Meema a Bobhu aesìmii bato nde banebei Yesu
2
Mbènɔ nde esa la dinyɛ la Pandɛkɔtɛ† akidi nee, bàlebei bɔbhu ai batulanigi a mpuɔ imoti. 2 Nkobà imoti, ndulu ab'atoa na kobha, bía ndulu a kukai. Ndulu ndɔ ab'atuma asub'endu nde ai baiki au ndɔ bhulibhu. 3 Mpa aba baɔna wa éma bía minyɔ a nsa n'aóbela. Minyɔ a nsa ndɔ ab'akatanaga, na ga ika la antat'a moo a bɔbhu. 4 Bɔbhu aba batuma na Meema a Bobhu, aba bakɛngɛtisa yɔnga a eluu atɔɔ bía nde Meema a Bobhu ai aɛɔngiana nee.5 Mpa, naa Yɛlusalɛma bai we baYuda nde ai bantea Mokonga, toa l'a nji ntuantua nda na lɛɛngɔ. 6 Mbènɔ nde baɔki na ndulu ndɔ, mɔlɔndɔ a bato aba batulanaga. Ai aebangisa nga, nto na nto ai aɛɔka bato nde ba Yesu ndɔ na bayɔnga eluu nd'aɛ nda bɔtɛana. 7 Indɔ ab'aebangisa kpɛɛ. Aba bagea bate: «Bato nde bayɔnga nde, bɔbhu nndaga bá nde baGalilaya†? 8 Mpa, boni yɛu nto na nto angal'asu aɛɔka na bayɔnga a eluu nd'aɛ nda bɔtɛana? 9 Angal'asu ba we bato nde ba Palati, baMɛdi, baƐlamu, bande baiki Mɛjɔpɔtamia, Yudɛa na Kapadɔkia, Pɔndɔ na Ajia, 10 batɔɔ batoi Fuligia, Pafilia, Misili na saka a ɛkɔngɔ nda Libi, mpiti a Kulɛnɛ. Batɔɔ go batoi naa Lɔma, 11 na bato nde ba Kɛlɛtɛ na Alabia, bande nde baYuda na bande bálebei Tɔlati nda baYuda. Mpa, bɛɛɔka na bayɔnga a eluu nd'asu na tɔmia l'ɛkɔli atì-tì nda Mokonga!» 12 Indɔ ab'aebangisa na aba basaimana, na ulisana la bate: «Indɔ akaba nde yɔnga la éma sina?» 13 Mpa bande batɔɔ aba baejangelaga bate: «Ekunda a mɔngɛ-li aejului!»
Pɛtɛlɔ alabha a meeme a mɔlɔndɔ a bato
14 Mpa Pɛtɛlɔ ab'ama na batetei mɔkɔ́ na moti ndɔ, ab'akɛngɛtisa yɔnga la na moyo enda ate: «Benu baYuda badh'ami na benu bɔbhu nde bokidi naa Yɛlusalɛma, boukuɛ etue l'anu hɛlɛ na bɔɔkɛ yɔnga nde nenongodea nde. 15 Bato nde nndaga bakundi sinde bòaka nee ndɔ, aha masa mbènɔ isalɔ nda umauma! 16 Mpa gɔɛ, inde a nde óbela la yɔnga nde Yoeli múbhilili nde ma Mokonga ai mɛnɔ ayɔngi,
17 ate:
‹A mbènɔ a sungia la lɛɛngɔ, nedua lɛ adha Meema ami ang'a bato bɔbhu,
Baluana na banyike nde banu baja lɛ baúbhilili,
Ban'anu na bakpɛga nde banu baɔta lɛ njei.
18 Domi-li, a esa ndɔ, abá lɛ bo nangɛ ang'a bakɔbɛ nde bamɔ, baboo na bake.
Nedua lɛ Meema a Bobhu ang'abɔ, n'ibɔ balabha lɛ.
19 Nɛkɔla lɛ ekesɔ n'egoo na kobha,
nɛɔngiana lɛ go mbunde na dodo.
Abá lɛ be nsangi, nsa n'ebundu a mai.
20 Máni aetia lɛ dhoda,
Mɔsɛla anjuma lɛ bía nsangi
mosá la kida la esa nda Mokama.
Esa ndɔ, abá lɛ esa mati, esa la boumu.
21 Mpa, nto moti-moti nde ankoga lɛ Mokama, alama lɛ†.›
22 Benu baIsilaɛli, bɔɔkɛi yɔnga nde: Yesu mmbe maa Najalɛti†, a nde nto nde Mokonga ai ammòi bokama nd'aɛ. A tesela la ang'aɛ, Mokonga ai anoangiani indɔ, mbènɔ nde ai akɔli na éma la bangisana na ekesɔ na mbunde ntuantua. Sinde boúbha nee benu nganga, indɔ ai akɔlɛkana a nsɔlɔ anu. 23 Mokonga ai angabhi nto nde a njaga anu sinde ai aúbhi nee na ai alamoli indɔ toa la kala. Mpa na benu ai bongabhi a njaga a bato nde nnda bamúbha Mokonga†. Bato ndɔ, aba bankɔkɛlaga a mosalaba. Ìbo ndɔ, ai bommói ndɔ. 24 Mpa Mokonga ab'anjujusa a kukua, na kodaga l'aɛ a jegeda la kukua. Nga, kukua nnd'ai n'ekanda† la dhungilaga l'aɛ. 25 Nga, mɔamɛ Daudi ai ayɔngi bende antat'aɛ:
‹Ai nɛmɔna Mokama mosá l'ami mbènɔ-li bhulibhu,
nga, a a njaga ami nd'akpɛ, nnd'aanga nelemanaga.
