8
Mpa, Saulɔ a nde adha bande ai bálebei kukua la Sitɛfanɔ†.Saulɔ anobisa kanisà
A esa ndɔ, baYuda aba bakɛngɛtisa nobisa la kanisà nda Yɛlusalɛma kpɛɛ. Ang'a indɔ, bande ai banebei Kilisitɔ bɔbhu aba baanjana a lɛɛngɔ a Yudɛa na Samalia. Masa batetei yɛu aba batìga naa Yɛlusalɛma. 2 Bato nde bantea Mokonga aba bamúmba Sitɛfanɔ, na aba bangámea kpɛɛ.
3 Mpa Saulɔ iyɛ ab'akɛngɛtisa tíndisa la bato a kanisà. Ai angia a endu na endu n'aedhunga baboo na bake na maa l'abɔ asub'a ngɔmɔ†.
Filipɔ atɔmiaga Mbinɔ Anja naa Samalia
4 Mpa, bato a kanisà nde ai baanjani ndɔ, bai batɔmiaga Mbinɔ Anja naande ai baga nee. 5 Filipɔ ab'aga a bɔma nda Samalia, ab'aelabhela bato nde ba we yɔnga nda Masia. 6 Na mɔlɔndɔ a bato nde ai baɔkanea yɔnga nde Filipɔ ayɔnga, na ɔna la mbunde nde ai aóbelisa ndɔ. 7 A nde bende, baketi batì ai batoa ang'a bajegi na baláka kpɛɛ. Bato nde ngobho abɔ ai n'aye aku na badɔtu batì aba balama. 8 Ang'a indɔ, bato nde ba bɔma ndɔ aba bajanga kpɛɛ.
9 A mbènɔ ndɔ, ai asub'a bɔma ndɔ go nto moti, ina aɛ n'a nde Simoni. Ai n'aye aiki we mosá na ai aboka ekumi. Ai aóbelisa mbunde nde ai aebangisa bato nde ba Samalia. Ai aebhebha ate a nde nto mati. 10 Bato bɔbhu, toa la ang'a baní na kida la ang'a bakpɛga ai bamɔkanea kpɛɛ. Na bagea bate: «Abhɔi nde a nde ekanda nda Mokonga inde bakoga bate ‹Ekanda Mati.›» 11 Bato batì ai bamɔkanea nga, toa la kala, ekumi nd'aɛ ai aebangisa bato. 12 Mpa, mbènɔ nde Filipɔ abhii alabha nee Mbinɔ Anja a yɔnga la ɛbɔamɛ nda Mokonga na a yɔnga la ina a Yesu Kilisitɔ, baboo na bake aba balebea indɔ na aba baendiisisa. 13 Nangɛ Simoni n'iyɛ ab'anebea Yesu, aba banndiisa. Na nnd'ai ye badoani na Filipɔ. Ab'aɔna mbunde na éma la bangisana atì nde ai akɔlɛkani a njaga aɛ, indɔ aba am'bangisa kpɛɛ.
14 Batetei nde bai naa Yɛlusalɛma, ɔka la sinde bato nde ba Samalia bálebei na yɔnga nda Mokonga, aba baétea abɔ Pɛtɛlɔ na Yɔani. 15 Mbènɔ nde bandɔ bakidi nee we, aba bammɛma Mokonga a yɔnga la baSamalia bende nga, Meema a Bobhu abhiɛ antat'abɔ. 16 A nde bende, nnd'a angal'abɔ mmbe Meema a Bobhu ai n'aye asìmi antat'aɛ, ai baendiisi masa a ina a Mokama Yesu. 17 Mpa, Pɛtɛlɔ na Yɔani ai babhísi njaga antat'abɔ, na Meema a Bobhu ab'aesìmia. 18 Simoni ndɔ, aɔni ye sinde Mokonga aebuiaga bato Meema a Bobhu mbènɔ nde batetei ai baebhísia nee njaga, ab'abhia a batetei na ntondɔ, 19 ate: «Bomopɛi n'eme adha ekanda nde, nga bende, mmbe nembhísia njaga, Meema a Bobhu abhiɛ ang'a nto ndɔ.» 20 Pɛtɛlɔ ab'ansisila ate: «Mmbɛ botìndi ha, owɛ na ntondɔ nd'aɔ ndɔ! Nga bende, oaki ote oong'osómba egabhɔ nda Mokonga na ntondɔ! 21 Nndaga o na éma ani nangɛ nnd'aanga odhadeana na besu a nkási nde. Nga, maakɔ aɔ nndaga anja mosá la Mokonga. 22 Ang'a indɔ, otiɛi meema aɔ toa l'a bujede ndɔ, ɔmmɛmɛ Mokama. Ngɛte, aanga alilia maakɔ nd'ajede nde o nee a meema aɔ ndɔ. 23 A nde bende, nɛɔni sinde boso aojului nee kpɛɛ. O nde nkɔbɛ la ilɔlɔ.» 24 Emesunga na Simoni ate: «Bɔmmɛmɛi Mokama benu nganga a yɔnga l'ami nga bende, éma nde bomokumisili ndɔ, adh'au amokidia-i.» 25 Pɛtɛlɔ na Yɔani, mbusa a gɔba la tɔndɔlisa na labha la yɔnga la Mokama, aba basiana naa Yɛlusalɛma. N'aha bá na asii, aba batɔmiaga Mbinɔ Anja nda Mokonga a nji atì nda baSamalia.
