Timɔtɛɔ ajuani na Pɔlɔ na Sila
16
Pɔlɔ ab'akida a bɔma nda Dɛlɛbɛ, toa la wa ab'atɔnganɛla Lisita†. Ai wa ngolì moti ina aɛ n'a nde Timɔtɛɔ. Amáɛ ai nde moYuda nebei Kilisitɔ, na abhaɛ moGiliki. 2 Bakilisitɔ nde ba Lisita na Ikɔniɔ ai bángea Timɔtɛɔ hɛlɛ. 3 Pɔlɔ ab'akónda bende abɛ matamba l'aɛ. Aba am'bɛsa, ab'amɔnisisa ganja a yɔnga la baYuda bande bá a ɛkɔngɔ ndɔ. A nde bende, bɔbhu ai baúbha bende abhaɛ a nde moGiliki. 4 Pɔlɔ na badh'aɛ aba banyɛnaga a bɔma ntuantua, na tesisila la bakilisitɔ bende, basikisɛ yɔnga nde batetei na bakpɛga nde ba Yɛlusalɛma ai babhísia. 5 Mpa, meema a bato nde ba asub'a kanisà abá na ekanda la boosobela. Esa bhulibhu, etángi a bakilisitɔ ai aja atì.Mokonga antei Pɔlɔ naa Makedonia
6 Pɔlɔ na badh'aɛ aba banyɛnaga a ɛkɔngɔ nda Fuligia na Galatiab nga, Meema a Bobhu ai aɛkɔ́misi tɔmiaga la yɔnga nda Mokonga asub'a nji nda ɛkɔngɔ nda Ajia. 7 Mbènɔ nde bakidi nee bhi-bhi la ɛkɔngɔ nda Misia, aba bakaba ngia l'a lɛɛngɔ a Bitinia, mpa Meema a Yesu ab'aɛkɔ́misa indɔ. 8 Ang'a indɔ, aba batɔmba Misiac, aba badhidhila a bɔma nda Tɔlɔa. 9 Kiia, Pɔlɔ ab'aɔta njei, ab'amɔna nto nde maa Makedonia n'ame n'angámelaga ate: «Ojabhelɛ naa Makedonia oni, obhiɛ osotabelɛ.» 10 Mbusa a ɔta la njei ndɔ, makanga lɛbha, aba bekabad ga la Makedonia nga, ai beúbhi domi bende, Mokonga yɛu asokogi we, ga tɔmila la bato nde ba lɛɛngɔ ndɔ Mbinɔ Anja.
Ludia anebei Mokama naa Filipi
11 Aba betoa Tɔlɔa a koko na ga l'asu bo tiii a kesanga a Samotiakɛ. Uma-li, aba bega saka bɔma nda Nɛapɔlie. 12 Toa la wa, aba bekida Filipi, bɔma nda mosá-mosá nda ɛkɔngɔ nda Makedoniaf n'a nde bɔma nda baLɔma. Io, aba beika kia bɔlɛbɛ. 13 Esa la sabato, aba bega a nkpalɔ a íbo moti, a óbela l'a nji ndɔ nga, ai beaka bende aanga bɛɔna be áma-ɛmɛmi. Mpa, aba beedhonda bake bɔlɛbɛ na batulanigi wa. Aba beika a dodo a yɔnga la n'ibɔ. 14 Adha bake nde ai basɔɔkanea ndɔ, ai be moti ina aɛ Ludia, nto nde maa bɔma nda Tuatɛla. Ai nde nsómbisigi-ngɔmbɛ anju ind'a esómbi akpɛ, n'antea Mokonga. Mokama ab'aukua meema aɛ a lebea la yɔnga nde Pɔlɔ ai ayɔnga. 15 Mbènɔ nde baendiisi nee, iyɛ na bato nde ba endu aɛ bɔbhu†, ab'asogámelaga ate: «Nabana bɔɔni domi bende, nenebei Mokama, bobhiɛi boikɛ nɔngɔ ami.» Ab'asɔsɔ́a bende belebeɛ.
Bamai Pɔlɔ na Sila asub'a ngɔmɔ
16 Adhoi ndɔ, na bega áma-ɛmɛmi, nkɔbɛ moti la nke ab'abhia asotulanisa. Iyɛ ai na baketi a tabola la yɔnga nde abhia. Na ɛkɔli nd'aɛ ndɔ ai aangisa bakama nde baɛ na badɔ̀a ntondɔ atì. 17 Nyike ndɔ, ab'asobelea, Pɔlɔ na besu, n'akoga ate: «Bato nde ba nde bakɔbɛ nde ba Mokonga Mmbe maa n'egoo kpɛɛ. Babhii banɔɔngia asii la bolamisi.» 18 Ai akɔlaga indɔ a esa atì. A sungia, indɔ ab'anɛma Pɔlɔ kpɛɛ, ab'aetiisana na ngodea la baketi ndɔ ate: «Nenososii a ina a Yesu Kilisitɔ bende, botoɛ to asub'a nke nde.» Dia ndɔ, baketi ndɔ aba batoa ang'aɛ. 19 Mbènɔ nde bakama nde baɛ baɔni nee inde aóbeli ndɔ, aba baúbha bende nyike ndɔ nnd'aanga aye adɔ̀a abɔ ntondɔ. Aba bandhunga Pɔlɔ na Sila na kingitaga l'abɔ áma-tulanela la bato, mosá la bakama nde ba nji. 20 Aba baebhia na baPɔlɔ mosá la basɔ̀i-yɔnga na ngodea l'abɔ bate: «Bato nde babhìsi nkokoto asub'a bɔma nd'asu. Ba nde baYuda 21 na bagolisa nkani nde, besu baLɔma, nnd'aanga belebea nɛngɛbɛ kɔla-li.»
