Anania na Safela
5
Ai wa moo moti mmbe ai bankoga bate Anania, ina a nkaɛ n'a nde Safela. Ai balebeisani a sómbisa la tio abɔ. 2 Mbusa-li, ab'asɔmɛa aɛ adha ntondɔ-li na nkaɛ n'iyɛ n'alebei, ab'aga agabha sakela-li ang'a batetei. 3 Mpa Pɛtɛlɔ ab'amulisa ate: «Anania dh'ami! Nga boni nde Sitani angi a meema aɔ bende†? Ondhemi Meema Mbhumani, na ɔsɔmɛi adha ntondɔ nde atoi na tio aɔ. 4 Mpa, mosá la sómbisa-li nndag'ai ind'aɔ? Ago mbusa a sómbisa-li, nndag'ai ɔɔng'ɔkɔla ntondɔ-li na éma nde meema aɔ akóndi? Nga boni yɛu olamoli kɔla la ìbo? Nnd'oodhemi nde bato, ondhemi nde Mokonga.» 5 A ɔka la indɔ, Anania ab'agua a dodo na kua. Bɔɔ mati ab'aebaa bato bɔbhu bande ai baɔki yɔnga ndɔ. 6 Mbusa-li, baluana aba banyangaga kiinda aɛ na tabhu, aba bankumba ga úmba l'aɛ.7 Mbusa a mbènɔ bía isalɔ, nka-Anania ab'angia, mpa nnd'ai aúbha inde ai ankidii munyaɛ. 8 Pɛtɛlɔ ab'amulisa ate: «Omongodeɛ, adhuma bosómbisi tio anu masa ìbo?» Yɛ iyɛ ate: «A masa ìbo.» 9 Éme Pɛtɛlɔ ate: «Nga boni yɛu owɛ na munyaɔ botulanisi maakɔ anu a dɔnga la Meema a Mokama? Olengɛ to! Bande bamúmbi munyaɔ bá kala na mpume na baokumba na owɛ.» 10 A mbènɔ ndɔ, ab'akua nkpanda na gua la ego la Pɛtɛlɔ. Baluana ndɔ aba bangia aba bandhonda n'aku. Aba bakumba kiinda aɛ na ga úmba-li a mpiti a munyaɛ. 11 Bɔɔ mati ab'aebaa bato a kanisà na bɔbhu nde ai baɔki adha yɔnga ndɔ.
Óbela la ekesɔ atì
12 Mbunde na ekesɔ atì ai akɔlɛkana a meeme a bato toa l'a njaga a batetei. Na bɔbhu ai bá na maakɔ imoti asub'a inde bakoga bate ntua nda Mɔamɛ Sɔlɔmɔnɔ†. 13 Nnd'ai we matɔɔ mmbe nndag'a boio abɔ mmbe ai akèngea tulana la na ibɔ, mpa bato ai baebhebha kpɛɛ. 14 Da-mɔlɔndɔ a baboo na bake bande ai banebea Yesu, ai babhia na bataleana a boio abɔ. 15 A yɔnga la indɔ, bato aba baebhia na bajegi na baekumbi a ntata ekà aɔ a kelakɔ, aba baebhísa a asii-sii nga mbènɔ a nyɛna la Pɛtɛlɔ, kosà kudu aɛ ambhɛdia moti angal'abɔ. 16 Ago mɔlɔndɔ a bato ai batoa a nji-nji nde atimbigi Yɛlusalɛma. Aba baebhia na bajegi batì na bande baketi ai baenobisa, bɔbhu aba balama.
Batetei bamɔni mokpata
17 Mpa, omi nde ma baɛlɛli na bande ai bá n'iyɛ, a nde bende bɔbhu nde bai a boio a baSadukayo, aba bakua boso la batetei. 18 Aba baedhunga na maa l'abɔ asub'a ngɔmɔ mati. 19 Mpa kiia malaeka nde ma Mokama ab'aukua mpume a ngɔmɔ-li, ab'aeóbisa batetei ndɔ na ngodea l'abɔ ate: 20 «Bogɛ a endu a Mokonga, bɔɔtɔmilɛ bato yɔnga la lenda nde.» 21 Batetei aba balebea. Uma-uma kpɛɛ aba baga n'endu a Mokonga aba bakɛngɛtisa golisa la bato. Mbusa indɔ, omi nde ma baɛlɛli na bande ai bá n'iyɛ, aba baetulisana bakpɛga nde ba baYuda na ntua la mmbe mati la sɔ̀a la yɔnga. Aba batea bato ga bɛsa la batetei.
