Ɛkɔli 9

Saulɔ anebei Mokama Yesu

A mbènɔ ndɔ, Saulɔ ai aika masa n'aaka tisa na móa la bàgoli nde ba Mokama. Ab'aga nɔngɔ a omi nde ma baɛlɛli, 2 ab'ammɛma baloa a ngia-li nee a endu a sinagogi nda Damasiki nga bende, nabana aedhondi bato, baboo na bake, bande batamba a asii nda Mokama^†, aenyangɛ, na ga l'abɔ nee naa Yɛlusalɛma. 3 N'aha na asii, n'atutiaga Damasiki, nkobà imoti, njenja ab'atoa na kobha bo njuaaa! Ab'antimbilaga. 4 Saulɔ ab'agua a dodo, ab'aɔka moyo n'anngodea ate: «Saulɔ, Saulɔ, omonobisila nde éma sina?» 5 N'iyɛ ab'amulisa ate: «Mokama, o nde màni?» Mokama ab'ansisila ate: «Ne nde Yesu, eme yɛu mbɔ omonobisa ndɔ. 6 Mpa, omɛ, ogɛ na bɔma. Io baongodea ndende éma nde atɔlɛli ɔkɔlɛ». 7 Bato nde bai batamba n'iyɛ, aba bama masa bo sii. Ai baɔka moyo, makanga ɔna la nto. 8 Saulɔ ab'aemesia a dodo, ab'akoda iso, na nnda aye aɔna. Mpa, aba bandhungilaga a njaga, na ngia l'aɛ nee Damasiki. 9 Ab'ala kia isalɔ, makanga ɔna, makanga léa nangɛ noa la íbo.

10 A mbènɔ ndɔ, ngolì moti ai naa Damasiki, ina aɛ n'a nde Anania^a. Mokama ab'amóbela a njei, ab'ankoga: «Anania!» Emesunga na Anania ate: «Eme yɛ mbe, Mokama». 11 Mokama ab'anngodea ate: «Omɛ, ogɛ nɔngɔ a Yuda, a asii nde bakoga bate Lìma. Iwa, onkabɛ nto moti, ina aɛ a nde Saulɔ nto nde maa bɔma nda Talasɔ. A nde bende, mbènɔ nde, iyɛ ammɛma Mokonga. 12 Adhu amɔni nto moti a njei, mmbe bankoga bate Anania, n'angia, ab'abhísa njaga antat'aɛ nga bende aɔnɛ go». 13 Mpa, Anania ab'ansisila ate: «Mokama, bato batì aye bamɔtɔmili yɔnga la nto ndɔ na bujede bhulibhu nde aɛkɔlɛli bato nde baɔ naa Yɛlusalɛma. 14 Baomi nde ba baɛlɛli, bammòi bokama l'a bhia nyanga la bato bɔbhu nde bakoga ina aɔ.» 15 Emesunga na Mokama ate: «Ogɛ masa, aye nɛnsɔmbɔli nto ndɔ nga, abɛ nkɔbɛ nde mamɔ a úbhisa la ina ami ang'a bato nde ba lɛɛngɔ bhulibhu na baamɛ nde babɔ, nangɛ ang'a baIsilaɛli. 16 A nde bende, na eme nɛmɔngiana mande enobɔ bhulibhu nde atɔlɛli aɔnɛ a yɔnga la ina ami.» 17 Mpa, Anania ab'aga. Ab'angia n'endu, ab'abhísa njaga antat'a Saulɔ, ab'anngodea ate: «Saulɔ dh'ami, Mokama Yesu, mmbe auma aoóbeli na asii, n'aha obhia ndɔ yɛu amotei nɔngɔ aɔ nga bende, ɔɔnɛ go na otumɛ na Meema a Bobhu.» 18 Nkobà imoti, éma bía kpɛjɛ ab'agua toa l'a iso a Saulɔ. N'iyɛ, ab'aɔna go. Mpa, ab'ama na ab'aga banndiisa. 19 Mbusa indɔ, ab'aléa eléa, na ngobho aɛ ab'akándaga.

Saulɔ alabha yɔnga la Mokonga naa Damasiki

Saulɔ ab'aika na bàgoli kia n'ɛdɛ naa Damasiki. 20 Nkobà imoti, ab'akɛngɛtisa labha la Yesu a endu a sinagogi bende, mmbe a nde Muna-Mokonga. 21 Bato bɔbhu bande bai bamɔki, ab'aebangisa kpɛɛ, aba baulisanaga bate: «Nndaga mmbe yɛu auma akaba gɔbɛlaga la bato nde bammɛma Mokonga a ina a Yesu? Nnd'abhii go ani nde bhia nyanga la bato na ga l'abɔ nee mosá la baomi nde ba baɛlɛli?» 22 Mpa, bolabhɛ nda Saulɔ ai aga n'angbama go kpɛɛ. BaYuda nde ba Damasiki nnd'ai ye bá na yɔnga nde bansisila ɔna la sinde ai aeangiani bende Yesu a nde Masia.

