Kɔlɔnɛliɔ ankogi Pɛtɛlɔ na mɔtɛ aɛ
10
A bɔma nda Kaisalia, ai we moo moti ina aɛ n'a nde Kɔlɔnɛliɔ. Ai nde omi nde ma batayo la basoda. Ina a boio ndɔ ai nde: «Batayo nda Italia». 2 Ai alenda asub'a sikisa la Mokonga na tea l'aɛ, iyɛ na bato nde ba mba nd'aɛ bɔbhu. Ai aetabela bayɛnɛ kpɛɛ na mɛma la Mokonga makanga doa. 3 Esa imoti, a yenga la máni, ab'amɔna malaeka nde ma Mokonga a njei hɛlɛ n'angia nɔngɔ aɛ. Malaeka ndɔ ab'ankoga ate: «Kɔlɔnɛliɔ ee!» 4 Kɔlɔnɛliɔ ab'antumia iso, bɔɔ aba am'baa. Ab'anngodea ate: «Obhii nde boni, Mokama?» Emesunga na malaeka ndɔ ate: «Mokonga aɔki ɛmɛmi nd'aɔ na lebea la ɛkɔli nde ɔɔkɔlɛla bayɛnɛ. Ang'a indɔ, aokanisi. 5 Mbènɔ nde mpa, oéteɛ baboo naa Yɔpa, agɛ bambhiɛ na nto moti Simoni, mmbe bankoga bate Pɛtɛlɔ. 6 Aiki na mɔtɛ a Simoni la mmbe matɔɔ, m'bambi-ngɔbi, endu aɛ aiki a nkpalɔ a ngɛji ndɔ». 7 Malaeka nde ai bayɔngaga n'iyɛ ndɔ ab'aga. Mpa Kɔlɔnɛliɔ ab'aekoga adha bakɔbɛ nde baɛ babale na soda moti, adha bande baki bá bhi-bhi l'aɛ kpɛɛ, mmbe ansikisa Mokonga. 8 Kɔlɔnɛliɔ ab'aɛtɔmilaga yɔnga bhulibhu nde ai aóbeli. Mpa, ab'aétea naa Yɔpa.9 Uma-li, bato nde Kɔlɔnɛliɔ ai aétei n'aha bá na asii, na batutiaga bɔma nda Yɔpa, yɛ Pɛtɛlɔ ab'adaa a mpuɔ l'inda gulu a endu, ga mɛma la Mokonga. Ai nde bía meeme a etonge. 10 N'aha amɛma wa, nja ab'ambhɛda, ab'akua sei a eléa. N'aha baɔ́mbana aɛ, ab'aɔta njei. 11 Ab'aɔna kobha n'aeukuu. Éma bía da-ngɔmbɛ nde aesanji ab'adhidha na dodo, na bakpɛii yu a saka ini-li bhuu. 12 Asubi n'a au mambala banyama bɔbhu nde bá na ego ini na bande badala a dodo na bambabu nde ba n'egoo. 13 Mpa, ab'aɔka moyo a nto n'anngodea ate: «Pɛtɛlɔ, omɛ, ɔsɛ́ngɛ na oléɛ.» 14 Pɛtɛlɔ ab'ansisila ate: «Mokama, indɔ nnd'aanga akòka! Nga, neli-mbɛ mɛnɔ nginisɔ na eléa nde aujuani†.» 15 Ab'aɔka go moyo ndɔ a nkobà l'inda ibale ate: «Éma nde Mokonga alebei bende beléɛ, nnd'oongo ogea bende a ajede†.» 16 Njei ndɔ ab'asiliaga nkobà isalɔ. Makanga lɛbha, éma ndɔ ab'atália na kobha.
