Pɛtɛlɔ na Yɔani batɔndɔlisa mosá la ntua mati nda sɔ̀a la yɔnga
4
Mpa, Pɛtɛlɔ na Yɔani ai n'aha bayɔngaga na bato wa, baɛlɛli na omi nde ma balangi a endu a Mokonga na baSadukayo aba bakidianaga. 2 Aba basunula kpɛɛ nga bende, Pɛtɛlɔ na Yɔani ai baegolisaga na tɔmila la bato bende, sinde Yesu ai ajujui nee a kukua, bàku bajujua lɛ. 3 Mpa, aba baedhunga, na maa l'abɔ asub'a ngɔmɔ kida la umauma nga, máni ai n'aye agɔgɔmani. 4 Bato batì, adha bande ai baɔki yɔnga la batetei, aba balebea yu. Na etángi abɔ ai bía ɛlufu itanɔ.5 Uma-li, baomi nde ba baYuda, bakpɛga na bangɛngɛlɛ a Tɔlati aba batulanaga naa Yɛlusalɛma. 6 Ai angal'abɔ Anasi, omi nde ma baɛlɛli, Kayafa, Yɔani, Alɛsandulɔ na bato batɔɔ nde ba mba nda mɔɛlɛli la mmbe mati. 7 Aba bammesa Pɛtɛlɔ na Yɔani mosá l'abɔ, na ulisaga l'abɔ bate: «A ekanda sina aɔ a ina a màni yɛu bɔkɔli éma ndɔ?» 8 Mpa, Pɛtɛlɔ n'atumi na Meema a Bobhu, ab'ansisila ate: «Benu bakama na bakpɛga, 9 bosoulisaga ndiende a yɔnga la ɛkɔli anja nde bɛnkɔlɛli n'dɔtu nde na a yɔnga la bolamisi aɛ. 10 Benu bɔbhu na baIsilaɛli bɔbhu boúbhɛ bende, n'dɔtu ndɔ alami na ame mosá l'anu n'akándigi nde, a nde a ekanda la ina a Yesu Kilisitɔ mma a Najalɛti, mmbe ai bɔnkɔkɛligi a mosalaba ndɔ. Mpa na Mokonga anjujusi a kukua. 11 Yesu a nde bía ɛtɛ nde Ketabo nda Mokonga akumii, ate: ‹Ɛtɛ nde benu bahìi-endu bɔkɔ́mi, aetii ɛtɛ la mmbe mati nda sikisa† la endu.› 12 Ago nnd'a we bolamisi ang'a nto matɔɔ, nga, a kusi a máni, nndaga we ina atɔɔ inde Mokonga aepi bato, inde aanga atɔa n'asolamisi.»
13 Bato nde bai a ntua ndɔ, ai aebangisi kpɛɛ ɔna la sinde Pɛtɛlɔ na Yɔani ai bayɔnga nee makanga bɔɔ. Ago na baúbha bende ba nde bato holoholo, bande nnd'ai basɔmi nangɛ kalasi atì. Aba baúbhilila bende bai batambi na Yesu. 14 Mpa sinde ai bamɔna nto nde ai alami ndɔ, n'ame áma imoti n'ibɔ, nyɔɔ abɔ ab'adaeteana. 15 Ang'a indɔ, aba baesosia bende, batoɛ a ntua la sɔ̀a la yɔnga ndɔ. Aba batìga na bayɔngisana nkunguan'abɔ, 16 bate: «Bɛɛkɔla bato nde nde boni? Nga, a tesela l'abɔ yɛu mbunde nde akɔlɛkani, bato bɔbhu nde ba Yɛlusalɛma baúbha indɔ hɛlɛ, na nnd'aanga bɛtɔa nganisa-li. 17 Nnd'atɔlɛli mbinɔ nde andandɛ kpɛɛ a meeme a bato. Mpa, beetisa nga, bankumisila-i go nto ina a Yesu.»