23 Mbusa a kia ngbota, baYuda aba balebeisana bende balimɛ ànga aɛ. 24 Saulɔ ab'aɔka adha man'diɛ nd'abɔ ndɔ. Ai banamba, kiia n'etonge, na mpume l'a nji, a kaba la lima la ànga aɛ. 25 Ang'a indɔ, kiia, bàgoli nde baɛ aba banngisa asub'a da-jɔ^† nde ai banyangi na ngolí. Mbusa-li, aba basìmisa jɔ-li bhale a ebòmbo a nji-li, na ga l'aɛ.

Saulɔ asiani naa Yɛlusalɛma

26 Akidi ye naa Yɛlusalɛma o, ab'akèngea juana la na bàgoli. Bɔbhu ai na balebei-mbɛ domi bende ai aetii ngolì nde ma Yesu. Indɔ yɛu ai aangisi na bantea. 27 Balanaba ab'antabela Saulɔ, ab'anga nee mosá la batetei. Ab'aɛtɔmila sinde Saulɔ ai amɔni na Mokama asub'a asii, na sinde Mokama ai ayɔngi n'iyɛ. Ab'aɛtɔmila go sinde Saulɔ ai alabhi nee a ina a Yesu makanga bɔɔ naa Damasiki. 28 Toa la mbènɔ ndɔ, Saulɔ ab'aika na batetei, n'aga n'asiana naa Yɛlusalɛma, n'alabha a ina a Mokama makanga bɔɔ. 29 Ai go ayɔngaga na kakatanaga na baYuda nde ai bayɔnga eluu nda baGiliki. Bandɔ ai bakaba limisa la ànga aɛ. 30 Mbènɔ nde bakilisitɔ badh'aɛ baɔki na man'diɛ ndɔ, aba bam'bɛsa, aba bandhidha nee naa Kaisalia. Mpa aba bantea naa Talasɔ.

31 Mpa Kanisà nda Yudɛa bhuu, Galilaya, na Samalia ab'akɔlɔmana. Ab'amɔta asub'a boosobela na sikisa la Mokama nga, Meema a Bobhu ai adhodeisa meema abɔ na etángi abɔ ai abía kpɛɛ.

Pɛtɛlɔ anamisi Ainɛa

32 Abɛsi ndɔ, Pɛtɛlɔ ai atambaga asub'a lɛɛngɔ ndɔ bhulibhu. Esa imoti, ab'aga naa bɔma nda Luda, ga lenga la bakilisitɔ nde ai baiki we. 33 Io, ab'andhonda moo moti ina aɛ Ainɛa, mmbe ai ale a kelakɔ nd'aɛ a elemɔ lalɔ, ngobho aɛ na nnd'aye mɛnɔ alemana. 34 Pɛtɛlɔ ab'anngodea ate: «Yesu Kilisitɔ aolamisi. Mɛ to! Ɔsɔlɔliɛ kelakɔ nd'aɔ». Makanga lɛbha, Ainɛa ab'ama. 35 Mbènɔ nde bato nde ba Luda na bato nde ba lɛɛngɔ a Salɔni bɔbhu bamɔni nee n'alami, aba baetiisila ang'a Mokama.

Pɛtɛlɔ anjujusi Tabita a kukua

36 A bɔma nda Yɔpa, ai we nke moti ngolì, ina aɛ n'a nde Tabita mmbe bankoga a eluu nda baGiliki bate «Dɔlika», na indɔ a nde yɔnga la bende «Kuuha». Ai akɔla ɛkɔli anja-nja atì, na tabela la bato nde bá na bungu. 37 A elemɔ ndɔ, ab'ajega, ab'akua. Mpa, aba basosa ngobho aɛ, aba babhísa yu n'endu, a mpuɔ l'inda gulu^b. 38 Bagolì nde ba Yɔpa ai baɔki bende, Pɛtɛlɔ a Luda nga, nji nde a bhi-bhi la nji nd'abɔ nda Yɔpa^c. Ang'a indɔ, aba baétea baboo babale na mbinɔ bende: «Belebele, obhiɛ nɔngɔ asu dia kanga lɛbha.» 39 Pɛtɛlɔ ab'akamisaga ga la n'ibɔ. Kida l'aɛ we, aba banga nee n'egoo asub'endu ndɔ. Bamekusa bɔbhu aba bama mosá la Pɛtɛlɔ na bagáma, aba bamɔngia nkanjo na ngɔmbɛ bhulibhu nde Dɔlika ai akɔkɔtii na aku-mbɛ. 40 Mpa, Pɛtɛlɔ ab'aeóbisa bato bɔbhu na nsɛngɛ, ab'aluta moo-a-kuu l'aɛ, ab'ammɛma Mokonga. Mbusa-li, ab'aetiisanela áma kiinda-li, ab'ayɔnga ate: «Tabita, mɛ to!» Tabita ab'akoda iso. Amɔni ye Pɛtɛlɔ, ab'aika ntundulu. 41 Pɛtɛlɔ ab'andhunga a njaga, na mesa l'aɛ. Mpa, ab'aekoga bakilisitɔ na bamekusa bɔbhu, ab'aɛɔngia Tabita n'aɔnɛa. 42 Yɔnga ndɔ ab'aúbhianana naa Yɔpa bhulibhu. Ang'a indɔ, bato batì aba banebea Mokama. 43 Pɛtɛlɔ ab'aika elie atì naa Yɔpa nɔngɔ a Simoni, m'bambi-ngɔbi.