17 Pɛtɛlɔ ab'asaimana na ai aeulisa inde njei nde ai aɔni ndɔ, akaba yɔnga. Na a mbènɔ ndɔ, kesi bato nde Kɔlɔnɛliɔ ai aétei ga úbha la áma nde endu a Simoni aleɔ, na bame kala a mpume-li. 18 Aba bakoga na ulisa la bate: «Iani yɛu Simoni mmbe bankoga bate Pɛtɛlɔ ndɔ aiki?» 19 Pɛtɛlɔ n'aha aaka a yɔnga la njei ndɔ, Meema a Bobhu ab'anngodea ate: «Bato basalɔ bá bande baokabaga nde. 20 Mpa, omɛ, odhidhɛ na ogɛ n'ibɔ makanga maamaa. Nga, eme yɛu neétei.» 21 Mpa, Pɛtɛlɔ ab'adhidha a mpiti a baboo ndɔ, ab'aengodea ate: «Eme yɛ mbe, mmbe bonkabaga. Bobhilii nde éma sina?» 22 Baboo ndɔ aba bansisila bate: «Kɔlɔnɛliɔ, omi nde ma basoda, yɛu asotei. A nde nto a domi na mmbe antea Mokonga. BaYuda bɔbhu bayɔnga hɛlɛ ang'aɛ kpɛɛ. Malaeka nde ma Mokonga anngodei bende, aokogɛ nɔngɔ aɛ nga, aɔkɛ adha yɔnga nde onngodea.» 23 Ang'a indɔ, Pɛtɛlɔ ab'aengisa n'endu, aba bala wa.
Uma-li, aba babaa tamba, na Pɛtɛlɔ ab'aga n'ibɔ. Na adha bakilisitɔ nde ba Yɔpa aba baga n'ibɔ. 24 Bha-uma-li, aba bakida Kaisalia, aba baga na mɔtɛ a Kɔlɔnɛliɔ. Iyɛ n'adhu aebondelaga áma imoti na batob'aɛ, na badh'aɛ niina nde ai n'aye aekogisisi. 25 Mbènɔ nde Pɛtɛlɔ akabi nee ngia, Kɔlɔnɛliɔ ab'abhia ansesea. Ab'aluta moo-a-kuu l'aɛ, endondo aɛ ab'adhɔa dodo mosá la Pɛtɛlɔ. 26 Mpa, Pɛtɛlɔ ab'ammesa na ngodea l'aɛ ate: «Kɔlɔnɛliɔ, omɛ! Na eme ne nde nto bía owɛ.» 27 Aba bangia n'endu na baambolaga. Iwa, Pɛtɛlɔ ab'aedhonda bato batì na batulanigi. 28 Ab'aengodea ate: «Boúbha bende Tɔlati nd'asu ankɔ́misi moYuda sɔlɔmana la na nto nde maa lɛɛngɔ atɔɔ, nangɛ ika la n'iyɛ áma imoti. Mpa, Mokonga amɔɔngii bende, nndaga atɔlɛli nɛmɔnɛ nto bía éma nde aujuani aɔ nginisɔ. 29 Indɔ yɛu aangisi, nndaga adhu nɛchɔchɔki bhia a mbènɔ nde adhu bootei bato ga kaba l'ami. Mpa, nekabi nte neúbhɛ inde adhu aangisi agɛ bomokabisisɛ.» 30 Kɔlɔnɛliɔ ab'ansisila ate: «Aye anyɛni kia isalɔ, a mbènɔ bía inde, a yenga la máni, auma nɛmmɛma Mokonga n'endu ami. Nkobà imoti, nto ab'amoóbela n'alɔli ngɔmbɛ nde aɛniaga. 31 Ab'amongodea ate: ‹Kɔlɔnɛliɔ, Mokonga aɔki ɛmɛmi nd'aɔ, akanisi ɛkɔli nde ɔɔkɔlɛli bayɛnɛ ndɔ. 32 Mpa, oéteɛ bato naa Yɔpa, bagɛ bambhiɛ na Simoni, mmbe bankoga bate Pɛtɛlɔ. Aiki na mɔtɛ a Simoni, mmbe m'bambi-ngɔbi ndɔ, endu aɛ aiki a nkpalɔ a ngɛji.› 33 Dia ndɔ, adhu neétei bato ga koga l'aɔ. Osingani kida. Mbènɔ nde, besu bɔbhu be ye mosá la Mokonga a ɔka la yɔnga bhulibhu nde Mokama aotei bhia ngodea l'asu.»