26 Indɔ yɛu aangisi meema ami ajangi, nɛyɔnga na bujɛmɛ,
nangɛ go ngobho ami ayombia lɛ asub'a bɔɛkɛtɛla.
27 Nga, nnd'ɔdɔlɛlana lɛ meema ami n'ebholime,
ago nnd'oongo on'doa nkɔbɛ niina nde maɔ bende ahòɛ.
28 Omoangiani asii la lenda,
omotumisa mande na bujɛmɛ nga ne na owɛ†.›
29 Badh'ami, bodoɛ nenongodeɛ domi a yɔnga la tata asu, mɔamɛ Daudi. N'iyɛ, ai aku, aba bamúmba. Na ndiende, bhota aɛ a nɔngɔ asu† oni. 30 Iyɛ, n'aha aɔnɛa, ai nde múbhilili na ai aúbha bende, Mokonga ai amɔkɔi, na sɛma l'aɛ bende, nto moti adha bande ba ɛbɔti aɛ, abá mande mɔamɛ† a mpɛnɛ aɛ. 31 Daudi ai n'aye aɔni mosá éma nde akida. Ab'angoda yɔnga la jujua la Masiaa, ate:
‹Nnd'ai an'dɔlɛlani n'ebholime.
Ngobho aɛ nnd'ai ahòi.›
32 Yesu ndɔ yɛu mmbe Mokonga anjujusi a kukua nde. Besu bɔbhu be nde bàtɔndɔlisi a yɔnga ndɔ. 33 Ebha Mokonga ai antálisi na kobha, na bhísa l'aɛ a njaga aɛ nd'akpɛ. Ab'ammòa Meema a Bobhu sinde ai amɔkɔi nee. Meema ndɔ yɛu mbe Yesu an'dui antat'asu, sinde bɔɔna na bɔɔka nee nde. 34 Nga, Daudi iyɛ nnd'ai atálii na kobha. Mpa, ai ayɔngi ate:
‹Mokama ai anngodei Mokama nde mamɔ ate,
Oikɛ a njaga ami la ind'akpɛ
35 kida la mbènɔ nde neebhísa banjiu aɔ kusi a ego l'aɔ†.›
36 Atɔlɛli benu baIsilaɛli bɔbhu boúbhɛ domi-domi bende, Yesu nde ai bɔnkɔkɛigi a mosalaba ndɔ yɛu mmbe Mokonga anjisi Mokama na Kilisitɔ.»
37 Bato ndɔ, mbènɔ nde baɔki na yɔnga ndɔ, meema abɔ ab'abúnua. Aba bamulisa Pɛtɛlɔ na batetei la bande batɔɔ bate: «Badh'asu, bɛkɔlɛ nde iboni?» 38 Mpa, emesunga na Pɛtɛlɔ ate: «Botiɛ meema anu, banondiisɛ moti-moti a ina a Yesu Kilisitɔ nga, Mokonga agɛgiɛ ilɔlɔ nd'anu na pa l'anu Meema a Bobhu. 39 A nde bende, mɔkɔ̀ nda Mokonga a ang'anu, ban'anu na bande bá dhɔlɔ, nangɛ bɔbhu bande Mokama Mokonga nde masu aekoga mande.»
40 Na a yɔnga atɔɔ atì, Pɛtɛlɔ ai aehana na dhodeisa la meema abɔ ate: «Boolamisɛi na ɛbɔti nde maakɔ abɔ aketi mbamba nde.» 41 Angal'a bato nde baɔka yɔnga la Pɛtɛlɔ ndɔ batì aba balebea, aba baendiisa. A esa ndɔ, bato bía ɛlufu isalɔ, aba batɔdɛana a mɔlɔndɔ a bande banebei Kilisitɔ.
Tambela la bàgoli nde ba mosá-mosá
42 Bande ai banebei Yesu bai na mouɔ a ɔka la egolisi a batetei na basugianaga a kɔla la éma bhulibhu a mpuɔ imoti. Ai baléa eléa nd'abɔ na mɛma la Mokonga áma imoti. 43 Bato-li bɔbhu bai na bɔɔ nga, Mokonga ai akɔla ekesɔ na mbunde atì tesela la batetei. 44 Bande banebei Yesu bɔbhu bai a mpuɔ imoti, ai babuanaga nkumba nd'abɔ bhulibhu a nkunguan'abɔ†. 45 A nde bende, ai basómbisaga lua nd'abɔ na nkumba nd'abɔ, na bua la ntondɔ-li a nkunguan'abɔ, sinde nto na nto ai nee bungu. 46 Esa-li bhulibhu ai batulanaga a nsɛngɛ a endu a Mokonga na meema imoti. Ai babúnaga mokate a endu ntuantua, na baléa eléa nd'abɔ áma imoti na bujɛmɛ na meema anja. 47 Ai bambhebha Mokonga, na indɔ ab'aɛbɔngɛla bato bɔbhu. Na esa-li bhulibhu, Mokama ai aɛtɔdɛisa a kanisà bato nde ai aelamisa.