Bansɔmbɔli Saulɔ bona Balanaba
13
Asub'a kanisà nda Andiokia bai we baúbhilili na bàgolisi bía nto sunga na: Balanaba, Simɛɔni mmbe bankoga bate Nigɛlia, Lukiɔ mmbe maa Kulɛnɛ, Saulɔ na Manaɛni dh'aɛ na mɔamɛ Ɛlɔdɛb mmbe ma a konii. 2 Esa imoti, na bambhebha Mokama na baika makanga léa, Meema Mbhumani ab'aengodea ate: «Boebhísɛ mbamba Balanaba bona Saulɔ a nkási nde neekogeli.» 3 Mpa, mbusa a gɔba l'a ɛmɛmi na la la makanga léa, aba babhísa njaga antat'abɔ, aba baedoa, n'ibɔ aba baga abɔ. Balanaba bona Saulɔ balabha asub'a kesanga nda Kipulɔ
4 Meema Mbhumani ai aétei Balanaba bona Saulɔ, dhidhila la Seleukiac. Io, aba badaa a koko ga la naa kesanga nda Kipulɔ. 5 Kida la Salamina, aba baikila labha la yɔnga nda Mokonga asub'a endu a sinagogi nda baYuda. Ai batamba na Yɔani-Malekɔ a tabela l'abɔ. 6 Aba batɔmba kesanga ndɔ bhulibhu ga kida la Pafɔsi. Iwa aba bandhonda moYuda moti, nkumi n'aeyea boúbhilili, ina aɛ n'a nde: Bala-Yesu. 7 Nto ndɔ ai baika bona nsɔndɔlisi nde maa kesanga, yɛ Sɛgiɔ Pɔlɔ. Nsɔndɔlisi ndɔ ai nde nto a maɛnɛkɔ, ab'ankoga Balanaba bona Saulɔ nga, ai na sei a ɔka la yɔnga nda Mokonga. 8 Mpa nkumi Elima ndɔ (ìbo yɛu ina aɛ bakoga a kiGiliki) ab'akakatana n'ibɔ, n'akaba ketisa la maakɔ a nsɔndɔlisi nga, anebea-i Yesu. 9 Mpa Saulɔ, mmbe bankoga ago bate Pɔlɔd, ab'atuma na Meema Mbhumani, ab'atumia iso aɛ ang'aɛ, 10 na ngodea l'aɛ ate: «Owɛ nto a ebhete-bhete na man'diɛ, muna-Sitani, njiu a éma bhulibhu nde a anja! Nnd'olɛ olòa na tia la domi nda Mokama nde ame a lima nde? 11 Olengɛ to! Njaga a Mokama abá antat'aɔ, na owɛ obá mande timetime, na nnd'ɔlɛ ɔɔna iso a máni a esa ɛdɛ.» Masa a mbènɔ ndɔ, elie na dhoda ab'angulia, ab'atìmbaga n'ankabaga nto nde ambhɛda a njaga nga antambisɛ. 12 Nsɔndɔlisi ndɔ ɔna la inde ai akidi, aba am'bangisa a yɔnga l'egolisi nda Mokama, ab'anebea Yesu.
Pɔlɔ na Balanaba naa Andiokia a nji nda Pisidia
13 Pɔlɔ na badh'aɛ aba batoa naa Pafɔsi aba babɛsa koko na ga la Pɛlɛgɛ, a lɛɛngɔ a Pafilia. Yɔani Malekɔe ai aedu, ab'asiana naa Yɛlusalɛma. 14 Toa la Pɛlɛgɛ, aba bakida Andiokia nda lɛɛngɔ a Pisidia. Esa la sabato, aba bangia asub'a endu a sinagogi, aba baika a dodo. 15 Mbusa a sɔma asub'a ketabo a Tɔlati na inda Baúbhilili, baomi nde ba endu a sinagogi aba baɛkɛbɛa mɔkɔ̀ bate: «Badh'asu, nabana bo na yɔnga la dhodeisa la meema a bato nde bɔyɔngɛ to!» 16 Pɔlɔ ab'ama na sòmba la njaga aɛ ab'ayɔnga ate: «BaIsilaɛli badh'ami na benu nde bontea Mokonga, bɔmɔɔkɛ to! 17 Mokonga nde ma ekita nda baIsilaɛli nde, ai aɛsɔmbɔli bàtata asu. Ai aɛmɔtisi mbènɔ nde bai nee a lɛɛngɔ a Misili, mbusa-li ab'aetosa we n'ekanda l'aɛ. 18 Ab'aebubila bía elemɔ ekomi ini asub'a ngalagɛ†. 19 Ab'aetíndisa bato nde ba ɛkɔngɔ sobe-lalɔ asub'a lɛɛngɔ a Kanana, ab'aepa baIsilaɛli lɛɛngɔ ndɔ bende abɛ moando nd'abɔ†. 20 Indɔ ai akɔlɛkani nde a bía elemɔ eyana ini na ekomi itanɔ.