Bolabhɛ nda Pɛtɛlɔ nɔngɔ a Kɔlɔnɛliɔ
34 Mpa, Pɛtɛlɔ ab'akɛngɛtisa yɔnga ate: «Aye neúbhi domi bende, Mokonga nnd'aanga ambhaa nto†, 35 mpa gɔɛ bato nde ba lɛɛngɔ bhulibhu, bande bansikisi Mokonga na kɔla la inde a nde domi, bandɔ yɛu bam'bɔngɛli Mokonga. 36 Ai atei yɔnga l'aɛ ang'a baIsilaɛli, n'aelabhela Mbinɔ Anja la bujɛmɛ† nyɛnɛla la ang'a Yesu Kilisitɔ, mmbe a nde Mokama nde ma bato bɔbhu. 37 Benu boúbha yɔnga nde ai aóbeli a Yudɛa bhuu, inde ai akɛngɛtisi naa Galilaya mbusa a Yɔani labhela la bato bende, baendiisisɛ. 38 Boúbha go sinde Mokonga ai ansɔmbɔli na Yesu nde maa Najalɛti, ab'ammòa Meema aɛ na ekanda nd'aɛ. Boúbha go sinde Yesu ai atambi nee a mpuɔ bhulibhu n'akɔla éma anja-nja, n'aelamisa bato nde bai asub'a bɔkɔbɛ nda Nketi. Nga, Mokonga ai áma imoti n'iyɛ. 39 Na besu, be nde bàtɔndɔlisi a éma bhulibhu nde Yesu ai akɔli naa Yɛlusalɛma na a nji bhuu nda baYuda. Ai bammói yɛ a kɔkɛlaga l'aɛ a mee a mosalaba. 40 Mpa, a esa l'inda isalɔ, Mokonga ab'anjujusa a kukua. Na ai antɔisisi ɔnɛana ang'a bato. 41 Kanga ang'a bato-li bɔbhu, mpa gɔɛ ang'a bande Mokonga ai aɛsɔmbɔli mosá bende, babɛ bàtɔndɔlisi nde baɛ. A nde bende ang'asu nde ai beléani na noa la áma imoti n'iyɛ mbusa a jujua l'aɛ a kukua†. 42 Ai asososii labha la Mbinɔ Anja ang'a bato na tɔndɔlisa la bende, mmbe yɛu a nde mmbe Mokonga ammesi a sɔ̀a la yɔnga nda bato bɔbhu, bande baɔnɛa na bande báku. 43 Baúbhilili bɔbhu ai bayɔngi ang'aɛ bate, nto na nto mmbe anebea, Mokonga agɛgia mande ilɔlɔ nd'aɛ a ekanda la ina a Yesu†.»
Meema a Bobhu aesìmii bato nde nndaga baYuda
44 Pɛtɛlɔ n'aha ayɔnga indɔ, Meema a Bobhu ab'asìma antat'a bato bɔbhu nde ai baɔka yɔnga l'aɛ. 45 Ab'aebangisa kpɛɛ baYuda nde ai banebei Yesu, bande ai babhii na Pɛtɛlɔ ndɔ nga bende, Mokonga adui Meema a Bobhu nangɛ ang'a bande nndaga baYuda. 46 A nde bende, ai baɛɔka na bayɔnga eluu atɔɔ na bambhebha Mokonga. Mpa, Pɛtɛlɔ ab'agea ate: 47 «Bato nde aye bá na Meema a Bobhu bía besu. Mpa, màni yɛu aanga atɔa n'akɔ́misi ndiisa l'abɔ a íbo?» 48 Ang'a indɔ, ab'asosia bende baendiisɛ a ina a Yesu Kilisitɔ. Mbusa a ndiisa l'abɔ, aba bangámelaga Pɛtɛlɔ bende, aikɛ go n'ibɔ kia n'ɛdɛ.