18 Aba baekoga go na kálelisa l'abɔ kpɛɛ bate: «Bosilia-i yɔnga na golisaga la bato a ina a Yesu ndɔ, nangɛ abɛ boni.» 19 Mpa, Pɛtɛlɔ na Yɔani aba baesisila bate: «Mbénɔ, a wani yɛu a nde domi mosá la Mokonga, sikisa l'anu, aɔ sikisa l'aɛ gɔɛ. Benu nganga yɛu bɔyɔngɛ. 20 Nga, besu nnd'aanga bɛtɔa dhaea la éma nde bɛɔni, na ɔka-li.» 21 Bato nde ba ntua, mbusa a tisa l'abɔ go kpɛɛ, aba baedoa. Nnd'ai baɔni inde aanga aangisa na baenobisi nga, bato bɔbhu ai bambhebha Mokonga a yɔnga la éma nde ai akɔlɛkani. 22 Domi, n'dɔtu nde ai alami na mbunde ndɔ, ai na elemɔ nyɛna la ekomi ini.
Bande banebei Yesu bammɛma Mokonga
23 Mbènɔ nde baedu nee, Pɛtɛlɔ na Yɔani aba basiana ga dhonda la badh'abɔ. Aba baɛtɔmilaga yɔnga nde baomi nde ba baɛlɛli na bakpɛga ai baengodei. 24 N'ibɔ mbusa a ɔka la indɔ, aba bammɛma Mokonga na meema imoti bate: «Mokama, owɛ yɛu oi ɔtɛlɛkisi kobha na dodo, ngɛji na éma bhulibhu nde a asubi†. 25 Owɛ yɛu oi ɔyɔngi yɔnga nde a ekanda la Meema a Bobhu, a nyɔɔ a tata asu mɔamɛ Daudi, nkɔbɛ nde maɔ bende:
‹Nga éma sina yɛu bato nde ba n'ɛkɔngɔ bhulibhu nda na lɛɛngɔ bajaji bende?
Ago nga éma sina yɛu bato baikili masa kɔla la éma boobo nde?
26 Nga, baamɛ nde ba na lɛɛngɔ baɛsɔlɔliaga a emani,
bakama batulanigi
a manisa la Mokama na mɔamɛ, mmbe Mokonga ai ansɔmbɔli†.›
27 A nde domi, mɔamɛ Ɛlɔdɛ na mokama Pɔntiɔ Pilatɔ áma imoti na bato nde ba Isilaɛli na bato nde ba lɛɛngɔ atɔɔ ai batulanigi asub'a bɔma nde, masa a yɔnga la dhunga la Yesu, mbhumani na nkɔbɛ nde maɔ mmbe oi ɔnsɔmbɔli abɛ Masia†. 28 Ai batulanigi a kɔla la éma nde ai mɛnɔ n'aye ɔyɔngi kala bende, akida lɛ. 29 Mpa, Mokama, ɔɔnɛ to sinde aye bakɛngɛtisi nee tisa l'asu nde. Osopɛ, besu bakɔbɛ nde baɔ, ekanda la tɔmiaga la yɔnga nd'aɔ makanga bɔɔ. 30 Osoangianɛ ekanda l'aɔ la bolamisi, oóbelisɛ mbunde na ekesɔ a ina a nkɔbɛ na mbhumani nde maɔ Yesu.» 31 Mbènɔ nde bagɔbi nee mɛma, mpuɔ nde ai batulanigi be ndɔ ab'adengaga. Bɔbhu aba batuma na Meema a Bobhu, mpa aba batɔmiaga yɔnga nda Mokonga makanga bɔɔ.
Bande banebei Yesu babuaga nkumba nd'abɔ a nkunguan'abɔ
32 Na mɔlɔndɔ a bande bai banebei Yesu bɔbhu bai na meema imoti, na maakɔ imoti. Nnd'ai angal'abɔ na nto nde ayɔnga bende, nkumba namɔ yunde eme nganga. Nkumba nde bai nee bhulibhu ai nd'abɔ bɔbhu†. 33 A nde a ekanda mati yɛu, batetei ai batɔndɔlisa yɔnga la jujua la Mokama Yesu a kukua. Na Mokonga ab'agesa boangɔ mati ang'a bɔbhu. 34 Nnd'ai angal'abɔ mmbe ai abóli éma. Nga, nto nde ai a na tio, na endu, ai asómbisa na bhia la na ntondɔ nde atosi au, 35 ab'abhísa a njaga a batetei. Mpa, aba bam'buia nto na nto sinde ai nee bungu.