22 Mpa mbènɔ nde balangi a endu a Mokonga bakidi nee be, aba baebóla asub'a ngɔmɔ-li, aba basiana na ga yɔnga la bate: 23 «Bedhondi na bakpemi ngɔmɔ-li masa hɛlɛ, na balangi-li bame masa mosá-li, mpa mbènɔ nde adhu beukuu, nnda bendhondi naa nto asubi.» 24 Mpa omi nde ma balangi a endu a Mokonga na baomi nde ba baɛlɛli ɔka la yɔnga ndɔ, maamaa ab'aebaa. Aba baulisana a mbinɔ a batetei bate mbénɔ yɔnga ndɔ asía nde iboni. 25 Mpa, nto moti ab'aóbela na ngodea l'abɔ ate: «Bɔmɔɔkɛ to! Bato nde adhuma boonyangi ndɔ, bá n'endu a Mokonga, bame na baegolisa bato.»
26 Omi nde ma balangi a endu a Mokonga ab'aga na bato nde baɛ ga bhia la na batetei. Aba baebhia nee makanga ekanda-kanda, nga ai baétea bato bende baemaela-i ɛtɛ. 27 Mbusa a bhia l'abɔ nee, aba baebhísa a meeme a ntua mati la sɔ̀a la yɔnga. Mɔɛlɛli la mmbe mati ab'aeulisa ate: 28 «Nndag'ai n'aye benokálelisi kpɛɛ golisa la ina a nku-ganja ndɔ? Mpa bɔɔnɛ to sinde botumisi Yɛlusalɛma na egolisi nd'anu, na bokaba bhísa la makaje a kukua la nto ndɔ nde ang'asu!†» 29 Pɛtɛlɔ na batetei aba baesisila bate: «Atɔlɛli gɔɛ nde ɔka la Mokonga, kanga bato. 30 Mokonga nde ma bàtata asu ai anjujusi Yesu toa la asub'a kukua, mmbe benu ai bɔnkɔkɛligi a mosalaba na bommói. 31 Iyɛ, Mokonga ab'ammòa boumu na bhísa l'aɛ a njaga aɛ nd'akpɛ, abɛ Omi na Namisi, nga bato nde ba Isilaɛli batiɛ meema abɔ na Mokonga alimisɛ ilɔlɔ nd'abɔ. 32 Be nde bàtɔndɔlisi a yɔnga ndɔ, besu na Meema Mbhumani nde Mokonga aepi bande bansikisa.»
33 Ɔka la indɔ, bato nde ba ntua mati la sɔ̀a yɔnga ndɔ ab'aesumba kpɛɛ, aba bakaba sinde aanga baemóa na batetei. 34 Mpa ai angal'abɔ moFalisayo moti mmbe ai bankoga bate Gamaliɛlia, ngolisi a Tɔlati, mmbe bato bɔbhu ai bansikisi. Ab'ama a meeme a ntua-li n'ayɔnga bende baeóbisɛ mbɛɛ batetei na ntanga. 35 Emesunga n'iyɛ ate: «Badh'ami baIsilaɛli, bolengelelɛ kpɛɛ yɔnga nde bokaba bote bɔɛkɔlɛlɛ bato nde. 36 Nga, alɛbhi-mbɛ, nto moti nde bankoga bate Teudasi, mmbe ai aebhebha ate a nde nto mati, bato bía eyana ini ai bam'belei. Mpa ai bammói, bande ai bam'belea bɔbhu aba baanjana na boio ndɔ ab'asía. 37 Mbusa mmbɔ, a elemɔ a etángi a bato, Yuda nde maa Galilaya ab'aóbela, ai agee na bato batì. Mpa aba bammóa n'iyɛ na bande ai bam'belea bɔbhu n'ibɔ aba baanjana. 38 Mpa, mbènɔ-mbènɔ nde nenongodea bende: Bodoanɛ mbɛɛ na bato nde, boedoɛ bagɛ. Nga, nabana maakɔ na nkási nd'abɔ a nde nda koto, aesília. 39 Mpa nabana atoa masa ang'a Mokonga, nnd'aanga bɔtɔisa tíndisa l'abɔ. Kɔkɔ̀, abhia-i aɔnɛana bende bommanisa Mokonga.» Mbusa a indɔ aba baɔka yɔnga la Gamaliɛli. 40 Aba baekoga batetei, aba baebɛtisisa na kálelisa l'abɔ bende, basilia-i lɛ kumia la ina a Yesu, mpa aba baedoa. 41 Batetei aba batoa a ntua ndɔ, na bajangi a inde Mokonga asɔ̀i bende baenobisɛ na bhɔnisa l'abɔ a yɔnga la ina a Yesu. 42 A esa-li bhulibhu, asub'a endu a Mokonga na a kela endu, ai bagolisa makanga yombia na labha la Mbinɔ Anja nda Yesu Masia.