Ɛkɔli 15

Mpíta mati nda Yɛlusalɛma

Mbusa, bato bimoti bende, bande batoi naa Yudɛa, aba baga Andiokia nda Sulia. Aba bakɛngɛtisa golisaga la badh'abɔ bàlebei bate: «Nabana nnda bogu ganja sinde Tɔlati nda Mósa àsosii^† nee, nnd'aanga bolama.» 2 Pɔlɔ bona Balanaba aba bangoisa egolisi nd'abɔ ndɔ. Aba bakakatana n'ibɔ kpɛɛ ang'a indɔ. Ìbo ndɔ, aba bansɔmbɔla Pɔlɔ bona Balanaba na bato bɔlɛbɛ a nsɔlɔ abɔ nga bende bagɛ naa Yɛlusalɛma ga ngodea la batetei na bakpɛga^a adha yɔnga ndɔ.

3 Bato nde ba kanisà nda Andiokia aba baepa éma nde aetabela a tamba nd'abɔ. Aba batesela Fɔinikia na Samalia, na batɔmiaga sinde bande nndaga baYuda ai banebei nee Mokama. Na mbinɔ ndɔ, ai aɛjangisa baaya bàlebei bɔbhu kpɛɛ. 4 Mbènɔ nde bakidi nee Yɛlusalɛma, bato nde ba kanisà, batetei na bakpɛga aba baepikila. Pɔlɔ bona Balanaba aba baɛtɔmilaga éma bhulibhu nde Mokonga ai akɔli a nyɛnɛla l'abɔ. 5 Mpa adha bato nde ba boio a baFalisayo, bande banebei Yesu aba bama, na yɔnga la bate: «Atɔlɛli bakilisitɔ nde nndaga baYuda baguɛ ganja, na beesosiɛ bende batambɛ asub'a Tɔlati nda Mósa.»

6 Batetei na bakpɛga aba batulana a lengisana la yɔnga ndɔ. 7 Bía nde makakatanɔ ai aetii nee atì, mpa Pɛtɛlɔ ab'ama, na ngodea l'abɔ ate: «Badh'ami, benu nganga boúbha bende, Mokonga ai amɔsɔmbɔli toa la kala a nsɔlɔ anu bende, nɛtɔmiɛgɛ Mbinɔ Anja nd'aɛ ang'a bande nndaga baYuda nga, bamɔkɛ na lebea l'aɛ. 8 Mokonga mmbe aúbha meema a bato, atɔndɔlisi bende aelebei bato ndɔ a mòa l'abɔ Meema a Bobhu bía nde na besu ai asopi nee ndɔ. 9 Mokonga nndaga asɔnyɛnanisi na bato ndɔ. A yɔnga la boosobela l'abɔ yɛu aangisi n'asosi meema abɔ. 10 Nga éma sina mpa, bokaba dɔnga la Mokonga? Bɔɔsɔ́a bàgoli nde bende bakumbɛ nkumba nde, nangɛ bàtata asu nangɛ besu nganga nnd'ai bɛtɔi kumba-li! 11 Mpa, besu belebei gɔɛ nde bende, Mokonga asolamisi nde a yɔnga la boangɔ nda Mokama Yesu, sinde n'ibɔ aelamisi nee.»

12 Mpa, mɔlɔndɔ a bato ndɔ bɔbhu aba baika bo sii! Aba bamɔkanea Pɔlɔ na Balanaba na batɔmia mbunde na ekesɔ nde Mokonga ai akɔla a nyɛnɛla l'abɔ, a nsɔlɔ a bande nndaga baYuda. 13 Mbènɔ nde bagɔbi nee yɔnga, Yakɔbɔ^b ab'aesisila ate: «Badh'asu, bɔmɔɔkɛ to! 14 Simoni^c asɔtɔmili sinde Mokonga ai aɔngiani mbɛɛ ngomi aɛ ang'a bato nde nndaga baYuda bende, aɛsɔmbɔlɛ a nsɔlɔ abɔ, bato nde baɛ. 15 Yɔnga nde alebeelani na ind'a baúbhilili, inde baandeki asub'a Ketabo nda Mokonga, bende:

16 ‹Mbusa a indɔ nesiana lɛ,

nehìa lɛ go endu a Daudi nde ai n'aye aetii euma ndɔ.

Nangɛ agbɔlɔanɛ, nɛkɔkɔtiaga lɛ go sakelaga-li.

17 Mpa, bato batɔɔ bɔbhu bankabaga mande Mokama.

Ɛhɛ, bato nde ba lɛɛngɔ atɔɔ bhulibhu, bande ai neekogi a ja la bato nde bamɔ.