22 Mpa mɔlɔndɔ a bato aba bansunulila Pɔlɔ bona Sila. Basɔ̀i-yɔnga aba baetosisisa ngɔmbɛ na sosia la bende baebindɛ na mee. 23 Aba baebinda, na maa l'abɔ a ngɔmɔ. Aba bansosia nangi-ngɔmɔ bende, aelangɛ hɛlɛ. 24 Nangi-ngɔmɔ ndɔ, ɔka la indɔ, ab'aengisa asub'a ndingɛ-ndingɛ a ngɔmɔ-li. Ab'anyangaga ego l'abɔ a gbutu a mee. 25 A meeme a m'bimba, Pɔlɔ na Sila ai bamɛma, na lemba la lembɔ a bhebha la Mokonga. Bato batɔɔ nde ai baenyangi n'ibɔ, ai baɛɔkanea. 26 Nkobà imoti, balingina aba batesa, aba badengisaga ndui a endu a ngɔmɔ-li kpɛɛ. Dia ndɔ, mpume a ngɔmɔ-li bhulibhu ab'aeukuaga. Ngolí a ngɔa bhulibhu nde ai baenyangi na bato asub'a ngɔmɔ ab'aɛkpɛliaga. 27 Nangi-ngɔmɔ ab'ajujua, ab'aɔna mpume a ngɔmɔ bhulibhu n'a nde sama. Ab'aóbisa molima nd'aɛ bende aemóɛ nee nga, ai aaki ate mbénɔ bato nde bai asub'a ngɔmɔ-li baetoloi bɔbhu. 28 Mpa, Pɔlɔ ab'akoga na moyo enda, ate: «Oemóa-i! Besu bɔbhu beha ani!» 29 Nangi-ngɔmɔ ndɔ, ab'amɛma bende babhiɛ na tala, ab'akamisaga ngia la naande Pɔlɔ bona Sila ba nee. Ab'agua a ego l'abɔ n'apupa. 30 Mbusa a indɔ, ab'aeóbisa na nsɛngɛ, ab'aeulisa, ate: «Bamangɛsɛ sa! Nɛkɔlɛ boni nga nelamɛ?» 31 Aba bansisila bate: «Onebeɛ Mokama Yesu, kesi olama, owɛ na bato nde ba n'endu aɔ.» 32 Mpa, Pɔlɔ na Sila aba bantɔmilaga iyɛ na bato nde ba n'endu aɛ bɔbhu Mbinɔ a Mokama. 33 A mbènɔ a kiia ndɔ, nangi-ngɔmɔ ndɔ ab'aɛbɛsa na ga sosaga la ndase nd'abɔ. A mbènɔ ndɔ, aba baendiisa iyɛ na bato nde ba n'endu aɛ bɔbhu†. 34 Mbusa a indɔ, ab'aega nee n'endu aɛ, ab'aepa eléa. Iyɛ na bato nde ba n'endu aɛ aba bajanga kpɛɛ, ɔna la sinde banebei na Mokonga.
35 A sa la máni, basɔ̀i-yɔnga nde ba Lɔma aba baétea baomi nde ba basoda ga ngodea la nangi-ngɔmɔ ndɔ bende: «Ookodɛgɛ bato ndɔ.» 36 Nangi-ngɔmɔ ab'aga antɔmila Pɔlɔ yɔnga ndɔ, ate: «Basɔ̀i-yɔnga nde ba Lɔma bamososii bende nenokodɛgɛ. Aanga boóba mpa, bogɛ na mbɔlɛlɛ.» 37 Mpa, Pɔlɔ ab'aengodea basoda ndɔ ate: «Auma basɔbɛtisisi a nsɛngɛ kanga sɔ̀a la yɔnga nd'asu, aba basomaa a ngɔmɔ, ago na be nde baLɔmag. Bakóndi mpa kodaga l'asu a bɔsɔmbi nde boni? Indɔ nnd'akòka! Babhiɛ basokodɛgɛ ibɔ nganga.» 38 Baomi nde ba basoda ndɔ aba baga baɛtɔmila basɔ̀i-yɔnga mbinɔ ndɔ. Bɔɔ ab'aebaa ɔka la sinde Pɔlɔ na Sila ba nde baLɔma. 39 Aba babhia ibɔ nganga, nga bende Pɔlɔ na Sila baɛgɛgiɛ. Aba baetosa a ngɔmɔ na ngodea l'abɔ bende, batoɛ a bɔma ndɔ. 40 Mbènɔ nde Pɔlɔ na Sila batoi nee a ngɔmɔ, aba baga nɔngɔ a Ludia. Aba baedhonda badh'abɔ bàlebei io, aba badhodeisa meema abɔ, mpa aba banyɛna.