Pɔlɔ akidi naa Ɛfɛsɔ
19
Adhoi ndɔ, Apɔlɔ n'aha Kɔlindɔ, Pɔlɔ ab'anyɛnɛla a lɛɛngɔ a mamba-mamba ga dhidhila la Ɛfɛsɔ. Io, ab'aedhonda bàgoli bɛdɛ 2 ab'aeulisa ate: «Meema Mbhumani aye anosìmii, mbènɔ nde bonebei Kilisitɔ?» Aba bansisila bate: «Bɛmɔkisi-mbɛ mɛnɔ Meema Mbhumani ndɔ.» 3 Pɔlɔ ab'aeulisa ate: «Mpa ai banondiisi nde na mambala ndiisɔ sina?» Aba bansisila bate: «Ndiisɔ nda Yɔani†.» 4 Emesunga na Pɔlɔ ate: «Yɔani ai akɔla ndiisɔ a tia la meema, ai ayɔnga ate bato bagesɛ maakɔ abɔ ang'a mmbe abhia mande mbusa aɛ, n'iyɛ a nde Yesu†.» 5 Mbusa a ɔka la indɔ, aba baendiisisa a ina a Mokama Yesu. 6 Mbusa a Pɔlɔ gesa la njaga aɛ antat'abɔ, Meema Mbhumani ab'aesìmia, n'ibɔ aba bayɔnga na eluu atɔɔ na tabola. 7 Bɔbhu bai bía baboo mɔkɔ́ na babale.8 Pɔlɔ ai angia asub'a endu a sinagogi a mɔsɛla isalɔ, io n'aki ayɔnga na mouɔ, n'ayɔngisanaga na bato mbinɔ a ɛbɔamɛ nda Mokonga, n'akɔla ind'aɛ bhulibhu a lebeisa la bande ai bamɔka. 9 Mpa mɔlɔndɔ a bande batɔɔ aba badega etue l'abɔ, ai bakɔ́ma lebea na abela la yɔnga nda asii nda Mokama mosá la mpíta nda bato. Pɔlɔ ab'akatana n'ibɔ. Ab'aega na bàgoli a endu a egolisi nda Tilanɔ, io n'aambolaga n'ibɔ. 10 Yɔnga ndɔ, ab'alɛbha ngbulu a elemɔ ibale kida la bende bato nde bá lɛɛngɔ a Ajia, baYuda na baGiliki bɔbhu aba baɔka yɔnga nda Mokama.
Bana-Sikewa bakèngei bèa la baketi
11 Mokonga ai akɔla ekesɔ nda bangisana kpɛɛ a nyɛnɛla la ang'a Pɔlɔ. 12 Bato ai bagesa ang'a bajegi tabhu na papi a ngɔmbɛ nde adhu abhɛdɛi ngobho aɛ. Iwa jega ndɔ ab'asía na baketi ndɔ aba batoa ang'abɔ. 13 Bai we adha baYuda nde nkási abɔ ai nde ga la ioni na ioni a bèa la baketi. N'ibɔ aba bakɛngɛtisa koga la ina a Mokama Yesu a nkási a bèa la baketi bate: «Nenososii a ina Yesu mmbe Pɔlɔ anabha ndɔ!» 14 Ai we moo moti moYuda Sikewa, omi nde ma baɛlɛli, ban'aɛ sobe-lalɔ, bai nde adha bande bakɔla ìbo. 15 Mpa baketi ndɔ aba baesisila bate: «Bemúbha Yesu aba bemúbha na Pɔlɔ, mpa na benu bo nde bamàni?» 16 Nto a baketi ndɔ ab'aeyalela na nyɛna l'abɔ n'ekanda. Ab'aɛbɛta, na bhòmaga la ngɔmbɛ nd'abɔ, mpa n'ibɔ aba batoa a endu ndɔ na batatea ndumbu na babótigi. 17 Bato bɔbhu nde ba Ɛfɛsɔ, baYuda na baGiliki aba baɔka mbinɔ ndɔ. Bɔɔ ab'aedhunga bɔbhu, na ina a Mokama Yesu ab'abhebheana kpɛɛ. 18 Batì angal'a bato nde ai banebei Yesu, aba babhia baesenga na bangoda yɔnga nde ai baɛkɔlɛli bato. 19 Bakumi batì angal'abɔ aba babhia na ketabo a ekumi nd'abɔ, aba basumba yu mosá la bato. Tánga la esómbi a ketabo-li, ai nde bía kichɛlɛ la ntondɔ ɛlufu ekomi itanɔ†. 20 Ìbo yɛu ndɔ, a ekanda nda Mokama yɔnga nd'aɛ ab'andanda kpɛɛ.
