Ɛkɔli
nda Batetei
Mokonga aɔkɔi tea la Meema a Bobhu ang'a batetei
1
Mangɛsɛ Tɔfili, aye neoandekei ketaboa moti a yɔnga la Yesu. Ai neandeki asubi éma bhulibhu nde ai akɔli na golisaga-li. Ai go neongodei sinde Yesu ai akɛngɛtisi nee nkási nd'aɛ, ga-li nee mosá, 2 kida la esa nde Mokonga ai antálisi nee na kobha. Mosá la tália l'aɛ, ai aepi batetei nde ai aɛsɔmbɔli ndɔ maanɔ. Ai akɔli ndɔ nde a ekanda la Meema a Bobhu. 3 Mbusa a noba l'aɛ, ai aɛɔngiani ang'abɔ a mbunde ntuantua, nga baúbhɛ domi bende alendi go. Ai aeóbeli esa ekomi ini, n'ai aengodea yɔnga l'ɛbɔamɛ nda Mokonga. 4 Esa imoti, n'aléanab áma imoti n'ibɔ, ab'aesosia ate: «Botoa-i Yɛlusalɛma ani, bobondeɛ gɔɛ nde mɔkɔ̀ nde Abhami ai anɔɔkɔi, inde ai nenongodei ndɔ. 5 Yɔanic ai aendiisi bato a íbo, mpa benu, mbusa a kia n'ɛdɛ, Mokonga anondiisa mande na Meema a Bobhu nde maɛ.»Yesu atálii na kobha
6 Mpa, sinde batetei ai batulani nee na Yesu, aba bamulisa bate: «Mokama, a nde a mbènɔ nde yɛu oesisila mande baIsilaɛli† ɛbɔamɛ nd'abɔ?»
7 Emesunga na Yesu ate: «Indɔ nndaga anolengi, úbha la mbènɔ na elemɔ nde Ebha agesi iyɛ nganga a bokama nd'aɛ†. 8 Mpa gɔɛ, Mokonga anopa mande ekanda mbènɔ nde Meema a Bobhu adhidha mande nee antat'anu. Bobá mande bàtɔndɔlisi nde bamɔ naa Yɛlusalɛma, Yudɛa bhulibhu, Samalia na kida la sungiaga la lɛɛngɔ†.»
9 Mbusa a yɔnga l'aɛ indɔ, Mokonga ab'antálisa na kobha. N'aha banengeleli wa, ebundu aba an'degelaga, na nnd'ai ye bamɔna†. 10 N'aha batumii iso abɔ na kobha naande Yesu ai aga nee ndɔ, nkobà imoti, baboo babale na balɔli ngɔmbɛ abhu-bhu†, aba baóbela, bo pua! 11 Aba baeulisa bate: «Bato nde ba Galilaya sa! Nga éma sina yɛu bome ani a lenga la na kobha? Yesu, mmbe atoi a nsɔlɔ anu a ga la na kobha ndɔ, asiana go mande masa sinde bɔmɔni n'atália nee ndɔ.»
Batetei bansɔmbɔli Matɛasi a mpɛnɛ a Yuda Sikaliɔta
12 Mpa, batetei nde ba Yesu aba basiana Yɛlusalɛma toa l'abɔ na mamba a Mijeituni. Mamba nde a nde bhi-bhi la Yɛlusalɛma tamba la bía gbutu a mbènɔ imoti†. 13 Na mbènɔ nde bakidi nee Yɛlusalɛma, aba badaa a mpuɔ l'inda gulud, asub'endu, áma nde aki balaga. Bande bai wa, ai nde: «Pɛtɛlɔ, Yɔani, Yakɔbɔ, Andeleya, Filipɔ, Tɔmasi, Batɛlɛmayɔ, Matayo, Yakɔbɔ muna-Alifayo, Simoni mmbe ai bankoga bate Jɛlɔtɛ, na Yuda muna-Yakɔbɔ†.» 14 Bande bɔbhu, na meema imoti, ai batulanaga dia-dia a ɛmɛmi. Ai bamɛma áma imoti na bake, na Malia amá-Yesu, na baaya la Yesu.
15 Esa imoti adha elie ndɔ, Pɛtɛlɔ ab'ama a meeme a badh'aɛ nde banebei Kilisitɔ, n'ibɔ bai bía bato eyana imoti na ekomi ibale. Mpa, Pɛtɛlɔ ab'ayɔnga ate: 16 «Badh'ami, atɔlɛli yɔnga nde Meema a Bobhu ai ayɔngi asub'a Ketabo nda Mokonga aóbelɛ. Mosá, Meema ndɔ ai ayɔngɛli asub'a mɔamɛ Daudi a yɔnga la Yuda†, mmbe ai aetii nsɔndɔlisi nde ma bato nde ai bandhungi Yesu. 17 Yuda ndɔ ai nde adha besu moti, nga n'iyɛ Yesu ai ansɔmbɔli bende asugianɛgɛ áma imoti na besu a nkási nda Mokonga nde. 18 Yuda ai asómbi tio na ntondɔ nde ai adɔ̀i asub'a bujede nd'aɛ. Io, ab'agua n'atungumanigi, sɔɔ aɛ ab'abhomoa, ekundu aɛ bhuu ab'aekpukpua a dodo. 19 Yɔnga ndɔ ab'aúbhianana na bato bɔbhu nde ba Yɛlusalɛma. Ang'a indɔ, aba basɔ̀a ina a tio ndɔ a eluu nd'abɔ bate, ‹Akɛlɛ-damu.› A nde yɔnga la bende: ‹Tio a nsangi†.› 20 Nga baandeki asub'a ketabo a Lembɔ bende:
‹Endu aɛ ajɛ to euma›,
kanga bende nto aika asubi.
Baandeki go bate,
‹nto matɔɔ asianɛ a mpɛnɛ aɛ†.›
21-22 Ang'a indɔ, atɔlɛli bɛnsɔmbɔlɛ nto moti angal'a bato nde bai na besu mbènɔ bhulibhu nde Mokama Yesu ai atambi áma imoti na besu, toa la ndiisɔ nda Yɔani, na ga kida la esa nde Mokonga ai antálisi Yesu ang'asu ga la na kobha†. Nga, atɔlɛli nto ndɔ abɛ ntɔndɔlisi a yɔnga la jujua la Yesu a kukua.»
23 Mpa, aba baebhia na bato babale. Ina a mmbe moti a nde Yɔjɛfu mmbe ai bankoga bate Balisaba na bampaka bate Yusitɔ ndɔ, na mmbe matɔɔ bate Matɛasi. 24 Aba bammɛma Mokonga bate: «Owɛ Mokama, múbhi-meema a bato bɔbhu, ɔsɔɔngiɛ to mbénɔ mma wani yɛu ɔnsɔmbɔli a meeme a bato nde babale nde. 25 Nga, nto ndɔ abɛ mmbe ɔnsɔmbɔli a kɔla la nkási nda ntetei a mpɛnɛ a Yuda mmbe agee a mpuɔ nde antɔlɛli nee ndɔ.» 26 Mpa, aba bakɔla bɔsɔmbɔli a úbha la mmbe Mokonga ansɔmbɔli. Bɔsɔmbɔli-li ab'angulia Matɛasi, na aba bantɔdisa ang'a batetei nde ba mɔkɔ́ na moti ndɔ.