Ɛkɔli 7

Sitɛfanɔ alabhi asub'a ntua mati nda sɔ̀a la yɔnga

Mɔɛlɛli la mmbe mati ab'amulisa Sitɛfanɔ ate: «Inde bayɔnga ang'aɔ nde a nde domi?» 2 Emesunga n'iyɛ ate: «Baebha na badh'ami, bɔmɔɔkɛ to! Mokonga, amɛnɛ a boumu ai amóbeli tata asu Abolaimu n'aha a lɛɛngɔ a Mɛjɔpɔtamia, n'agee-mbɛ aika a bɔma nda Alani. 3 Ab'anngodea ate: ‹Otoɛ a lɛɛngɔ aɔ na a mba nd'aɔ, ogɛ a lɛɛngɔ nde neoangelisa mande.›  4 Abolaimu ab'ai atoa a lɛɛngɔ a baKaladea na ga ika la Alani. Ab'ai atoa we mbusa a kukua la abhaɛ, Mokonga ab'amumisa kida l'a nji nde bo au mbènɔ nde. 5 Nnd'ai ammòi naa nyia-dodo, nɛngɛbɛ áma a bhísa la ego l'aɛ. Mpa Mokonga ab'ahahola bende ammòa lɛɛngɔ nde, na bende ɛbɔti aɛ alɛ baika au mbusa aɛ. Iwa Abolaimu na abi-mbɛ na nii. 6 Mpa, inde yɛu Mokonga ai anngodei: ‹Ɛbɔti aɔ alɛ baika a lɛɛngɔ a bato batɔɔ, alɛ baetia bakɔbɛ, na bato nde ba lɛɛngɔ ndɔ alɛ banobisa ɛbɔti aɔ a elemɔ eyana ini. 7 Mpa lɛɛngɔ nde alɛ aetia ban'aɔ bía bakɔbɛ ndɔ, nɛsɔ̀a lɛ yu, eme, Mokonga. Mbusa a indɔ, ban'aɔ alɛ batoa iwe bhia bhebha l'ami a mpuɔ nde.› 8 Ago Mokonga aba basáana na Abolaimu. Mbunde a nsáeɔ ndɔ n'a nde gua la ganja. Ìbo yɛu Abolaimu ai amɔnisi naɛ Isaka a kia la ind'a lalɔ mbusa a bɔtɛana l'aɛ. Na Isaka ab'angusa Yakɔbɔ ganja, na Yakɔbɔ ab'akɔla ìbo ang'a ban'aɛ mɔkɔ́ na babale^a.

9 Bàtata asu ndɔ, aba bakua boso la Yɔjɛfu na sómbisa l'aɛ bía nkɔbɛ naa Misili. Mpa kanga bende Mokonga an'du. 10 Ab'amóloisa asub'a enobɔ bhulibhu. Ab'ampa Yɔjɛfu boangɔ na bɔɛngɛ a iso a Falaɔ, mɔamɛ nde ma Misili. Mmbe ab'ammesa Yɔjɛfu bía nsɔndɔlisi a mɛlɛa la Misili na endu a mɔamɛ bhulibhu. 11 Nja ab'agua asub'a Misili bhulibhu na Kanana. Bato aba banoba kpɛɛ na bàtata asu nnd'ai ye baɔna eléa. 12 Mbènɔ nde Yakɔbɔ ai aɔki bende naa Misili a we nganɔ, ab'aétea bàtata asu gɛndɔ la ind'a imoti. 13 A nkobà la ind'a ibale, Yɔjɛfu ab'aengodisa ang'a badh'aɛ, Falaɔ ab'aúbha tine a mba nda Yɔjɛfu. 14 Mpa Yɔjɛfu ab'aétea bende bagɛ bankabɛ abhabɔ Yakɔbɔ, na mba nd'abɔ bhulibhu, a nde yɔnga la bende bato ekomi sobe-lalɔ na batanɔ. 15 Yakɔbɔ ab'aga naa Misili, ab'akulia we na bàtata asu ndɔ n'ibɔ. 16 Ai bakumbila kiinda abɔ naa Sekemu na ga úmba-li a bhota nde Abolaimu ai n'aye asómbi kala na ntondɔ ang'a bana-Amoli baamɛnɛ a Sekemu^†.