Mbusa indɔ, ab'aepa bàtata asu basɔ̀i-yɔnga kida la a elemɔ a múbhilili Samueli†. 21 Ago, aba bammɛma mɔamɛ, na Mokonga ab'aepa Saulɔ, muna-Kisi a mba nda Bɛnyamina, mmbe ai asengi a elemɔ ekomi ini. 22 Mbusa-li Mokonga ab'ankɔ́ma Saulɔ, ab'ammesa abɔ Daudi bía mɔamɛ. Ab'atɔndɔlisa a yɔnga l'aɛ ate: ‹Nɛmɔni Daudi, muna-Yɛsɛ, mmbe abɔngɛli meema ami. Akɔla mande inde nekóndi bhulibhu†.› 23 Mpa, toa la asub'a ɛbɔti a nto nde, Mokonga ambhii a Isilaɛli na Namisi, sinde ai aelàki nee. 24 Mosá la bhia la Yesu, Yɔani ai alabhi n'aengodea baIsilaɛli bɔbhu bende batiɛ meema abɔ na baendiisisɛ†. 25 Na sinde Yɔani ai agɔbɛlaga na nkási nd'aɛ, ai ayɔnga ate: ‹Bòaka bote ne nde màni? Nndaga ne nde yɛ. Mpa, abhia mbusa ami mmbe nndaga nɛtɔlɛli nɛngɛbɛ kodaga la sandasanda nd'aɛ†.›
26 Badh'ami, benu bana-Abolaimu na benu nde bontea Mokonga, a nde ang'asu yɛu Mokonga ai atei yɔnga la bolamisi nde. 27 Mpa bato nde ba Yɛlusalɛma na baomi nde babɔ nndag'ai baúbhi bende Yesu a nde Namisi. Aɔ go nndaga ai baúbhi yɔnga nda baúbhilili, nde ai bagolisa a esa la sabato bhulibhu, aba bangusila Yesu yɔnga. A kɔla la indɔ ai baóbelisi nde yɔnga nda baúbhilili. 28 Nɛngɛbɛ sinde ai babóli inde aangisa na bammóeli, aba bammɛma Pilatɔ bende ammóɛ aande móa. 29 Mbusa a gɔba la bhulibhu inde baúbhilili baandeki a yɔnga l'aɛ, aba basìmisa kiinda aɛ a mosalaba ndɔ na ga bhísa l'aɛ na bhota†. 30 Mpa Mokonga ab'anjujusa toa l'a kukua. 31 Mbusa-li, Yesu ab'aeóbela a esa atì bande ai batambi n'iyɛ toa la Galilaya kida la Yɛlusalɛma. Bande baetii mpa bàtɔndɔlisi nde baɛ ang'a bato nde ba Isilaɛli. 32 Na besu benolabhela Mbinɔ Anja nde Mokonga ai aelàki bàtata asu. 33 Mokonga ab'abhia aóbelisa mɔkɔ̀ ndɔ ang'asu besu ban'abɔ, a jujusa la Yesu toa la kukua sinde ai baandeki nee asub'a Lembɔ l'inda ibale bende:
‹Owɛ yɛu o nde nami.
