Pɔlɔ atambeligi a bɔma nda Kɔlindɔ
18
Mbusa a indɔ, Pɔlɔ ab'atoa Atɛnɛ, ab'aga naa Kɔlindɔ. 2 Io, ab'andhonda moYuda moti ina aɛ Akila, nto nde maa ɛkɔngɔ nda Pɔndɔ. Iyɛ bona nkaɛ Pilisila na bakidi mbènɔ-mbènɔ toa l'abɔ naa Italia. Ai batoi o a yɔnga nde Kɔlɔdiɔ, mɔamɛ nde ma Lɔma, ai aesosii baYuda bɔbhu bende batoɛ Lɔma. Naa Kɔlindɔ yɛu Pɔlɔ ai atulani n'ibɔ. 3 A nde bende, nkási nd'abɔ ai mangili-moti, kɔkɔtiaga la hɛma. Pɔlɔ ab'aika na mɔtɛ abɔ n'akɔla nkási ndɔ n'ibɔ. 4 Esa la sabato bhulibhu, Pɔlɔ n'ayɔngisanaga na baYuda na baGiliki sub'endu a sinagogi nga, banebeɛ Yesu.5 Mbènɔ nde Sila na Timɔtɛɔ bakidi nee toa la Makedonia†, Pɔlɔ ab'aikila aye masa tɔmiaga la yɔnga nda Mokonga. Ab'aɛtɔndɔlisila baYuda bende, Yesu a nde Masia. 6 Mpa baYuda aba bangoisa yɔnga nda Pɔlɔ na ɔtaga l'aɛ. N'iyɛ ab'atitia esonga l'aɛ†, ab'aengodea ate: «Nsangi anu abɛ antat'a moo anu benu nganga. Indɔ nnd'a aye yɔnga namɔ. Toa la ndiende, nega mande nɔngɔ a bande nndaga ba baYuda.» 7 Pɔlɔ ab'atoa wa, ab'aga nɔngɔ a nto moti ina aɛ Titɔ Yusitɔ. Iyɛ, n'a nde nto nde ansikisi Mokonga. Endu aɛ ai adadanigi na endu a sinagogi. 8 Kilisipɔ, omi nde ma endu a sinagogi ab'anebea Mokama, na bato nde ba sub'endu aɛ bɔbhu†. Bato batì nde ba Kɔlindɔ, bande ai baɔki bolabhɛ nda Pɔlɔ, n'ibɔ aba banebea Mokama, aba baendiisisa.
9 Kiia imoti, Pɔlɔ ab'aɔta njei, Mokama n'anngodea ate: «Otea-i, mpa ɔyɔngɛ masa yɔnga. Odhaa-i 10 nga, ne áma imoti na owɛ. Nnd'a naa nto nde aanga atɔa n'aomanisi na kɔla l'aɔ ajede nga, ne na bato nde bamɔ batì a bɔma nde.» 11 Mpa, Pɔlɔ ab'aika o elemɔ imoti na gbutu, n'agolisa yɔnga nda Mokonga.
12 A elemɔ nde Galiɔ ai nsɔndɔlisi nde ma baLɔma asub'a ɛkɔngɔ nda Akaya, baYuda aba badhadeana a dhunga la Pɔlɔ, na aba bambhia nee a ntua la sɔ̀a la yɔnga. 13 Aba bayɔnga bate: «Abhɔi nde akaba lebeisa la bato a bhebha la Mokonga, a asii nde anyɛnani na nkani nd'asu.» 14 Pɔlɔ n'ate ayɔngɛ, mpa Galiɔ ab'aengodea baYuda ate: «Benu baYuda, nabana nto nde a nde mojiji aɔ ai akɔli éma ajede, mmbɛ adhu aanga nɛnɔɔka bía nde atɔlɛli nee. 15 Mpa, nga a nde mokobobo nde atoeli a yɔnga-yɔnga, ina na maanɔ nda nɔngɔ anu, bolengisanɛ indɔ benu nganga, eme nnda nekóndi ja la nsɔ̀i-yɔnga la éma bía indɔ.» 16 Ang'a indɔ ab'aebèaga a ntua la sɔ̀a la yɔnga-li. 17 Mpa, bato bɔbhu aba bandhunga Sɔsitɛni, omi nde ma endu a sinagogi, aba bam'bɛtaga mosá la ntua ndɔ. Galiɔ ayɔngɛ gɔɛ éma!
Pɔlɔ asiani naa Andiokia
18 Mbusa a indɔ, Pɔlɔ ab'aika go naa Kɔlindɔ kia bɔlɛbɛ. Mpa, ab'aɔkɔana na bakilisitɔ, ab'adaa a koko ga la na lɛɛngɔ a Sulia áma imoti na Pilisila na Akila. Mosá la toa l'a njabhɔ a Kɛnkulɛa, aba bakangadua moo aɛ nga, ai ahɔ̀i indɔa. 19 Mbènɔ nde bakidi nee a bɔma nda Ɛfɛsɔ, Pɔlɔ aba an'doa Pilisila na Akila wa. Ab'angia go sub'endu a sinagogi ga ambola la na baYuda. 20 N'ibɔ aba bangámelaga bende, aikɛ go n'ibɔ kia ngbota, Pɔlɔ ab'akɔ́ma. 21 Mpa, ab'aɔkɔana n'ibɔ ate: «N'aye Mokonga akóndi, kesi nebhia go mande nɔngɔ anu.» Ab'adaa a koko a toa la Ɛfɛsɔ. 22 Kida l'aɛ a bɔma nda Kaisalia, ab'asìma a koko-li, ab'atália Yɛlusalɛma ga sesea la bato nde ba kanisà. Mbusa-li, ab'adhidila naa Andiokia.
Pɔlɔ agee a tamba nd'aɛ nda isalɔ a bolabhɛ la Mbinɔ Anja
23 Ab'aika o mbènɔ n'ɛdɛ, ab'aga. Ab'atɔmba lɛɛngɔ a Galatia na Fuligia† n'akándisaga meema a bàgoli bɔbhu.
24 A elemɔ ndɔ, moYuda moti ina aɛ Apɔlɔ, nto nde maa bɔma nda Alɛsandulia, ab'akida naa Ɛfɛsɔ. Ai nde nyɔngi makpɛ, ago n'aúbha Maandekɔ nda Mokonga kpɛɛ. 25 Ai n'aye bangolisigi asii nda Mokama. Meema aɛ n'aúlua, ai ayɔnga na golisa la bato kilikili mbinɔ a yɔnga la Yesu. Mpa, ai aúbha masa ndiisɔ nda Yɔani†. 26 Ab'akɛngɛtisa labha makanga bɔɔ asub'endu a sinagogi. Mbènɔ nde Pilisila na Akila bamɔki ye, aba banga nee na mɔtɛ abɔ, ga angiana l'aɛ hɛlɛ kpɛɛ asii nda Mokonga. 27 Mbusa-li, Apɔlɔ ab'akua sei a ga l'a ɛkɔngɔ nda Akaya. Bàdhaɛ bàlebei aba badhodeisa meema aɛ a indɔ, aba baeandekela bàgoli nde baiki Akaya baloa gela bende, bampikilɛ hɛlɛ. Mbènɔ nde akidi nee o, ab'aetabela kpɛɛ bande ai n'aye baji bàlebei a boangɔ nda Mokonga. 28 A nde bende, yɔnga nd'aɛ ai n'aye adegi nyɔɔ a baYuda a iso a bato bɔbhu, ago ai aɔngiana domi nyɛnɛla la Maandekɔ nda Mokonga bende, Yesu a nde Masia.