Pɔlɔ na Sila bagee Tɛsalɔnika
17
Pɔlɔ na Sila aba batɔmba bɔma nda Amifipɔli na Apɔlɔnia, aba bakida Tɛsalɔnika naande endu imoti nda sinagogi nda baYuda ai nee. 2 Na Pɔlɔ ab'angia a endu ndɔ, sinde ai nde nkani nd'aɛ. A mbènɔ a sabato isalɔ, ab'aambola n'ibɔ a yɔnga la Maandekɔ nda Mokonga 3 n'angoda na angelisa l'abɔ bende, ai atɔlɛli Masia anobɛ na kua, na jujua l'a kukua. Ab'aengodea ate: «Yesu, mmbe nɛnɔtɔmilaga mbinɔ aɛ nde, yɛu a nde Masia.» 4 Adha baYuda nde bai wa aba balebea, aba bajuana na Pɔlɔ bona Sila. Na baGiliki batì, bande bantea Mokonga na ngbota a bamangɛsɛ la bake, n'ibɔ aba balebea. 5 Mpa boso ab'aejulua baYuda la bande batɔɔ. Aba baɛbɛsa bajilombi bɔlɛbɛ nde baetosigi na asii, aba baetulisanaga mɔlɔndɔ a bato bhia jajisa la bɔma-li. Aba bakida n'endu a Yasoni, bhia kaba la Pɔlɔ na Sila nga ga la n'ibɔ mosá la bato bɔbhu. 6 Mpa nnd'ai baedhondi we. Ang'a indɔ, aba bandhunga Yasoni na badh'aɛ bàlebei batɔɔ na ga na kingitaga l'abɔ mosá la bakama nde ba bɔma ndɔ, na bakoga bate: «Bande aye baejajisi bato nde ba lɛɛngɔ-li bhulibhu. Bakidi mpa na iani, 7 na Yasoni aepikili nɔngɔ aɛ. Bàku-ganja nde bɔbhu bagee mbamba a maanɔ nda Mɔamɛ Kaisali nga, bagii bate mɔamɛ matɔɔ a we, ina aɛ Yesu.» 8 Mbènɔ nde mɔlɔndɔ a bato na bakama nde ba bɔma baɔki nee bo, aba basaimana. 9 Bakama nde ba bɔma aba banèisa Yasoni na badh'aɛ ntondɔ, mpa, aba baɛdɔlɛa bende bagɛ.Pɔlɔ na Sila bakidi Bɛlɔya
10 Kiia ndɔ, nkobà imoti, badh'abɔ bàlebei aba bantea Pɔlɔ na Sila a bɔma nda Bɛlɔya. Kida l'abɔ io, aba bangia sub'endu a sinagogi nda baYuda. 11 BaYuda nde ba Bɛlɔya bai na meema anja nyɛna la bande ba Tɛsalɔnika. Ai bakónda ɔka la yɔnga nda Mokonga kpɛɛ. Esa-li bhulibhu na balengisana Maandekɔ nda Mokonga a lenga la mbénɔ yɔnga nda Pɔlɔ a nde domi. 12 Ang'a indɔ, baYuda batì angal'abɔ aba banebea Yesu. Na adha baGiliki, bake la basikɛ na ngbota a baboo n'ibɔ aba balebea. 13 Mpa, sinde baYuda nde ba Tɛsalɔnika baɔki nee bende Pɔlɔ alabha yɔnga nda Mokonga naa Bɛlɔya n'iyu, aba baga na io ga jɔjɔlisa na jajisa la bato. 14 Dia ndɔ, baaya bakilisitɔ aba banga na Pɔlɔ saka na nkpalɔ na ngɛji nd'atì. Sila na Timɔtɛɔ yɛu aba batìga naa Bɛlɔya. 15 Bande ai bangee na Pɔlɔ ndɔ, aba baga bankidisa naa bɔma nda Atɛnɛ. A ja l'abɔ, Pɔlɔ n'aesosii ate: «Bonngodea Sila na Timɔtɛɔ bende bakamanɛ na bamodhondi dia.»