Filipɔ na nto nde maa Ɛtiɔpia
26 Mpa malaeka nde ma Mokama ab'anngodea Filipɔ ate: «Omɛ, ogɛ saka mpasɔ a asii nde aye akóki ndɔ, inde adhidha toa la Yɛlusalɛma ga kida la bɔma nda Gaja.» 27 Filipɔ ab'ama na ga. N'aha na asii, moo moti nde maa Ɛtiɔpia, nkɔbɛ matia ab'antulanisa. Iyɛ, ai nde nangi a ntondɔ bhulibhu nda Kandakɛb, mɔamɛ la nke mmbe maa Ɛtiɔpia. Nto ndɔ ai n'aye akidi Yɛlusalɛma ga bhebha la Mokonga. 28 A siana l'aɛ nɔngɔ aɛ, n'aiki a amalungudha nd'aɛ, n'asɔma ketabo nda múbhilili Isaya. 29 Meema a Bobhu ab'anngodea Filipɔ ate: «Ɔsɛdɛɛ mpiti a amalungudha ndɔ.» 30 Filipɔ ab'akamisaga sɛdɛa l'a mpiti-li, ab'amɔka nto nde maa Ɛtiɔpia ndɔ n'asɔma ketabo nda múbhilili Isaya. Ab'amulisa ate: «Mbinɔ nde ɔsɔma ndɔ, ɔɔka yu?» 31 Emesunga n'iyɛ ate: «Na nnd'a be nto nde amɔsɔndɔlisila yu, mpa aanga nɛɔka nde iboni?» Ab'ankoga Filipɔ bende adaɛ na baikɛ n'iyɛ. 32 Nto ndɔ n'adhu asɔma áma nde baandeki bate:
«i bía mboli nde aga bansɛ́nga,
ab'adhaa bía nyia-mboli mosá la nto nde an'dua.
Nnd'ai atáti.
33 Ai bankusisi soni a uma l'aɛ domi nd'aɛ.
Màni yɛu aanga atɔmia mande mbinɔ a ɛbɔti aɛ?
Nga, ai bantosi na lɛɛngɔ†.»
34 Nkɔbɛ mati ndɔ ab'amulisa Filipɔ ate: «Belebele, omongodeɛ to, mbénɔ múbhilili ndɔ ankumia nde nto sina? Aekumia nde iyɛ nganga aɔ nto matɔɔ?» 35 Mpa, Filipɔ ab'akɛngɛtisa tɔmila l'aɛ Mbinɔ Anja nda Yesu, kɛngɛtisila la moandekɔ nde nto ndɔ asɔma ndɔ. 36 Aba baga mosá na tamba nd'abɔ, aba bakida áma nde íbo a be. Nkɔbɛ mati ndɔ ab'anngodea ate: «Lengɛ to! Íbo a ani, éma sina yɛu aanga aangisa na nnd'omondiisi?» [ 37 Emesunga na Filipɔ ate: «Nabana olebei asub'a meema aɔ domi, aanga neondiisa.» Mpa nto ndɔ ab'ansisila ate: «Nelebei bende Yesu Kilisitɔ a nde Muna-Mokonga.»]c 38 Mpa, nkɔbɛ mati ndɔ ab'amesisa amalungudha nd'aɛ, babale l'abɔ aba badhidha asub'a íbo, Filipɔ ab'anndiisa. 39 Mbènɔ nde batoi nee subi, Meema a Mokama ab'ankumba Filipɔ. Nkɔbɛ ndɔ nnd'ai ye amɔni adha iyɛ. Ab'aga mosá na tamba nd'aɛ n'a na bujɛmɛ. 40 Mpa, Filipɔ ab'atua n'a nde Ajɔtɔ†, ab'aga akida a bɔma nda Kaisalia n'atɔmiaga Mbinɔ Anja a mpuɔ bhulibhu.