17 Mbènɔ nde inde Mokonga ai anàki Abolaimu ai bhi-bhi la óbela, etángi a bàtata asu ai n'aye abii kpɛɛ naa Misili. 18 Mpa, mɔamɛ matɔɔ mmbe nndag'ai amúbhi Yɔjɛfu ab'abhia asenga antata Misili. 19 Mɔamɛ ndɔ, ab'adhema ekita nd'asu na nobisa la bàtata asu n'aesosia bende baɛdɔlɛlanɛ bambɛnjɛ nde babɔ nga bakuɛ^†. 20 A elemɔ ndɔ Mósa n'iyɛ ab'abɔtɛana. Ai nde nyia-mbɛnjɛ manja kpɛɛ ye mɛnɔ. Amáɛ ab'amungisa a mɔsɛla isalɔ na mɔtɛ a abhaɛ^†. 21 Mbènɔ nde babɔti aɛ ban'dɔlɛlani nee, nyike nde ma Falaɔ, ab'ammɔtisa bía naɛ. 22 Aba bangolisa Mósa asub'a bɔɛngɛ bhulibhu nda asub'a Misili, ab'aetia nto a ekanda a yɔnga l'aɛ na a ɛkɔli aɛ. 23 Mbènɔ nde elemɔ aɛ akidi nee ekomi ini, ab'alamola ga ɔna la batob'aɛ baIsilaɛli. 24 Mósa ab'amɔna adha batob'aɛ moti moMisili n'annobisa, ab'angàmela dh'aɛ ndɔ, na móa la moMisili ndɔ. 25 Mósa ai akànisa ate badh'aɛ aanga baúbha bende Mokonga aelamisa a nyɛnɛla la ang'aɛ. Mpa n'ibɔ kanga bende baúbhi indɔ. 26 Uma-li, Mósa ab'aedhonda baIsilaɛli babale na bamana, ab'akaba juanisa l'abɔ, ab'aengodea ate: ‹Badh'ami bo nde bato a sɔɔ imoti, nga boni yɛu bonobisana bende?› 27 Mpa mmbe ai anobisa dh'aɛ ndɔ, ab'ankuna Mósa ate: ‹Màni yɛu aobhísi bía mokama na nsɔ̀i nde masu? 28 Okaba nde móa l'ami sinde odhuma ommói na moMisili uma ndɔ?› 29 Mósa ɔka la yɔnga ndɔ, ab'atateela a lɛɛngɔ a baMidiani. Io ab'aika bía ntambi, na bɔtɛla la we baní babale^†.

30 Mbusa a elemɔ ekomi ini, malaeka moti ab'amóbela Mósa a ngalagɛ a mpiti a mamba a Sinai. Iwa, ab'aɔna esasa nde alola na nsa. 31 Mósa, ɔna la indɔ, aba am'bangisa. Mpa ab'asɛdɛa a mpiti-li nga aɔnɛ hɛlɛ, moyo a Mokama ab'ankidia bende: 32 ‹Eme ne nde Mokonga nde ma bàtata aɔ, Mokonga nde ma Abolaimu, mmbe ma Isaka bona Yakɔbɔ.› Mósa ab'apupa na bɔɔ, nnd'ai ye akèngei lenga la iwe. 33 Mpa Mokama ab'anngodea ate: ‹Otosɛ to belatɔ nd'aɔ, nga áma nde ome nde, a nde mpuɔ namɔ. 34 Nɛɔni sinde baenobisa nee bato nde bamɔ naa Misili. Aye nɛɔki ngámɔ abɔ na nebhii áma oloisa l'abɔ. Ogɛ to, neotea naa Misili.›

35 A nde Mósa nde moti ndɔ yɛu mbɔ batob'aɛ ai bankɔ́mi bate: ‹Màni yɛu aobhísi bía omi na nsɔ̀i-yɔnga?› Mokonga ab'antea bía omi na namisi nde mabɔ, a nyɛnɛla la ang'a malaeka nde ai amóbeli a esasa. 36 Mósa ndɔ yɛu ai aetosi baIsilaɛli naa Misili n'akɔla ekesɔ na mbunde iweli, asub'a Ngɛji Matì nd'Anju na asub'a ngalagɛ a elemɔ ekomi ini^†. 37 Ago a nde Mósa nde yɛu ai aengodei baIsilaɛli bende: ‹Mokonga antea mande anu múbhilili bía eme, mmbe abá mande nto nde maa mba nd'anu^†.› 38 A mbènɔ nde baIsilaɛli ai batulani nee a ngalagɛ ndɔ, ago a masa Mósa yɛ mbɔ ai ame a meeme a bàtata asu na malaeka nde ai ayɔnga n'iyɛ antat'a mamba a Sinai. Ab'ai adɔ̀a yɔnga la lenda nda Mokonga, n'iyɛ ab'asɔnyɛnisila yu^†.

39 Mpa kanga bende bàtata asu bakóndi ɔka l'aɛ. Aba bankálea na bá la na maakɔ a siana la Misili^†. 40 Aba banngodea Aluni bate: ‹Ɔɛkɔkɔtiɛ asu baesòmba nde abá batamba mosá l'asu nga, nnda beúbha inde ankidii nku-nde Mósa nde ai asotosi nee Misili ndɔ^†.› 41 Mpa aba bankɔkɔtia esomba nde ankèngi nyia-ntɛ. Aba bankɔ̀mɛaga nyia-ntɛ ndɔ, aba bakɔla dinyɛ la jangea la ɛkɔli nd'abɔ^†. 42 Mokonga aɔni bo, ab'aebubatea na doa l'abɔ bende babhebhɛ máni, mɔsɛla na balɛlɛngɔa, sinde ketabo nda baúbhilili ayɔngi nee bende:

‹Benu bato nde ba Isilaɛli sa! Boaki bote bɔɛmbɔ a banyama

na atɔɔ nde adhuma bɔkɔ̀mɛaga

na ngalagɛ a elemɔ ekomi ini ndɔ adhuma bɔkɔ̀mɛaga nde ang'ami?

