Mbinɔ Anja sinde
LUKA
ai aandeki nee
Moo a yɔnga
Luka iyɛ yɛu ai aandeki ketabo a Mbinɔ Anja nde. Nndaga ai nde moYuda, ai nde namisi. Ago iyɛ nndag'ai nde adha bagoli mɔkɔ na babale nde ba Yesu Kilisitɔ. Mpa ai aika gɔɛ nde na bande ai batamba a nkindi na Yesu. Ai aeulisaga bhi-bhi mbinɔ a Yesu toa la konii laɛ kida la kukua laɛ. Ai ago atambi bona Pɔlɔ a tamba ndaɛ moti moti, n'antabela a nkási ndaɛ. Luka ai aandeki Mbinɔ Anja nde na Ketabo a Ɛkɔli nda Batetei. A kɛngɛtisa la Mbinɔ Anja nde, ayɔnga bende akaba ate atɔmiɛ yɔnga la Yesu bhulibhu hɛlɛ. Ai aandeki yɔnga nde nde anga baYuda na bande nndaga baYuda kpɛɛ mbɛɛ anga Mosikɛ Tɔfili, nga aúbhɛ bende inde ai bangolisi, ai nde yɔnga la domi la lamisa la meema (1.19,47,69; 2.11,30; 3.18). Luka ayɔngi ati a yɔnga la Yesu, kpɛɛ mbɛɛ a yɔnga la ekondi aɛ anga bayɛnɛ, bato boobo, bake na batambi. Luka aangelisi gea-la-bende, Kilisitɔ akɔli nde yɔnga nde baúbhilili ai bayɔngi.
Buana la ketabo
Ketabo nde abuani a hale sobe-komi:
(1.1-4) Luka aangelisi inde ai aangisi a andeka ketabo nde
(1.5—2.52) Yɔani-Ndiisi bona Yesu ai babɔtɛani nde iboni?
(3.1-20) Egolisi nda Yɔani
(3.21—4.13) Ndiisa la Yesu na Sitani kengea la dhema laɛ
(4.14—9.50) Yesu agee aika Galilaya
(9.51—19.27) Yesu atoi Galilaya ga la Yɛlusalɛma
(19.28—23.56) Sɔ̀a la Yesu na kukua laɛ
(24.1-12) Yesu ajujui a toa la a kukua
(24.13-53) Yesu aeóbeli bagoli nde baɛ na talia laɛ na kobha.