Baɛsɔmbɔli baboo sobe-lalɔ a tabela la batetei
6
A mbènɔ ndɔ, etángi a bàgoli ai aga n'abía. BaYuda nde bayɔnga kiGiliki, aba baɛchɔchɔkɛla bande bayɔnga keEbhalania, bate: bamekusa nde babɔ ai baebosela esa-li bhulibhu a mbènɔ a bua la eléa nd'abɔa. 2 Bande bamɔkɔ́ na babale ndɔ aba baetulisana bàgoli-li bɔbhu na ngodea l'abɔ bate: «Nnd'aanga abá anja na bedu labha la yɔnga nda Mokonga a yɔnga la gabhea la bato eléa. 3 Ang'a indɔ badh'asu, bɔɔsɔmbɔlɛ angal'anu baboo sobe-lalɔ bande bá na tambela anja, bande batumi na Meema Mbhumani na bɔɛngɛ, beekumbisɛ nkási ndɔ. 4 Na besu, beegabha asub'a ɛmɛmi na nkási a labha la yɔnga nda Mokonga.» 5 Yɔnga ndɔ ab'aɛbɔngɛla bato bɔbhu. Aba baɛsɔmbɔla Sitɛfanɔ, nto nde atumi na boosobela na Meema Mbhumani, Filipɔ, Pɔlɔkɔlɔ, Nikanɔlɔ, Timoni, Palɛmɛna, Nikɔla nde maa Andiokia mmbe ai aetiili kala a belea la esomba nda baYuda. 6 Aba baebhísa mosá la batetei, aba bammɛma Mokonga na gesa la njaga antat'abɔ.7 Iwa, yɔnga nda Mokonga ab'andanda, na etángi a bàgoli ab'abía kpɛɛ asub'a Yɛlusalɛma. Baɛlɛli batì n'ibɔ aba banebea Yesu.
Dhunga la Sitɛfanɔ
8 Mpa Sitɛfanɔ, nto a boangɔ n'ekanda ai akɔla ekesɔ na mbunde atì a meeme a bato. 9 Mpa baYuda batɔɔ aba bakɛngɛtisa kakatana la n'iyɛ. Ai batoi nde a endu a sinagogi nde ai bakoga bate: «Bakɔbɛ nde baekodigi»b ndɔ, a Kulɛnɛ, na Alɛsandulia, na Kilikia, na Ajia. 10 Mpa kanga bende bantɔisi, nga ai ayɔnga na bɔɛngɛ nde Meema Mbhumani ai ammòa.
11 Aba baepa bato ntondɔ nga bayɔngɛ bende: «Adhu bɛmɔki n'amɔtaga Mósa na Mokonga†!» 12 Aba baɛjɔjɔlisa bato, bakpɛga na bangɛngɛlɛ a Tɔlati. Aba bandhunga Sitɛfanɔ na bhia l'aɛ nee a meeme a ntua mati ndɔ. 13 Aba baebhia wa na bàtɔndɔlisi a mbéa, aba bayɔnga bate: «Nto nde nnd'aloa na yɔnga l'ajede a endu a Mokonga na Tɔlati. 14 Adhuma bɛmɔki n'ayɔnga ate Yesu nde maa Najaleti agbɔla mande endu a Mokonga nde, na tia la nkani nde ai bɛdɔ̀i toa la kala ang'a Mósa.» 15 Bande ai baiki a ntua ndɔ, aba bantumia Sitɛfanɔ iso, aba baɔna iso aɛ n'aetii bía ind'a malaeka.