43 Iisi, ai bokumbi nde hɛma nda esomba Mɔlɛki^b

na lɛlɛngɔa la esomba nde manu Lɛfani^c,

elimelime a éma nde ai bɔkɔkɔtii a bhebha-li.

Ang'a indɔ yɛu aangisi nenotolisa mande dhɔlɔ nyɛna la lɛɛngɔ a Babilɔni^†.›

44 Sitɛfanɔ ab'asùilila yɔnga bende, asub'a ngalagɛ o, bàtata asu ai baga na hɛma nde ai aɔngiana bende Mokonga a na ibɔ. Mokonga ai n'aye ansosii Mósa bende, akɔkɔtiɛ yu nde sinde ai amɔngiani nee. 45 Mpa, batata asu ndɔ, a bɔsɔndɔlisi a Yosua, aba bakumba hɛma ndɔ. N'ibɔ aba babhia nee a lɛɛngɔ nde ai bauli ang'a bato batɔɔ, bande Mokonga ai aebèi mosá la bàtata asu. Ìbo yɛu hɛma ndɔ ab'atíga a lɛɛngɔ nde, kida la elemɔ nda mɔamɛ Daudi^†. 46 Daudi ab'adɔ̀a boangɔ a iso a Mokonga na mɛma la bende ankɔkɔtiilɛ Mokonga nde ma Yakɔbɔ áma ika^†. 47 Sɔlɔmɔnɔ yɛu ai anhìili endu-li^†. 48 Mpa Mokonga mmbe maa n'egoo kpɛɛ nnd'aki aika a endu nde bato bahìi. Sinde múbhilili ayɔngi ne ate:

49 ‹Mokonga ayɔngi bende: N'egoo a nde mbata namɔ l'ɛbɔamɛ, na dodo a nde n'dɛtɛlɔ namɔ.

Mambala endu sina yɛu bokaba hìila l'ami?

Iwani yɛu aanga neyombia?

50 Nndag'ai nɛkɔli indɔ bhulibhu nde na njaga ami^†?›»

51 Sitɛfanɔ ab'aengodea go bato nde ba ntua Mati ate: «Benu bato a meema akpɛ nde sa! Benu nde meema na etue l'anu adegeani a nkogɔ nda Mokonga, esa-li bhulibhu bonngoisa masa Meema a Bobhu! Bo nde bía bàtata anu! 52 Mawani angal'a baúbhilili yɛu bàtata anu nnd'ai bannobisi? Ai baɛɔ́li bande ai balabhi bhia la Nto a Domi ndɔ. Benu mpa go ayunde bomóbisi na móa l'aɛ^†. 53 Benu nde ai bɔdɔ̀i maanɔ nda Mokonga a nyɛnɛla la ang'a bamalaeka^d, mpa kanga bende bolebei yu!»

Kukua la Sitɛfanɔ

54 Ɔka la indɔ, baYuda, bande bai a ntua ndɔ, aba banjuma na bosunulɔ, na bataua minyɔ abɔ ang'a Sitɛfanɔ. 55 Mpa iyɛ n'atumi na Meema Mbhumani ab'atumia iso aɛ na kobha. Ab'aɔna boumu nda Mokonga na Yesu n'ame a njaga aɛ ind'akpɛ. 56 Ab'aengodea ate: «Ayunde nɛɔna kobha n'aeukuu nde, na Muna-Nto n'ame a njaga nd'akpɛ nda Mokonga.» 57 Aba bakála na moyo enda kpɛɛ na dega l'etue l'abɔ. Bɔbhu aba bankindibia Sitɛfanɔ. 58 Aba bankumbatana nee a ngba la nji-li nga, bammóɛ na bammaela ɛtɛ. Bàtɔndɔlisi a yɔnga ndɔ aba badoa ngɔmbɛ nd'abɔ a mpiti a ego la muluana moti mmbe bankoga bate Saulɔ ndɔ. 59 N'aha bam'bɛta Sitɛfanɔ n'ɛtɛ ndɔ, n'iyɛ n'amɛma ate: «Mokama Yesu, ɔbɛsɛ meema ami.» 60 Ab'abúna moo-a-kuu l'aɛ na láka la kpɛɛ ate: «Mokama, obhísa-i ilɔlɔ nde ang'abɔ^†!» Mbusa a yɔnga la indɔ ab'adhaa.