Pɔlɔ akidi a kesanga a Mɛlita
28
Mbusa a kida la kubhi na bɔkɔlɔ, mpa aba beúbha bende ina a kesanga ndɔ a nde Mɛlita. 2 Bato nde ai baiki we, aba basopikila hɛlɛ kpɛɛ ye mɛnɔ. A nde bende, nga mbúa-li ai n'aye akɛngɛtisi lɔa na heɔ n'anyɛna, aba balolisa asu nsa. 3 Pɔlɔ ab'aga asɔngiaga ehaɔ a nsa na gesaga-li asub'a nsa. A yɔnga la bojo a nsa ndɔ, mɛgbɛ ab'atoa asubi, ab'abhia aelingiaga a njaga aɛ na gɔta l'aɛ. 4 Mbènɔ nde bato nde ba kesanga ndɔ baɔni nee bende njoa aelingiigi nee a njaga aɛ, aba bayɔngisanaga a nsɔlɔ abɔ bate: «A nde domi, nto nde a nde mosinja. Aoloi kukua asub'íbo, mpa esomba a kodomi nnda an'dɔlɛlani bende alendɛ.» 5 Mpa Pɔlɔ ab'antitiilaga njoa ndɔ asub'a nsa na ankɔli-mbɛ éma. 6 Bato ai babondea bìmba la ngobho aɛ aɔ gua na kua l'aɛ nkpanda. Na mbusa a bondea la mbènɔ enda, aba baɔna sinde éma ajede nnda ankidii nee, aba batia maakɔ abɔ bate: «Iyɛ a nde bía esomba†.»7 Bhi-bhi la mpuɔ ndɔ, n'a be tio a mokama nde ma a kesanga ndɔ, na bankoga bate Pubiliɔ. Mmbe ab'asopikila na meema a ekóndi, na ab'asoikisa na mɔtɛ aɛ a kia isalɔ. 8 Abhaɛ na Pubiliɔ n'ale antate a ekà n'aku kapululu n'anya nsangi. Pɔlɔ ab'angia ga ɔna l'aɛ, ab'ammɛma Mokonga na bhísa la njaga antat'aɛ, n'iyɛ ab'alama. 9 Mbusa indɔ, bande bai nde bajegi a kesanga ndɔ bɔbhu aba babhia áma a bolamɔ, n'ibɔ aba balama. 10 N'ibɔ aba basosikisa kpɛɛ. Na mbènɔ a ga l'asu, aba basɔkɔ̀mɛaga éma bhulibhu nde bei nee bungu.
Pɔlɔ akidi Lɔma
11 Mbusa a mɔsɛla isalɔ, aba bɛkɛngɛtisa go tamba asub'a koko nde ai n'aye alɛbhi a kesanga ndɔ a elemɔ a heɔ akpɛ. Inde ai nde da-koko nde ai atoeli a njabhɔ nda Alɛsandulia n'a au elimelime a baesòmba la baasea. 12 Aba bekida a njabhɔ nda Silakusa, aba bela wa kia isalɔ. 13 Aba betoa wa, na jabhela l'a nji nda Lɛgiɔ. Uma-li, moheɔ ab'ahehuila saka a mpasɔ, ang'a indɔ mpa aba bɛtɔisa toa la wa. Na mbusa a kia ibale, aba bekida a njabhɔ nda Putɛɔli. 14 Io, aba beedhonda badh'asu bàlebei, na aba basosesea na yɔnga la bende belɛ nɔngɔ abɔ kia sobe-lalɔ. Na ìbo yɛu aba bega mosá na betamba n'ego kida la Lɔma. 15 Esa nde badh'asu bàlebei nde baLɔma baɔki nee mbinɔ asu, aba babhia basodhonda bimoti a ntanga a bototi nda Apiɔ, na batɔɔ a nji imoti nde ai bakoga bate Endu Isalɔ. Pɔlɔ ɔna l'abɔ, ab'ambhebha Mokonga na meema aɛ ab'adhodeana. 16 Mbusa a kida l'asu Lɔma, omi nde ma basoda ab'ansosia Pɔlɔ bende aikɛ iyɛ amɛnɛ n'a na soda nde ananga.
Pɔlɔ alabha yɔnga nda Mokonga naa Lɔma
17 Abɛsi ndɔ, mbusa a kia isalɔ, Pɔlɔ ab'aekoga bakama nde ba baYuda. Mbènɔ nde batulani nee ab'aengodea ate: «Baboo badh'ami, nangɛbɛ na nnd'ai nɛkɔli éma ajede ang'a bato nde basu aɔ a nkani nda bàtata asu, adhuma bamonyangi naa Yɛlusalɛma, na maa l'ami a njaga a baLɔma. 18 Mbusa a baLɔma ulisaga l'ami, aba bakaba kodaga l'ami nga bende nndag'ai baɔni ang'ami yɔnga ajede nde atɔlɛli nekuliɛ. 19 Sinde baYuda ai bakɔ́mi bende bamokodaga-i, aba nɛɔna bende atɔlɛli nenákelɛ mɔamɛ Kaisali. Nndag'a nde bende ai nekaba choela la bato nde ba lɛɛngɔ asu, iisi. 20 A yɔnga la indɔ yɛu, adhu nɛmɛmi bende nɛnɔɔnɛ na ambola la na benu. A nde bende, a nde a yɔnga la bɔɛkɛtɛla nda baIsilaɛli ndɔ yɛu aangisi na bamonyangigi na ngɔa nde.» 21 Aba bansisila bate: «Bɛɔni-mbɛ baloa nde atoi a lɛɛngɔ a Yudɛa a yɔnga l'aɔ. Na abi-mbɛ be adha batob'asu moti mmbe abhii atɔmia mbinɔ ajede a yɔnga l'aɔ. 22 Bekaba bete bɛɔkɛ maakɔ aɔ. Nga, beúbha bende a mpuɔ-li bhulibhu bato batì bayɔnga ajede ang'a boio nde o au ndɔ.»
23 Mbusa a gabheana la esa la tulana la n'ibɔ go, da-bato batì aba babhia áma nde aiki. Toa la umauma kida l'ɛgɔgɔ, ab'aɛtɔmila na tɔndɔlisa l'ɛbɔamɛ nda Mokonga, na lebeisa l'abɔ mbinɔ a Yesu toa la asub'a Tɔlati nda Mósa na baúbhilili. 24 Bimoti aba balebea inde ai ayɔnga, na batɔɔ aba bakɔ́ma lebea-li. 25 Aba batoa be makanga bende balebeisani a nsɔlɔ abɔ. Mpa Pɔlɔ ab'antɔdisa go yɔnga moti ate: «Meema Mbhumani ai ayɔngi domi na bàtata anu, nyɛnɛla la ang'a múbhilili Isaya, 26 ate:
‹Ogɛ nɔngɔ a bato nde, oengodeɛ ote:
A ɔka bɔɔka mande mpa nnd'alɛ boúbha,
a lenga bolenga mande mpa nnd'alɛ bɔɔna.
27 Nga, meema a bato nde aye akáli,
bakpemi etue l'abɔ,
na badegi iso abɔ,
a tea la bende baɔna-i,
baúbha-i na maɛnɛkɔ abɔ,
na bende baetiila-i ang'ami nga neelamisɛ†.›
28 Mpa boúbhɛ bende, mbinɔ a bolamisi nde Mokonga atei nɔngɔ a bato nde ba lɛɛngɔ atɔɔ†, n'ibɔ baɔka mande yu.»