Ɛkɔli 14

Pɔlɔ na Balanaba balabha Mbinɔ Anja naa Ikɔniɔ

Naa Ikɔniɔ, ab'aóbela we bía inde ai anyɛni naa Andiokia. Pɔlɔ na Balanaba aba bangia asub'a endu a sinagogi nda baYuda. A yɔnga l'abɔ, bato batì bande nde baYuda na bande nndaga baYuda aba baesobela Yesu. 2 Mpa baYuda la bande ai bakɔ́mi boosobela, aba bajajisa meema a bande nndaga baYuda nga bende, baeyɛ bande baesobeli Yesu. 3 Pɔlɔ bona Balanaba aba balɛbha Ikɔniɔ. Na batɔmia n'ekanda na baɛkɛtɛla Mokama. N'iyɛ ab'akɔla mbunde na ekesɔ a tesela l'a njaga abɔ. Ìbo yɛu ai atɔndɔlisa bende mbinɔ nde ai batɔmia a yɔnga la boangɔ nd'aɛ ai nde nda domi. 4 Bato nde bá a bɔma ndɔ aba babuana, bande batɔɔ aba baga ang'a baYuda na bande batɔɔ ang'a batetei. 5 BaYuda na bande nndaga baYuda na bakama nde babɔ ai bakɔsɔkanaga a nobisa la Pɔlɔ bona Balanaba na móa l'abɔ na bɛtaga l'abɔ n'ɛtɛ. 6 Ɔka la indɔ, Pɔlɔ bona Balanaba aba batateela a bɔma nda lɛɛngɔ a Likaonia: Lisita na Dɛlɛbɛ na nji nde a bhi-bhi-li. 7 Aba baika io, na balabha Mbinɔ Anja.

Pɔlɔ na Balanaba banamisi n'dɔtu naa Lisita

8 Naa Lisita, ai we moo moti n'aiki a dodo, n'a nde n'dɔtu toa la asub'a sɔɔ a amáɛ, ai na atambi-mbɛ mɛnɔ. 9 Esa imoti mbènɔ nde Pɔlɔ ai ayɔnga ab'amɔka. Pɔlɔ ab'antɔlɛa iso ab'aɔna bende ai a na maakɔ a lama. 10 Yɛ Pɔlɔ ab'akoga na moyo enda ate: «Mɛ to bo ngbi!» Moo ndɔ ab'aemesia, ab'aesada, na kɛngɛtisa la tamba. 11 Mbènɔ nde mɔlɔndɔ a bato-li baɔni inde Pɔlɔ akɔli, aba bakoga na eluu nda baLikaonia bate: «Baesòmba baetii bía bato na badhidhili nɔngɔ asu^†!» 12 Aba bankoga Balanaba bate mmbe a nde: «Jɛu» na Pɔlɔ bate: «Ɛlɛmɛ»^a nga Pɔlɔ ai nde nyɔngi. 13 Mɔɛlɛli nde ma Jɛu mmbe endu a esòmba nd'aɛ ai nde a ngba la nji, ab'ambhia na muuu a ntɛ na banɔlisi ngata nde angelemanaga. Kida l'a mpume a endu-li, iyɛ na mɔlɔndɔ a bato ndɔ, aba bakaba hɛlɛla la Pɔlɔ na Balanaba. 14 Mpa ɔka la indɔ, batetei nde babale ndɔ, aba babhòma ngɔmbɛ nd'abɔ, aba bakamisaga ngia l'a nsɔlɔ a bato ndɔ na bakoga bate: 15 «Badh'asu nga boni yɛu bɔkɔla ìbo? Be masa bato bía benu. Bebhii anu nde na Mbinɔ Anja. Na benokoga nde bende bodoɛ gɔɛ nde baesòmba boobo nde banu ndɔ. Boetiilɛ ang'a Mokonga mmbe alenda, mmbe atɛlɛkisi kobha, dodo, ngɛji mati na inde a asubi bhulibhu^†. 16 A elemɔ nde aye mɛnɔ atesi, Mokonga ai aedu bato nde bá a lɛɛngɔ-li bhulibhu bende babeleɛ asii nd'abɔ. 17 Nangɛ bo nnd'ai adu angelisa l'abɔ bonja l'aɛ, ab'alɔisa anu mbúa toa la na kobha na pa l'anu egubhɔ a mbènɔ anja^†, n'anopa eléa a kutisa la meema anu na bujɛmɛ.» 18 Nɛngɛbɛ mbusa a yɔnga la ìbo, nndag'ai a awɛdɛ kɔ́misa la mɔlɔndɔ a bato ndɔ hɛlɛla l'abɔ.

19 BaYuda aba bakidianaga toa la Andiokia na Ikɔniɔ, aba baejajisa bato na kidia la bɛta la Pɔlɔ na ɛtɛ. Aba bam'bòlela na ngba la nji-li na baaka bende aye aku. 20 Mpa mbènɔ nde bàgoli bantimbi nee, Pɔlɔ ab'aemesia na siana la na bɔma. Uma-li, aba baga bona Balanaba naa Dɛlɛbɛ.

Pɔlɔ na Balanaba basiani Andiokia

21 Pɔlɔ bona Balanaba aba balabha Mbinɔ Anja asub'a bɔma nda Dɛlɛbɛ, na dɔ̀a la ngbota a bàgoli wa. Aba basiana Lisita, Ikɔniɔ na Andiokia a lɛɛngɔ a Pisidia. 22 Na badhodeisa meema a bàgoli bende batoa-i asub'a boosobela, na bende atɔlɛli betesɛ asub'a enobɔ atì a ngia l'ɛbɔamɛ nda Mokonga. 23 Asub'a kela kanisà, aba baɛsɔmbɔla bakpɛga. Mbusa-li, aba baika makanga léana a mɛma la Mokonga a yɔnga l'abɔ, na gesa l'abɔ a njaga a Mokama, mmbe ai babhísi maakɔ abɔ ang'aɛ.

24 Aba batɔmba lɛɛngɔ a Pisidia na ga kida la Pafilia^b. 25 Aba balabha Yɔnga naa Pɛlɛgɛ, mbusa-li aba badhidhila a bɔma nda Atalia. 26 Toa la Atalia, aba bangia go asub'a koko na siana la Andiokia nda lɛɛngɔ a Sulia. Io yɛu ai n'aye baebhísi a boangɔ nda Mokonga a yɔnga la nkási nde ai batoa a kɔla-li. 27 Kida la Andiokia, aba baetulanisa bato a kanisà, aba baetɔmila inde Mokonga ai aɛkɔlɛli bhulibhu, na sinde ai aeukuili bande nndaga baYuda n'ibɔ mpume a boosobela. 28 Pɔlɔ na Balanaba aba baika Andiokia esa atì áma imoti na bàgoli nde ba Yesu.