Nkokoto aóbeli naa Ɛfɛsɔ
21 Mbusa a yɔnga ndɔ, Pɔlɔ ab'alamolaa a siana l'aɛ naa Yɛlusalɛma atɔmbɛ ɛkɔngɔ nda Makedonia na Akaya. Ab'ayɔnga ate: «Abɔngi n'aye nekidi io, atɔlɛli negɛ go Lɔma.» 22 Ab'aétea naa Makedonia Timɔtɛɔ bona Ɛlasitɔ bande bai nde adha badh'aɛ a nkási, ab'atíga iyɛ nganga asub'a ɛkɔngɔ nda Ajia mbènɔ n'ɛdɛ. 23 A elemɔ ndɔ, da-nkokoto ab'aóbela a yɔnga la asii nda Mokama ndɔ. 24 A nde bende, ai we nto moti in'aɛ n'a nde Dɛmɛtiliɔ, ai nde ntuli a ngɔa n'akɔkɔtia elimelime nde akèngi lɔngɔma nda esomba la nke Alatɛmib. Bato nde ai bakɔla nkási ndɔ ai badɔ̀a au ntondɔ atì. 25 Ab'aetulisana bato a nkási, na bande batɔɔ bande ai bakɔla mambala nkási ndɔ, na ngodea l'abɔ ate: «Badh'ami, boúbha bende bɛdɔ̀a ntondɔ atì nde a nkási nde. 26 Mpa bɔɔka na bɔɔna inde anyɛna, kanga masa asub'a Ɛfɛsɔ, mpa sùa bende adhungɛ Ajia-li bhulibhu. Pɔlɔ aejajisi bato batì na tia la maakɔ abɔ. Ate, inde bato bakɔkɔtii na njaga abɔ, nndaga atɔlɛli ebhebhɔ. 27 Boúbhɛ bende nndaga masa nkási nd'asu yɛu balɔlɔisa. Inde netea a nde nga bato abá baaka bende endu nda esomba la nke mati Alatɛmi, abá baɔna yu bía nnd'a éma. Na Alatɛmi a nde esomba la nke mmbe bambhebha asub'a Ajia na asub'a lɛɛngɔ-li bhulibhu, botì l'aɛ aujuana mande.» 28 A yɔnga ndɔ, bande ai bamɔkanea aba baetana, kanga bende badu koga bate: «Ebhebhɔ ang'a Alatɛmi nde maa Ɛfɛsɔ!» 29 Bojajeli ndɔ ab'agɔba bɔma-li. Aba bandhunga Gayo bona Alisitalikɔ, bande ai bato nde ba Makedonia ai batamba na Pɔlɔ. Aba baega nee dia a ntanga a njooc nda meeme a nji. 30 Pɔlɔ ab'akaba ngia l'a meeme a bato ndɔ, mpa bàgoli aba bankálelisa. 31 Na adha baomi nde ba ɛkɔngɔ a Ajia, bande bai badh'aɛ aba bankɛbɛa mɔkɔ̀ a gámelaga l'aɛ bende aga-i áma a ntanga a njoo ndɔ. 32 Nto na nto ab'akoga éma la ind'aɛ dhɔlɔ na inda dh'aɛ. A nde bende, mpíta ndɔ ab'aluluana kpɛɛ, kida la bóla la inde aangisi na batulani iwa. 33 Iwa, adha baYuda aba bansosia nto moti mmbe bankoga bate Alɛsandulɔ bende amɛ mosá la bato-li. Aba banngodea inde ayɔnga. Ab'asòmba njaga aɛ a nkabɔ a bɔɛyɔngɛla. 34 Mpa mbènɔ nde ai baúbhi nee bende a nde moYuda, aba bakoga bɔbhu áma imoti bía ngbulu a mbènɔ ibale bate: «Ebhebhɔ ang'a Alatɛmi nde maa Ɛfɛsɔ!»
35 A sungia-li, kalani nde maa nji-li aba atɔisa dhaisa la bato-li ate: «BaƐfɛsɔ badh'ami, nto sina yɛu nnd'aúbha bende bɔma nda Ɛfɛsɔ a nde bɔma a langa la endu nda Alatɛmi mati na esomba nd'aɛ nde agu toa la na kobha? 36 Màni yɛu aanga akɔ́ma indɔ? Nga a nde bo, bodhaɛ to! Bɔkɔla-i éma makanga maɛnɛkɔ. 37 A nde bende, boobhii na bato nde ani, nndaga baubi asub'a endu a esomba nde masu aɔ nndaga bamɔ́tigi. 38 Mpa nabana Dɛmɛtiliɔ na badh'aɛ ba na yɔnga nde banchoela nto, bagɛ a ntua la sɔ̀a la yɔnga, mosá la basɔ̀i-yɔnga. Io yɛu aanga banchoela. 39 Ago, nabana bo na yɔnga atɔɔ, bobhiɛ nee nga bagɛ bangodɛ yu a ntua nde aúbhianani, na aga balengisana yu io. 40 Nga betea bende aanga basochoela bate beejajisi bato a nkokoto nda ndiende. Nga nnd'a be naa éma imoti nde aangisi na betulani ndiende.» 41 Mbusa a gɔba la yɔnga ndɔ, ab'aeanja bato-li.