5
Mpa, badh'asu, nnd'adhu aanga benoandekea bhunaba a yɔnga la mbènɔ aɔ elemɔ a siana la Mokama. 2 Nga, boúbha hɛlɛ bende, esa nda Mokama abhia mande nde bía nkukuba kiia. 3 Mbènɔ nde bato bayɔnga mande nee bate: «Bɛkɔlɔmani bo sii!», mpa nkobà imoti baelikisa mande. Esa ndɔ abá mande nde bía amakaleme nde akònda. Na nnd'a na mmbe aoloa mande.4 Mpa na benu, badh'asu, nndaga bo a dhoda nga bende, esa la siana la Mokama anobhutukisɛ mande bía nkukuba. 5 A nde bende, bo gɔɛ nde bato a bobhu, bato a máni. Nnda be nde bato a kiia na dhoda. 6 Ang'a indɔ, bela-i tɔɔ bía bande batɔɔ. Bekengemanɛi gɔɛ nde na betambɛ hɛlɛ. 7 Nga, bande bala, kiia yɛu aki bala. Na bakundilia, kiia yɛu aki bákunda. 8 Mpa besu, be gɔɛ nde bato a máni, betambɛi hɛlɛ. A nde bende, boosobela n'ekóndani asu akènganɛ na ngɔmbɛ nda basoda, inde bakɔkɔtii na ngɔa. Bɔɛkɛtɛla la bolamisi asu abɛ bía kɛkɛ la ngɔa†.
9 Nga, Mokonga nnd'ai asokogi bende, bɛmɔnɛ mokpata. Ai asokogi gɔɛ nde bende, bebɛ na bolamisi tesela la ang'a Mokama nde masu Yesu Kilisitɔ. 10 Nga iyɛ ai asokulii nga bende, beikɛ áma imoti n'iyɛ, abɛ na beku aɔ n'aha bɛɔnɛa a esa la siana l'aɛ. 11 Ang'a indɔ, bodhodeisanɛi meema, bokándisanɛgɛi asub'a boosobela sinde aye bɔkɔla nee ndɔ.
Maanɔ ntuantua nda sungiaga la baloa
12 Badh'asu, bɛnɔmɛmi bende, boosikisɛ bande bankɔlɛla Mokonga nkási a nsɔlɔ anu bía basɔndɔlisi. Nga, Mokonga aemesi a meeme anu a yɔnga la hana l'anu. 13 Boesikisɛi kpɛɛ n'ekóndi a yɔnga la ɛkɔli nd'abɔ a ina a Mokama. Bolendɛ na bɔkɔlɔ a nsɔlɔ anu.
14 Badh'asu, bɛnɔmɛmi bende, boehanɛ bàkusi. Bodhodeisɛ meema a bato nde baloi. Boetabelɛi bagbɔgbɔki na bubila la bato bɔbhu. 15 Bolengɛi hɛlɛ nga bende, nto agisia-i mɛnɔ bujede ang'a dh'aɛ. Aba gɔɛ bɔkɔla masa bonja a nsɔlɔ anu na ang'a bato bɔbhu.
16 Bobɛ na bujɛmɛ esa-li bhulibhu, 17 bɔmmɛmɛ Mokonga makanga loa, 18 bonsìmɛ a éma-li bhulibhu. Nga, indɔ yɛu Mokonga akóndi ang'anu, benu nde bɔlɔngani na Yesu Kilisitɔ.
19 Bolimisa-i mɛnɔ ɛkɔli nda Meema Mbhumani. 20 Bɔbhɔnisa-i mɛnɔ bolabhɛ nda baúbhilili nde ba Mokonga. 21 Bolengisanɛi mbɛɛ bolabhɛ bhulibhu, mpa, bolebeɛ inde a anja. 22 Bɔkɔla-i mambala bujede-li bhulibhu.
23 Mokonga, Amɛnɛ a bɔkɔlɔ iyɛ nganga, anobhísɛ aɛ mbamba ngiman'anu, alangɛ lenda l'anu bhulibhu nga bende, meema anu, maakɔ anu na ngobho anu aikɛ kanga bujede kida la esa la siana la Mokama nde masu Yesu Kilisitɔ. 24 Mokonga, mmbe anokogi, akɔla mande anu éma ndɔ bhulibhu nga nnd'aki abosela mɔkɔ̀ nd'aɛ.
25 Badh'asu, bɔmmɛmɛi Mokonga a yɔnga l'asu.
26 Boeseseɛi badh'asu bɔbhu kpɛɛ a ina a Mokama.
27 Nɛnɔmɛmi a ina a Mokama, bɔsɔmɛi baloa nde mosá la badh'asu bɔbhu.
28 Boangɔ nda Mokama nde masu Yesu Kilisitɔ, abɛ na benu.