Pɔlɔ agee naa lɛɛngɔ a baGiliki
20
Mbusa a sía la nkokoto-li, Pɔlɔ ab'aetulanisa bàgoli na dhodeisa la meema abɔ. Ab'aɔkɔana n'ibɔ na jabhela la Makedonia. 2 Ab'akedeta ɛkɔngɔ ndɔ n'adhodeisa meema a bàgoli asub'a mpíta ntuantua. Mbusa a wa, aba baga mosá a lɛɛngɔ a baGiliki 3 aba baika io ngbulu a mɔsɛla isalɔ. A mbènɔ nde ai aanga bajabhela nee Sulia, ab'alamola sianela l'ahe la Makedonia, nga baYuda ai baankela. 4 Badh'aɛ nde ai batambaa n'iyɛ bai nde: Sɔsipatuli muna-Pilɔ, toa la nji nda Bɛlɔya, Alisitalikɔ bona Sɛkundɔ, toa la Tesalonika, Gayo nto nde maa Dɛlɛbɛ, Timɔtɛɔ na bato babale toa la ɛkɔngɔ a Ajia, Tikikɔ na Tɔlɔfimɔ. 5 Bato nde ai bagee mosá ndɔ, aba baga basobondelab a nji nda Tɔlɔa. 6 Na besu, mbusa a dinyɛ la mokate makanga masau, aba bedaa koko a nji nda Filipi. A kia itanɔ la tamba aba beedhonda naa Tɔlɔa, aba bela iwa kia sobe-lalɔ.Pɔlɔ anjujusi Eutikɔ a kukua
7 Esa l'inda imoti la yengac, na beiki besu bɔbhu áma imoti a búna la mokate, Pɔlɔ ab'aambola atì kida la meeme a kiia, nga ai aang'aga uma-li. 8 Ai we ngbot'a tala a endu la inda gulu, áma nde ai betulani. 9 Ai wa muluana moti ina aɛ n'a nde Eutikɔ n'aiki a ɛnɛnɛngɛ. Pɔlɔ n'aha aga masa mosá na moambolɔ nd'aɛ, Eutikɔ ab'aloa, na tɔɔ ab'andhunga kpɛɛ. Ab'agua a dodo toa la endu la inda isalɔ toa la n'egoo, bate bansòmbɛ, n'aye aku. 10 Mpa Pɔlɔ ab'asìma, ab'aga agɔtɔma ang'a muluana ndɔ, ab'andhungilaga a njaga, ab'ayɔnga ate: «Boyayala-i! Aha adeuma.» 11 Mbusa wa, Pɔlɔ ab'adaa go, ab'abúna mokate na léa-li, ab'asùilila na moambolɔ nd'aɛ kida la sa la máni, mpa ab'aga. 12 Aba bambhia na muluana-li n'aɔnɛa, indɔ ab'adhodeisa go meema abɔ kpɛɛ.
Pɔlɔ atoi a bɔma nda Tɔlɔa na ga la Milɛtɔ
13 Besu aba bega mosá, aba bedaa a koko ga l'asu a bɔma nda Asosi. Io yɛu, ai bega bɛm'bɛsa Pɔlɔ, áma ai atesela na ego sinde ai alamoli nee. 14 Dhonda l'asu naa Asosi, aba bɛm'bɛsa na jabhela la Mitilɛnɛ. 15 Toa la iwa, aba bega mosá a asii la koko, uma-li aba bega bekida a mpiti a kesanga nda Kiɔ. Uma-li aba bejabhela a kesanga nda Samosi, uma la ind'atɔɔ aba bekida a bɔma nda Milɛtɔ. 16 A nde bende, Pɔlɔ ai n'aye alamoli bende bɛnyɛnɛla-i Ɛfɛsɔ nga bende, bɛlɛbha-i a ɛkɔngɔ nda Ajia. Ai atatela kida la Yɛlusalɛma, n'aye atɔisani mosá la Pandɛkɔtɛ.
