Yesu ajujui a kukua!
(Olengɛ go Mat 28.1-8; Luk 24.1-12; Yɔan 20.1-10)
16
Mbènɔ nde Sabato atesi nee, Malia mmbe maa Mangadalɛna, na Malia amá-Yakɔbɔ, na Salɔmɛ aba basómba nkoki nga agɛ basìɛ a kiinda a Yesu. 2 Akidi ye esa la yenga umauma kpɛɛa, a óbela la máni, bake ndɔ aba baga na bhota. 3 Aba baulisana nkunguanabɔ bate: «Màni yɛu ag'ankingita asu da-ɛtɛ nde akegi mpume a bhota-li ndɔ?» 4 Lenga labɔ be, aba baɔna bende, ɛtɛ nde ai da-mati kpɛɛ ndɔ n'aye bankingiti mbamba.5 Mpa, aba bangia asuba a bhota-li, aba bamɔna muluana moti, n'aiki a njaga la ind'akpɛ, n'alɔli nkanjo abhu. Bɔɔ ab'aebaa kpɛɛ. 6 Mpa, ganja ndɔ ab'aengodea ate: «Botea-i. Yesu mmaa Najalɛti yɛu bonkaba, mmbe ai bammóeli a mosalaba ndɔ. Nnd'aye ani, aye ajujui a kukua. Bɔɔnɛ masa áma nde ai babhísi kiinda aɛ. 7 Mpa, bogɛ boengodeɛ bagoli nde baɛ na Pɛtɛlɔ bende agee mosá labɔ naa Galilaya. Iyo yɛu aga bɔmɔna bía nde ai anongodei† nee.» 8 Bake ndɔ aba batoa na bhota o mbangɔ, na bakpɔkpɔma na mbombi. Na nnd'ai banngodei naa nto moti yɔnga ndɔ, nga bɔɔ ai aejuluu.
Yesu aɔnɛani anga Malia Mangadalɛna
(Olengɛ go Mat 28.9-10; Yɔan 20.11-18)
b[ 9 Mbusa a Yesu jujua laɛ a kukua, umauma la esa la yenga, ab'aɔnɛana mbɛɛ anga Malia Mangadalɛna, mmbe ai aebèi baketi sobe-lalɔ angaɛ ndɔ. 10 Mmbɔ ab'aga aɛtɔmila bande bai na Yesu, n'ibɔ na ba a kukua na bagama. 11 Mpa, ɔka labɔ inde Malia aengodei nee bende amɔni Yesu n'alenda ndɔ, ibɔ nndag'ai balebei yɔnga ndɔ.
Yesu aɛɔngiani anga bagoli babale
(Olengɛ go Luk 24.13-35)
12 Mbusa wa, Yesu ab'aeóbela bagoli nde baɛ babale na baga na mɔlɔngɔ. Ai aɔnɛani angabɔ n'elimelime atɔɔ. 13 Na bandɔ aba baga baɛtɔmila badhabɔ. N'ibɔ nnd'ai balebei go yɔnga la bandɔ.
Yesu aɛɔngiani anga bagoli mɔkɔ́ na moti
(Olengɛ go Mat 28.16-20; Luk 24.36-49; Yɔan 20.19-23; Ɛkɔl 1.6-8)
14 A sungia, Yesu ab'aɛɔngiana anga bagoli nde baɛ mɔkɔ́ na moti na baléana. Ab'aesolea a bóla la boosobela na meema akpɛ nde ba nee nga, nnd'ai balebei yɔnga la bande ai bamɔni n'ajujui a kukua. 15 Mpa, ab'aengodea ate: «Bogɛi a lɛɛngɔ bhulibhu, boelabhelɛ bato bɔbhu Mbinɔ Anja. 16 Mmbe alebea mande, bonndiisa mande na mmbɔ yɛu alama mande. Na mmbe nnd'alebea mande amɔna mande mokpata. 17 Na mbunde nde yɛu abeleanaga mande na bato nde balebea mande yɔnga ndɔ: Baebèa mande baketi a ekanda la ina ami, bayɔnga mande eluu atɔɔ. 18 Baedhunga mande banjoa. Nabana banu éma ajede nde aanga ammóa nto nnd'aanga aɛkɔla na éma. Babhísa mande njaga abɔ antata a bajegi na ngobho a bandɔ ab'akandaga.»
Yesu atalii na kobha
(Olengɛ go Luk 24.50-53; Ɛkɔl 1.9-11)