Indɔ yɛu Mokama ayɔngi,

18 iyɛ nde ai aúbhisisi éma ndɔ toa la kala^†.›

19 Éme Yakɔbɔ go ate: Ang'a indɔ yɛu, negii bende, n'aye bato nde nndaga baYuda banebei Mokonga, beenobisa-i. 20 Mpa, beeandekeɛ gɔɛ nde bende, baléa-i nyama nde balɔlii a elimelime a baesòmba nga a nde nginisɔ, na bakɔla-i bojini. Baléa-i nyama nde baati kingo aɛ, na mmbe aha na nsangi asub'aɛ^†. 21 A nde bende, toa la kala, bato aha balabha maanɔ nda Tɔlati nda Mósa ndɔ a kela bɔma, na sɔma-li asub'endu a sinagogi a esa la sabato bhulibhu.»

Bàmɛlɛi-kanisà baeandekei bàlebei nde ba Andiokia baloa

22 Mpa, batetei, bakpɛga na ngimana a kanisà, aba balebea sɔmbɔla la bato a nsɔlɔ abɔ na tea l'abɔ naa Andiokia áma imoti na Pɔlɔ na Balanaba. Aba bansɔmbɔla Yuda mmbe bankoga go bate Balisaba, na Sila. Bande bai na bokama angal'a baaya bàlebei. 23 Aba baétea na baloa na baandeki asubi bate:

«Besu batetei na bakpɛga, badh'anu, benosesei badh'asu bàlebei bande nndaga baYuda bande baiki naa Andiokia na a ɛkɔngɔ a Sulia na Kilikia. 24 Bɛɔki bende, bato bimoti angal'asu auma babhii banɔkɔkɔbisa na bhìsa la maamaa a meema anu na yɔngaga nd'abɔ. Nndag'ai beétei. 25 Ang'a indɔ, belebei besu bɔbhu a sɔmbɔla la bato nde beétea nɔngɔ anu. Baga áma imoti na Pɔlɔ bona Balanaba, bakóndaga nde basu. 26 Ibɔ, babhísi lenda l'abɔ bhulibhu a kɔlɛla la Mokama Yesu Kilisitɔ nkási. 27 Mpa, bentei anu Yuda bona Sila, aga banɔtɔmila hɛlɛ yɔnga nde benoandekei nde. 28 A nde bende, Meema a Bobhu asɔɔkisi, na besu nganga belebei bende benokumbisa-i go nkumba atɔɔ, masa maanɔ, nga indɔ yɛu atɔlɛli, n'a nde bende: 29 boléa-i nyama nde balɔlɛi a elimelime a baesòmba, boléa-i nyama nde baati kingo aɛ, na nsangi. Na bojina-i. N'aye bosikisi indɔ, kesi bosingani. Botíga aye!»

30 Mpa Pɔlɔ na badh'aɛ aba baɔkɔana wa, na siana l'abɔ naa Andiokia. Io, aba baetulanisa bakilisitɔ bɔbhu, aba baepa baloa ndɔ. 31 N'ibɔ, mbusa a sɔma baloa-li, aba bajanga nga, yɔnga nde ai asubi ai adhodeisi meema abɔ. 32 Yuda na Sila, n'ibɔ, nga bai nde baúbhilili, aba badhodeisa meema a bakilisitɔ kpɛɛ na kándisaga-li na yɔnga atì. 33 Aba baika o kia bɔlɛbɛ, mpa, bàlebei bɔbhu aba baɛɔkɔa bende basianɛ na bɔkɔlɔ nɔngɔ a bande ai baétei. [ 34 Sila iyɛ ab'aɔna bende abɔngi atígɛ aɛ naa Andiokia.]^d 35 Mpa, Pɔlɔ na Balanaba aba batìga abɔ naa Andiokia, a golisaga na tɔmiaga la Mbinɔ Anja nda Mokama na bande batɔɔ batì.

Pɔlɔ na Balanaba bakatanigi

36 Mbusa a kia bɔlɛbɛ, Pɔlɔ ab'anngodea Balanaba ate: «Besianɛ to, ga lenga la badh'asu a bɔma bhulibhu nde ai bɛtɔmiigi au yɔnga nda Mokama, lenga la sinde balenda nee.» 37 Balanaba ai na sei a ga la na Yɔani mmbe bankoga bate Malekɔ ndɔ. 38 Mpa, Pɔlɔ nnd'ai alebei indɔ, nga bende Malekɔ ai n'aye adoani n'ibɔ naa Pafilia, na nnd'ai abhii aetabela a nkási^†. 39 Aba bakakatana babale l'abɔ kpɛɛ, ga kida la katanaga. Balanaba aba am'bɛsa Malekɔ, aba baga a nkindi, aba badaa a koko ga l'abɔ a kesanga nda Kipulɔ. 40 Mpa Pɔlɔ n'iyɛ ab'ansɔmbɔla Sila. Bakilisitɔ aba bammɛma Mokonga a yɔnga l'abɔ bende, bagɛ na boangɔ nda Mokama, aba baga. 41 Aba batɔmba lɛɛngɔ a Sulia na Kilikia^e na bakándisaga meema a bato nde bá asub'a kanisà.