Mosá la kanisà nda Yɛlusalɛma, Pɛtɛlɔ atɔmiaga yɔnga nde auma atesi ndɔ
11
Batetei na badh'abɔ asub'a Kilisitɔ, bande bá Yudɛa, aba baɔka bende, bande nndaga baYuda n'ibɔ bálebei yɔnga la Mokonga. 2 Mbènɔ nde Pɛtɛlɔ asiani ye naa Yɛlusalɛma, baYuda nde banebei Yesu aba bakakatana n'iyɛ, 3 bate: «Odhu ongi asub'endu a bàku-ganjaa na léana la n'ibɔ?» 4 Mpa, Pɛtɛlɔ ab'akɛngɛtisa tɔmilaga l'abɔ yɔnga-li bhulibhu moti-moti, ate: 5 «Nei a bɔma nda Yɔpa na nɛmmɛma Mokonga, aba nɛɔta njei. Aba nɛɔna éma bía da-ngɔmbɛ n'atoa na kobha, ab'adhidha mosá l'ami na bakpɛii yu a saka ini-li bhuu. 6 Aba nelengelela subi hɛlɛ, aba nɛɛɔna au mambala banyama bɔbhu, na banyama nde ba na ndula, bande badala na bambabu nde ba n'egoo. 7 Mpa, aba nɛɔka moyo a nto n'amongodea ate: ‹Pɛtɛlɔ, omɛ, ɔsɛ́ngɛ na oléɛ.› 8 Aba nensisila nte: ‹Mokama, indɔ nnd'aanga akòka! Nga, neli-mbɛ mɛnɔ nginisɔ na eléa nde aujuani.› 9 Aba go nɛɔka moyo ndɔ a nkobà l'inda ibale ate: ‹Éma nde Mokonga agii bende atɔlɛli léa-li, okumia-i mɛnɔ yu bende aujuani.› 10 Njei ndɔ ab'asiliaga nkobà isalɔ. Éma ndɔ bhulibhu ab'atália go na kobha. 11 Na mbènɔ-mbènɔ ndɔ, aba nɛɛɔna bato basalɔ, bande adhu baétei nɔngɔ ami toa la Kaisalia na bamege a iso a mpume a endu nde bedhu au. 12 Meema a Bobhu ab'amongodea bende, negɛ n'ibɔ makanga maamaa. Na badh'ami motoba nde bɔɔɔna nde, aba baga n'eme. Aba bekida naa Kaisalia na besu bɔbhu aba bengia n'endu a moo ndɔ. 13 Mmbe, auma asɔtɔmili sinde ai amɔni na malaeka n'amege n'endu aɛ na ngodea l'aɛ ate: ‹Oéteɛ bato naa Yɔpa, agɛ bankabɛ Simoni, mmbe bankoga bate Pɛtɛlɔ ndɔ. 14 Aongodea mande yɔnga nde aolamisa, owɛ na bato bɔbhu nde ba mba nd'aɔ.› 15 Mbènɔ nde nɛkɛngɛtisi nee yɔnga, Meema a Bobhu ab'asìma antat'abɔ sinde na besu ai asosìmii nee mosá. 16 Aba nekanisa mpa yɔnga nde Mokama ai ayɔngi ate: ‹Yɔani ai aendiisi bato asub'a íbo. Mpa benu, Mokonga anondiisa gɔɛ mande nde na Meema a Bobhu†.› 17 Ìbo ndɔ, nabana Mokonga aepi bato ndɔ mambala egabhɔ nde ai asopi besu mbènɔ nde benebei nee Mokama Yesu Kilisitɔ, mpa, eme nei nde màni nga, nengoisɛ inde Mokonga akaba kɔla-li?» 18 Mbusa a ɔka la indɔ, bɔbhu aba badhaa. Aba bambhebha Mokonga, bate: «A nde domi, Mokonga aukui asii nangɛ ang'a bato nde nndaga baYuda nga, batiɛ meema abɔ, na bá la na lenda la mɛyɔ.»Kɛngɛtisa la kanisà nda Andiokia
19 Mpa bande ai baanjeanib a yɔnga la enobɔ nde ai atoeli a kukua la Sitɛfanɔ, aba baga batɔɔ naa kesanga a Kipulɔ na batɔɔ go a nji nda Andiokiac. N'ibɔ ai batɔmiaga yɔnga nda Mokonga masa ang'a baYuda. 20 Mpa, adh'abɔ bai nde bato nde ba a kesanga a Kipulɔ na bande ba a ɛkɔngɔ a Kulɛnɛ. Aba baga Andiokia ga tɔmiaga la Mbinɔ Anja nda Mokama Yesu nangɛ ang'a bande nndaga baYuda. 21 Ekanda la Mokonga ai n'ibɔ. Ang'a indɔ, bato batì aba banebea Mokama na belea l'aɛ. 22 Bato nde ba kanisà nda Yɛlusalɛma aba baɔka indɔ, aba bantea mpa Balanaba bende agɛ naa Andiokia. 23 N'iyɛ ab'akida we na ɔna la nkási nde Mokonga ai akɔli a meeme a bato ndɔ, a boangɔ nd'aɛ. Ab'ajanga. Mpa, ab'adhodeisa meema a bato bɔbhu, na ngodea l'abɔ ate: «Bondhungililɛ Mokama na meema anu bhulibhu.» 24 Balanaba n'iyɛ ai nde nto manja, n'atumi na Meema a Bobhu, n'a na boosobela. A yɔnga la indɔ, ngbota a bato aba batɔdɛana ang'a Mokama.
25 Mpa, Balanaba ab'aga a bɔma nda Talasɔ, ga kabaga la Saulɔ. 26 Mbènɔ nde andhondi nee, ab'ansiana nee Andiokia. Io, ai bangɔbi ngbuluana elemɔ moti na batulana asub'a kanisà na golisa la mɔlɔndɔ a bato batì. Naa Andiokia yɛu ai bakɛngɛtisi koga la bàgoli bende bakilisitɔ. 27 A elemɔ ndɔ, baúbhilili aba batoa Yɛlusalɛma, aba baga bakida Andiokia. 28 Adh'abɔ moti ina aɛ Agabɔ, Meema a Bobhu ab'anhahamisa tɔmia la bende nja mati agua mbènɔ-mbènɔ nde a lɛɛngɔ bhulibhu. Nja ndɔ ai agu nde a mbènɔ nde Kɔlɔdiɔ ai nde Kaisali, mɔamɛ nde maa Lɔmad. 29 Mpa, bàgoli nde ba Andiokia aba balebeisana bende, nto na nto agabhɛ inde aanga atɔisa, bakɛbɛɛ yu ga tabela la badh'abɔ nde baiki naa Yudɛa. 30 Aba bakɔla bo. Inde ai basɔngiigi, aba bakɛbɛa yu na Balanaba bona Saulɔ nga, baepɛ bakpɛga nde ba kanisà nda Yudɛa.