Toa la ndiende, ne nde Abhaɔ.›
34 Mokonga ai ayɔngi bende alɛ anjujusa toa la angal'a bàku nga ngobho aɛ ahòa-i. Ai ayɔngi go bende:
‹Ai nenhaholi Daudi ngɔga
ago a nde inda domi.
A masa indɔ yɛu nenopa na benu.›
35 Ang'a indɔ yɛu ayɔngi go asub'a ketabo atɔɔ ate:
‹Nnd'aanga on'doa mbhumani nde maɔ ahòelɛ asub'a bhota†.›
36 A nde bende, mbusa a Daudi gɔba la nkási nd'aɛ a elemɔ aɛ, sinde Mokonga ai akóndi nee, meema aɛ ab'akɔdɔa. Aba baga bamúmba a bhota nda babhaɛ, ab'ahòa†. 37 Mpa mmbe Mokonga anjujusi toa la kukua nnd'ai ahòi. 38-39 Badh'ami sɛ, atɔlɛli boúbhɛ bende: a nde a nyɛnɛla la ang'a Yesu yɛu benolabhela gɛgia la ilɔlɔ nd'anu. A nde bende, kela mmbe a na boesobela ang'aɛ, Mokonga am'bɛsa nto ndɔ bía mmbe nnd'a na yɔnga a iso aɛ. Indɔ yɛu Tɔlati nda Mósa ai ataloki kɔla-li. 40 Bokèngemanɛ! Inde baúbhilili ai baandeki anokidia-i:
41 ‹Bolengɛ, benu baenga, anobangisɛ na bobungɛ!
Nga eme nɛkɔla éma imoti a elemɔ anu,
éma nde nnd'aanga alɛ bokua na bolebei, nangɛ nto n'anɔtɔmili†!›»
42 Mbènɔ nde Pɔlɔ na Balanaba batoi nee asub'a sinagogi-li, bato aba baɛmɛma bende basianɛ go mande a sabato la mmbe maa mbusa, bhia yɔngɛla la masa yɔnga nd'imoti ndɔ. 43 A anjana l'abɔ, bato batì, baYuda na bato batɔɔ nde ai bambhebha Mokonga na bande bálebei Tɔlati nda baYuda aba bam'belea Pɔlɔ bona Balanaba. Bande na baengodea bende babubilɛ asub'a boangɔ nda Mokonga.
44 Esa la sabato la inda ibale, da-bato nde ba bɔma ndɔ, aba batulanaga a ɔkanea la yɔnga nda Mokama. 45 Mbènɔ nde baYuda baɔni mɔlɔndɔ ndɔ, aba batuma na boso. Aba bangana yɔnga nda Pɔlɔ na ɔtaga l'aɛ. 46 Pɔlɔ na Balanaba aba baengodea na mouɔ bende: «Ang'anu yɛu mbɛɛ auma abɔngi benongodeɛ yɔnga nda Mokonga. Mpa nga bomaa dhɔlɔ, na ɔna la bende benu nndaga bɔtɔlɛli lenda la asub'a mɛyɔ, bolengɛ to sinde beetiili ne nɔngɔ a bande nndaga baYuda. 47 A nde bende Mokama asososii ate:
‹Neobhísi bía sangala a meeme a bande nndaga baYuda,
nga okidisɛ bolamisi
a sungiaga la na lɛɛngɔ†!›»
48 Ɔka la indɔ, bande nndaga bai baYuda, aba bajanga kpɛɛ, na babhebha yɔnga nda Mokama. Bande Mokonga ai n'aye mɛnɔ aɛbɔngisi bɔbhu a lenda la asub'a mɛyɔ aba bá na boosobela. 49 Yɔnga nda Mokama ab'andanda a ɛkɔngɔ ndɔ bhulibhu. 50 Mpa baYuda aba baejajisa bake la basikɛ nde baki bambhebha Mokonga na baomi nde ba asub'a bɔma. Aba bakɛngɛtisa nobisa la Pɔlɔ bona Balanaba, aba baebèa a lɛɛngɔ abɔ. 51 N'ibɔ aba batitia eluule toa la ego l'abɔ bía booania ang'abɔ†, aba baga naa Ikɔniɔ. 52 Na bàgoli aba batuma na bujɛmɛ na Meema Mbhumani.