N'dɔtu moti alami
3
Esa imoti, Pɛtɛlɔ bona Yɔani ai baga n'endu a Mokonga áma ɛmɛmi nda yenga la máni. 2 A mbènɔ ndɔ, bato ai na bankumbi nto moti, mmbe ai adɔti toa la bɔtɛana l'aɛ. Esa-li bhulibhu, bato ndɔ ai bambhísa n'dɔtu ndɔ a mpume a nsɛngɛ a endu a Mokonga inde bakoga bate «Mpume Anja» ndɔ. Ai bankumba na bhísa l'aɛ a mpume ndɔ nga bende, amɛmɛgɛ ntondɔ ang'a bande bangia be. 3 Mbènɔ nde n'dɔtu ndɔ amɔni nee Pɛtɛlɔ na Yɔani na babhia bangia a nsɛngɛ a endu ndɔ, ab'aɛmɛma ntondɔ. 4 Pɛtɛlɔ na Yɔani aba bantumia iso. Mpa, Pɛtɛlɔ ab'anngodea ate: «Osolengɛ to.» 5 N'dɔtu ndɔ ab'aetumia iso, n'aaka bende bammòa éma. 6 Mpa, Pɛtɛlɔ ab'anngodea ate: «Nndaga ne na ntondɔ, nangɛ nɔlɔ nndaga ne nee. Inde ne nee, neopa. A ina a Yesu Kilisitɔ mmbe maa Najalɛti, omɛ na otambɛ!» 7 Na Pɛtɛlɔ ab'andhunga a njaga nd'akpɛ, ab'ammesa. Mbènɔ ndɔ, ego l'aɛ na esege l'aɛ ab'akándaga. 8 Ab'aemesia, ab'ahɔ́a, ab'akɛngɛtisa tamba. Mpa ab'angia n'ibɔ a nsɛngɛ a endu a Mokonga, io n'aetambela, n'aesadisaga, n'ambhebha Mokonga. 9 Bato bɔbhu aba bamɔna n'atamba, n'ambhebha Mokonga. 10 Aba bamúbhilila bate, ka mmbe yɛu a nde n'dɔtu nde ai aikaga a Mpume Anja l'endu a Mokonga, n'aɛmɛmaga bato ntondɔ ndɔ. Bɔɔ ab'aebaa. Aba babóla mbènɔ bayɔngɛ nde ee, ɔna la inde ai ankidii ndɔ.Pɛtɛlɔ atɔmia na bato a nsɛngɛ a endu a Mokonga
11 Nto ndɔ aba an'dada Pɛtɛlɔ na Yɔani. Bato bɔbhu ab'aebangisa kpɛɛ, aba batelea ntua nde ai baiki au, inde bakoga bate: «Ntua nda Sɔlɔmɔnɔa.» 12 Mbènɔ nde Pɛtɛlɔ aɔni nee bo, ab'aengodea bato ate: «Badh'ami baIsilaɛli, nga ee yɛu, inde anopi mbombi? Bosotumii iso anu nga éma sina? Boaki bende, nto nde atambi nde a ekanda l'asu besu nganga na bonja l'asu mosá la Mokonga?
13 Nndag'a nde bo. Mokonga mmbe ma Abolaimu, mmbe ma Isaka na mmbe ma Yakɔbɔ na Mokonga mmbe ma bàtata† asu yɛu antukumisi nkɔbɛ nde maɛ Yesu. Benu nganga ai bomóbisi na ngana l'aɛ mosá la mɔamɛ Pilatɔ, nangɛ sinde ai n'aye ate ankodɛgɛ nee. 14 Domi-li ndɔ, benu ai bonngani Yesu, mbhumani na nto a domi, aba bokónda nde bende, bankodɛgɛ anu nde mojiji†. 15 Ìbo yɛu, ai bommóisisi, Amɛn'a-Lenda, mpa Mokonga ab'anjujusa angal'a bàku. Ai bɛɔni indɔ na iso asu nde. 16 A yɔnga la boosobela la ina a Yesu, ina ndɔ yɛu ankándisigi nto nde bonenga na bomúbha nde. Na boosobela ndɔ yɛu nde ammòi bolamisi sinde bɔɔna nee mosá l'anu nde.
17 Mpa badh'ami, neúbha bende, benu na bakama nde banu, ai bɔkɔli indɔ nde makanga úbha. 18 A nde bende: Mokonga akidisi yɔnga nde ai mɛnɔ n'aye ayɔngɛli ang'a baúbhilili nde baɛ bɔbhu bende, Masia nde maɛ anoba† lɛ. 19 Ang'a indɔ, atɔlɛli botiɛ meema anu, na bonsianelɛ Mokonga nga, alimɛ ilɔlɔ nd'anu. 20 Mpa, Mokama anopa mande mbènɔ a yombia, na antea mande anu Masia, yɛ Yesu, mmbe ai n'aye mɛnɔ ansɔmbɔli anu. 21 Mpa a mbènɔ-li nde, atɔlɛli Kilisitɔ aikɛ na kobha, kida la esa nde Mokonga abɔngisaga mande nee éma-li bhulibhu. Indɔ yɛu Mokonga ai ayɔngɛli toa la kala na kala ang'a baúbhilili, bambhumani nde baɛ. 22 Nga, Mósa ai ayɔngi ate: ‹Mokama, Mokonga nde manu ammesa lɛ múbhilili bía eme angal'a badh'anu. Atɔlɛli bolebeɛ yɔnga bhulibhu nde anongodea lɛ. 23 Na nto na nto nde akɔ́ma lɛ ɔka la múbhilili ndɔ, bankatanisa lɛ na bato nde ba Mokonga na móa l'aɛ†.› 24 A nde bende baúbhilili bɔbhu toa la ang'a Samueli na bande babhii mbusa aɛ bɔbhu, ai balabhi yɔnga nde atesa ndiende nde. 25 Mɔkɔ̀ nde Mokonga ai agabhi nyɛnɛla l'a baúbhilili a nde a yɔnga l'anu. Na bɔdɔ̀i adha Nsaeɔ nde ai asáeani na bàtata anu, sinde ai anngodei na Abolaimu, ate: ‹Tesela la ɛbɔti† aɔ, mba bhulibhu nda na lɛɛngɔ baɔna mande ngɔga.› 26 Ang'a indɔ, a yɔnga l'anu mbɛɛ yɛu Mokonga anjujusi nkɔbɛ nde maɛ Yesu. Antei bhia gesa la ang'anu ntutu, a tia la nto moti-moti toa l'asii nd'aɛ nd'ajede.»