Pɔlɔ aɔkɔanaga na bakpɛga nde ba kanisà nda Ɛfɛsɔ
17 Mpa naa Milɛtɔ, Pɔlɔ ab'antea nto naa Ɛfɛsɔ ga koga la bakpɛga nde ba kanisà. 18 Kida l'abɔ a mpiti aɛ, ab'aengodea bende: «Benu boúbha hɛlɛ tambela l'ami a meeme anu, toa la esa la inda imoti a kida l'ami a ɛkɔngɔ nda Ajia. 19 Ai nɛbhɛda nkási nda Mokama a boedhidhisa-li bhulibhu na bibiso na enobɔ nde ai amokidii a yɔnga la man'diɛ nda baYuda. 20 Boúbha bende nndaga ai nɛsɔmɛi nɛngɛbɛ naa yɔnga imoti, inde abɔngi ang'anu. Ai nenolabheli na golisa l'anu a ntanga na asub'a endu. 21 Bɔtɔndɔlisi ami ai aekoga baYuda na bande nndaga baYuda a boetiila la ang'a Mokonga na bá la na boesobela ang'a Mokama nde masu Yesu. 22 Mpa abɔngi negɛ Yɛlusalɛma sinde Meema Mbhumani amɔsɔ́i nee. Nnda neúbha inde aga amokidia io. 23 Inde neúbha a masa bende a bɔma-li bhulibhu, Meema Mbhumani amoangelisa bende ngɔmɔ na noba yɛu amobondela† iweli. 24 Nndaga nebhísi ɛmbɔ atì a lenda l'ami. Éma nde abɔngi a nde eme gɔba la tamba namɔ hɛlɛ. Nekaba kida la sungia anja la nkási nde Mokama Yesu ai amopi, n'iyu a nde tɔndɔlisila la bato Mbinɔ Anja nda boangɔ nda Mokonga†.
25 Mpa bɔmɔɔkɛ to. Adhuma nɛnyɛna a meeme anu benu bɔbhu na nelabha Ɛbɔamɛ nda Mokonga. Eme neúbha bende angal'anu nnd'a be mmbe alɛ amɔɔna go na iso aɛ. 26 Indɔ yɛu aangisi nɛnɔbɛsa ndiende bía bàtɔndɔlisi, gela bende n'aye bobungigi nnd'a aye yɔnga namɔ. 27 A nde bende, adhuma nenolabheli inde Mokonga adhuma alamoli bhulibhu, makanga sɔmɛa-li. 28 Boolengelelɛ hɛlɛ benu nganga na bato nde Mokonga anopi. Meema Mbhumani anobhísi bía balangi a boio a bamboli nde. Bobɛ balangi a kanisà nda Mokonga, bato nde aesómbi na nsangi a ngɔmu nde maɛ†. 29 Nga neúbha bende n'aye negee, mbusa ami, bangia mande a meeme anu bato bía banyama bakpɛ-kpɛ, bande nnda bagɛgia mande boio a bamboli. 30 Nɛngɛbɛ a nkunguan'anu benu nganga baóbela mande au bato nde bagolisa inde nndaga kilikili, nga bende baebòlɛ bàgoli a belea l'abɔ. 31 Ang'a indɔ, bokèngemanɛ! Bobosela-i nkási nde ai nɛkɔli a meeme anu a elemɔ isalɔ. Nndag'ai neloi na hana la kela nto etonge na kiia na gáma a yɔnga l'anu.
32 Mpa nenobhísi benu bɔbhu asub'a bolangi nda Mokonga. Neesobeli bende yɔnga nda boangɔ nd'aɛ anɔmɔtisa a meema. Yɔnga ndɔ aanga anopa moando nde Mokonga aepa babhumani nde baɛ bɔbhu. 33 Nndaga adhuma nɛkɛnɛi ntondɔ, nɔlɔ aɔ ngɔmbɛ nda nto. 34 Boúbha benu bamɛnɛ bende ai nɛbhɛda nkási na njaga ami nga nɛdɔ̀ɛ inde asotabela eme na bande netamba n'ibɔ†. 35 A éma-li bhulibhu nenoangelisi bende atɔlɛli beenobisɛ, nga tabela la bande nnda baɛtɔisa, na bekanisɛ yɔnga nda Mokama Yesu sinde ai ayɔngi nee iyɛ nganga bende: ‹Bujɛmɛ a gabha anyɛni bujɛmɛ la dɔ̀ad.›»