Pɔlɔ alabha naa Atɛnɛ
16 Pɔlɔ n'aha am'bondeaga Sila na Timɔtɛɔ naa Atɛnɛ, meema aɛ ab'adiana ɔna la sinde bɔma ndɔ atumi na elimelime a baesòmba. 17 Mpa, asub'endu a sinagogi, ai aambolaga na baYuda na baGiliki nde bantea Mokonga. Esa-li bhulibhu, ai akɔlaga bo na bato nde ai aedhonda a ntanga-bototi. 18 Adha bande ai baambola n'iyɛ wa ndɔ, ai na bato nde bálebei egolisi a baEpikuliɔa na bande bálebei egolisi a baSitɔikɔ. Aba bakɛngɛtisa n'ibɔ ambola la na Pɔlɔ. Bimoti na bayɔnga bate: «Bha-moyo nde, akaba nde yɔnga la éma sina?» Na batɔɔ bate: «A nde bía nto nde atɔmiaga mbinɔ a baesòmba nde ba lɛɛngɔ atɔɔ». Ai bayɔngi bo nga, ai bamɔka Pɔlɔ n'atɔmiaga yɔnga la Yesu na jujua la bàku. 19 Mpa, aba bam'bɛsa Pɔlɔ, aba banga nee mosá la Alɛɔpagɔb. Iwa, aba banngodea bate: «Bete mbénɔ aanga beúbha inde egolisi nda mbènɔ-mbènɔ nde atoa asub'aɔ nde, mbénɔ akaba nde yɔnga la ee? 20 A nde bende, bɛɔka n'ɔyɔnga yɔnga nde nnd'aki bɛɔkaga, na bekaba úbha la mbénɔ okaba nde yɔnga la éma sina.» 21 Nga, bato nde ba Atɛnɛ bɔbhu na bagɛndɔ nde baiki we, baikili masa ɔkɛanaga na tɔmiaga la mbinɔ ntuantua nda mbènɔ-mbènɔ.
22 Mpa, Pɔlɔ ab'ama mosá la bato nde ba Alɛɔpagɔ, ate: «Babhɔi, baAtɛnɛ, nɛɔni bende bobhísi meema anu kpɛɛ a sikisa la baesòmba. 23 Neúbha nga, adhu netambigi asub'a nji anu, aba nelengisana kpɛɛ áma ndɛkɛlɛ nd'anu aleɔ. Adhu nɛɔni imoti na baandeki au bate: ‹Ang'a esomba nde nnd'aúbhiananic.› Mpa, esomba nde bombhebha makanga úbha ndɔ yɛu mmbe nɛnɔtɔmilaga mbinɔ aɛ mbènɔ nde nde. 24 Iyɛ a nde Mokonga, mmbe atɛlɛkisi lɛɛngɔ na éma bhulibhu nde a au. A nde Mokama nde ma na kobha na dodo. Nnd'aki aika asub'a lɔngɔma nde bato bahìi na njaga abɔ. 25 Iyɛ yɛu aepa bato lenda, mɛhu na éma-li bhulibhu†. Nnd'a na bungu la bende bato bantabelɛ na njaga abɔ nga, nndag'a na éma nde abóli. 26 Ai antɛlɛkisi nto motid nga, bato a mba nda na lɛɛngɔ bɔbhu batoelɛ ang'aɛ, ga ika la mpuɔ bhulibhu asub'a na lɛɛngɔ. Ai abhísi elemɔ ntuantua na bhísa la mɔlɔe a mpuɔ a buki nd'abɔ. 27 Ai akɔli bo nga, bato batitimɛgɛ a kabaga l'aɛ, na kosà aanga batɔa na bandhondi. Domi-li, iyɛ nnd'a dhɔlɔ a nto na nto angal'asu. 28 A nde bende:
‹A yɔnga l'aɛ yɛu nde aangisi na belenda, na betamba na bɛɔnɛa.›
A nde sinde batɔmii-maibhe nde banu, bayɔngi nee bate:
‹Be nde ɛbɔti aɛ.›
29 Ìbo yɛu, be nde ɛbɔti aɛ, nnd'atɔlɛli beakɛ bende, Mokonga akèngani na éma nde bato bakɔkɔtii na nɔlɔ aɔ na ngɔa aɔ go n'ɛtɛ inde atoa a bɔngɛngɛlɛ na maakɔ a bato. 30 Mokonga nnd'aki ye atánga yɔnga nde bato ai bakɔli a mbènɔ nde nnd'ai bamúbha. Mpa aekoga bato bɔbhu a mpuɔ bhulibhu a boetiisila la ang'aɛ. 31 A nde bende, Mokonga abhísi esa nde asɔ̀a lɛ yɔnga nda bato nde ba na lɛɛngɔ bhulibhu a domi, a njaga a nto nde ansɔmbɔli. Aelebeisi bato bɔbhu yɔnga nde nga ai anjujusi Kilisitɔ a kukua.»
32 Bato baɔki ye yɔnga la jujua la bàku, adh'abɔ aba bantɛbhɛaga. Mpa, batɔɔ aba bagea bate: «Bɛɔka mande go n'ɔyɔnga yɔnga ndɔ esa atɔɔ.» 33 Ìbo yɛu, Pɔlɔ ab'akatana n'ibɔ. 34 Bato bimoti aba balebea, aba bajuana n'iyɛ. Angal'abɔ, ai be Dionisi, adha bato nde ba ntua nda Alɛɔpagɔ na nke moti, ina aɛ Damali, na bato batɔɔ go.