Ɛlɔdɛ ammóisisi Yakɔbɔ na maa la Pɛtɛlɔ a ngɔmɔ
12
A elemɔ ndɔ, mɔamɛ Ɛlɔdɛa ab'akɛngɛtisa nobisa la adha bato a kanisà. 2 Ab'ammóisisa Yakɔbɔ muna-amá-Yɔani na molima. 3 Mbusa a kɔla la ìbo, na ɔna la bende indɔ aɛbɔngɛla baYuda, ab'aga dhɔlɔ na nkási ndɔ, ga dhungisisa la Pɛtɛlɔ n'iyɛ, a mbènɔ a dinyɛ a mokate makanga masau†. 4 Mbusa a dhungisisa l'aɛ, Ɛlɔdɛ ab'ammaa asub'a ngɔmɔ, ab'agesa boio ini nde abuanigi au basoda báni-báni a langa l'aɛ. Ai aaka bende ansɔ̀a mande mosá la bato-li bɔbhu mbusa a Pasaka. 5 Ìbo, aba bananga Pɛtɛlɔ asub'a ngɔmɔ ndɔ, mpa bato nde bá na kanisà aba bammɛma Mokonga na mouɔ a yɔnga l'aɛ.Malaeka antosi Pɛtɛlɔ asub'a ngɔmɔ
6 A kiia la esa nde Ɛlɔdɛ ai akabi ate ansɔ̀ɛ nee mosá la bato-li bɔbhu, Pɛtɛlɔ ai ale a nsɔlɔ a basoda babale. Ai bannyangi na nkɔndɔ́ ibale na bàlangi ai balanga mpume a ngɔmɔ-li. 7 Balɛbhanigi ndɔ, malaeka nde ma Mokama ab'amóbela Pɛtɛlɔ, sangala ab'agɔba endu-li. Malaeka ndɔ ab'ansugbaga Pɛtɛlɔ, na jujusa l'aɛ ate: «Omɛ dia!» Iwa nkɔndɔ́ ndɔ ab'agua toa l'a njaga aɛ. 8 Malaeka ab'anngodea ate: «Oetìgɛ to bopa nd'aɔ na ɔlɔlɛ sandasanda nd'aɔ.» Pɛtɛlɔ ab'amɔka. Malaeka ndɔ ab'anngodea go ate: «Ɔlɔlɛ kɔti nd'aɔ na omobeleɛ.» 9 Pɛtɛlɔ ab'aóba asub'a ngɔmɔ-li n'am'belea malaeka ndɔ. Nnd'ai aúbha bende inde malaeka ndɔ akɔla a nde domi, n'aaka nde bende a asub'a njei. 10 Aba banyɛna mokange nda imoti na ind'a ibale. Aba baga bakida a mpume a ngɔa nda óbela la na nji. Ekuku-li ab'aeukua iyu amɛnɛ mosá l'abɔ. Aba baóba na ntanga, na nyɛna l'a nyia-mpalɛ, makanga lɛbha, malaeka ndɔ aba an'doa Pɛtɛlɔ.
11 Mbusa indɔ, Pɛtɛlɔ ab'aúbha bende yɔnga ndɔ adhu nde domi, ab'ayɔnga ate: «Neúbhi mpa bende kesi Mokama adhu amɔkɛbɛi malaeka nde maɛ, amotosi asub'a njaga a Ɛlɔdɛ na asub'a bujede bhulibhu nde baYuda adhuma bamoakela.»
12 Mbusa a kanisá, ab'aga na mɔtɛ a Malia, amá-Yɔani mmbe ai bampaka na ina a Malekɔ ndɔ. Ngbota a bato ai batulani be a mɛma la Mokonga. 13 Kida la be, Pɛtɛlɔ ab'akɔgɔlisa mpume-li, nto a nkási nyike moti ina aɛ n'a nde Lɔda, ab'aga aɔkanea. 14 Ɔka la bende a nde Pɛtɛlɔ, kanga bende aukuu mpume-li a yɔnga la bujɛmɛ. Ab'atatea sub'a endu-li ga ngodea la bande batɔɔ bende Pɛtɛlɔ akidi na ntanga. 15 N'ibɔ aba banngodea bate: «O nde ngesile ee!» Iyɛ ab'asùilila masa bende a nde Pɛtɛlɔ. Aba bayɔnga bende: «Hoo! A nde malaeka nde maɛ.» 16 Mpa Pɛtɛlɔ ab'agɛlɛanaga n'iyɛ masa a kɔgɔlisa la mpume-li. Ukua la mpume-li, aba bamɔna, ab'aebangisa kpɛɛ. 17 Pɛtɛlɔ ab'aedhaisa na njaga, ab'aɛtɔmila sinde Mokama adhu amóbisi asub'a ngɔmɔ-li. Ab'ayɔnga go ate: «Bogɛ bɔntɔmilɛ Yakɔbɔb na badh'asu batɔɔ yɔnga nde.» Ab'aóba na ga la áma atɔɔ. 18 A sa la máni, basoda ndɔ aba basanga. Nkokoto mati ab'aóbela a nkunguan'abɔ na bagea bate: «Mbénɔ Pɛtɛlɔ akɔlani nde iboni?» 19 Ɛlɔdɛ ab'aétea bato bende bagɛ bankabɛ Pɛtɛlɔ, mpa kanga bende bamɔni. Ab'aeulisaga bàlangi ndɔ, na sosia la bende baɛɔ́lɛ. Mpa, ab'atoa Yudɛa na dhidhila la Kaisalia ab'aga aika io mbènɔ ɛdɛ.
Kukua la mɔamɛ Ɛlɔdɛ
20 Yɛ Ɛlɔdɛ ai aesunulili kpɛɛ bato nde ba lɛɛngɔ a Tilɔ na Sidɔni. Mpa bande ai balenda nde na eléa nde ai atoa a nji aɛ. Aba balebeisana ga kida la mosá l'aɛ. Aba baga nɔngɔ a Balasɔtɔ omi nde ma bande aki bakɔ̀misaga áma-la nda mɔamɛ. Aba bangámelaga bende aetabelɛ nga bagɛ bammɛmɛ mɔamɛ bɔkɔlɔ. 21 Kida la esa nde ai balamoli ndɔ, Ɛlɔdɛ ab'alɔla ngɔmbɛ nd'aɛ nd'ɛbɔamɛ, na ika l'a mbata l'ɛbɔamɛ ab'akɛngɛtisa boekanja mosá la bato ndɔ. 22 N'ibɔ aba bakoga kpɛɛ bate: «Mpa gɔɛ inde a nde moyo a Mokonga, nnd'aye nde nda nto†!» 23 Mbènɔ-mbènɔ ndɔ malaeka nde ma Mokama ab'am'bɛta Ɛlɔdɛ nga ai aeyei bokama nde a nde nda Mokonga, bandalangi aba banéa, na meema aɛ ab'akɔdɔac.