Tambela nde am'bɔngɛla Mokonga
4
A sungia, badh'asu, aye benogolisi sinde atɔlɛli nee tamba nga bende, bɔm'bɔngɛlɛ Mokonga. Na aye botambi bo. Mpa, bɛnɔmɛmi na gámelaga l'anu a ina a Mokama Yesu bende, bɔkɔlɛ go ìbo kpɛɛ. 2 A nde bende, boúbha egolisi nde ai benongodei a ina a Mokama Yesu. 3 Nga, Mokonga akóndi nde bende, bobɛ bambhumani na bɔkɔla-i bosalati. 4 Kela nto angal'anu aúbhɛ bomba la ngobho aɛ asub'a bobhu na a bosikɛ, 5 kanga a sei-sei a éma ajede bía bato nde nnda bamúbha Mokonga. 6 Ang'a indɔ, nto ankɔla-i mɛnɔ dh'aɛ ajede nga, Mokama asɔ̀a mande yɔnga nda bato ndɔ ajede kpɛɛ. A masa sinde ai benongodei na tɔndɔlisila l'anu kala ndɔ. 7 A nde bende, Mokonga nnd'ai asokogi nde a kɔla la bosalati, mpa ai asokogi gɔɛ nde bende, belendɛ a bobhu. 8 Ang'a indɔ, mmbe akɔ́mi sikisa la egolisi nde, ankɔ́mi gɔɛ nde Mokonga, kanga nto. Na Mokonga yɛu asopi Meema Mbhumani nde maɛ.9 A yɔnga la ekóndani, nnd'aanga nenoandekea bhunaba. Nga, Mokonga iyɛ nganga aye anogolisi sinde atɔlɛli nee kóndana. 10 A nde bende, bookóndi bato nde ba Mokonga bɔbhu, bande ba asub'a Makedonia bhuu. Badh'asu, bɛnɔmɛmi bende, bosùililɛ go ekóndi ndɔ kpɛɛ. 11 Ago bosùililɛ ika l'a bɔkɔlɔ. Kela nto akɔlɛ masa éma nd'aɛ iyɛ nganga. Na abhɛdɛ nkási nd'aɛ na njaga aɛ sinde ai benososii nee. 12 Ang'a indɔ, bande nnda bamúbha Mokonga banosikisa, na benu nnd'aanga aye bɔɛkɛtɛla bato batɔɔ a bungu nde bo nee.
Esa la siana la Mokama
13 Badh'asu, bekóndi bende, boúbhɛ domi a yɔnga la bàku. Nga bende, bobá-i mɛnɔ na ngomi bía bato nde nnda ba na bɔɛkɛtɛla. 14 Besu belebei bende, Yesu ai aku na ab'ajujua. Ìbo yɛu, Mokonga aejujusa go mande bàku nde ai banebei Yesu na ga la n'ibɔ áma imoti.
15 Inde benongodea nde a nde yɔnga nde atoi nɔngɔ a Mokama. A nde bende, besu nde Mokama asodhonda mande n'aha bɛɔnɛa, a mbènɔ a siana l'aɛ, nnda bekamanaga mande mosá la bande ai n'aye báku. 16 Nga, bɛɔka mande moyo bía lɛlɛ, moyo a malaeka la mmbe mati, na moyo a mbengu nda Mokonga. Mpa, Mokama iyɛ amɛnɛ adhida mande toa la na kobha. Na bande ai báku na banebei Kilisitɔ bajujua mande a kukua mosá-mosá. 17 Mpa na besu nde aha bɛɔnɛa, betália mande n'ibɔ áma imoti asub'a ebundu a tulana la na Mokama n'egoo. Mpa, aba beika n'iyɛ a mɛyɔ. 18 Ìbo ndɔ, bodhodeisanɛ meema a yɔnga ndɔ.