleaga mosá la Abhasu Mokonga, a mbènɔ nde Mokama nde masu Yesu abhia mande áma imoti na bambhumani nde baɛ bɔbhu.