Pɔlɔ asiani naa Yɛlusalɛma
21
Mbusa a katana la n'ibɔ, aba bejabha a koko na ga la dia kida la Kosi. Uma-li aba bega Lɔdɔ. Toa la iwa aba bega Patala. 2 Aba bedhonda wa koko nde aga a lɛɛngɔ a Fɔinikia, aba bedaa au na ga. 3 Kida l'a mpiti a kesanga nda Kipulɔ na bɛɔna yu, aba betimba na doa-li a njaga nd'emisɔ, aba bega kida la lɛɛngɔ a Sulia, na ika la Tilɔ nga, io yɛu koko nd'asu ai aga adoa nkumba nde ai au. 4 Aba beedhonda wa bàgoli nde ba Mokama, aba beika n'ibɔ kia sobe-lalɔ. Meema Mbhumani ab'aesosia bàgoli ndɔ bende Pɔlɔ aga-i naa Yɛlusalɛma. 5 Mpa a sía la mbènɔ asu, aba bɛkɛngɛtisa go tamba. Aba baga basodoaga bɔbhu na bake na baní nde babɔ ga kida l'a ngba la bɔma-li. Besu bɔbhu aba bebúna moo-a-kuu l'asu na nkpalɔ, aba bɛmmɛma Mokonga. 6 Mbusa a ɔkɔanaga la n'ibɔ, aba bedaa a koko, n'ibɔ aba basiana nɔngɔ abɔ. 7 Aba bega na tamba nd'asu mosá toa la Tilɔ, aba bekida Tɔlɛmai, aba beesesea badh'asu bàlebei nde ba io, aba bela nɔngɔ abɔ esa imoti. 8 Uma-li, aba bem'baa tamba go na ga kida la Kaisaliaa, aba bega n'endu a Filipɔb ntɔmii a Mbinɔ Anja, moti angal'a bande basobe-lalɔ, aba beika nɔngɔ aɛ. 9 Ai a na banyike banì bande baeúbhi-mbɛ baboo, na ba na edado la úbhilila. 10 Bɛlɛbhi wa, múbhilili moti nde bankoga bate Agabo†, ab'adhidha toa la lɛɛngɔ a Yudɛa, 11 ab'abhia asodhonda, ab'atosa mokaba nda Pɔlɔ, na nyangaga la njaga na ego l'aɛ iyɛ amɛnɛ, ab'ayɔnga ate: «Meema Mbhumani ayɔngi bende: Ibende yɛu baYuda naa Yɛlusalɛma bannyanga mande amɛnɛ a mokaba nde na gabha l'aɛ a njaga a bato nde nndaga baYuda.» 12 Ɔka la indɔ, besu na badh'asu nde ba Kaisalia, aba bengámelaga Pɔlɔ bende atáliila-i Yɛlusalɛma. 13 Pɔlɔ ab'asosisila ate: «Nga boni yɛu nde bogáma na búna la meema ami? A nde bende, eme aye nɛɛbɔngisigi, kanga masa a nyanga l'ami, mpa nɛngɛbɛ ga kulia la Yɛlusalɛma a yɔnga la ina a Mokama Yesu.» 14 Sinde nnd'ai bɛtɔisi tia la maakɔ aɛ, aba bɛn'dɔlɛlana, na yɔnga la bende abɛ masa sinde Mokama akóndi nee.15 Mbusa a esa ndɔ, aba bɛkɔsɔkanaga na taliila la Yɛlusalɛma. 16 Adha bàgoli nde ba Kaisalia, n'ibɔ na baga we, aba bega nabɔ. Bagolì ndɔ, aba baga basokidisa nɔngɔ a Munasoni, nto nde maa kesanga nda Kipulɔ, moti adha bàgoli nde ba kala. Aba basoga nee nɔngɔ aɛ bende beikɛ n'ibɔ.
Pɔlɔ antambeligi Yakɔbɔ
17 Bekidi naa Yɛlusalɛma, badh'asu bàlebei aba babhia basosesea na bujɛmɛ mati. 18 Uma-li Pɔlɔ ab'asoga nee nɔngɔ a Yakɔbɔc áma bakpɛga bɔbhu nde ba kanisà baleɔ. 19 Pɔlɔ ab'aesesea, na ngodea l'abɔ éma-li bhulibhu moti-moti inde Mokonga ai aóbelisi ang'a bande nndaga baYuda nyɛnɛla la nkási nd'aɛ. 20 Mbusa a ɔka la yɔnga ndɔ, n'ibɔ, aba bambhebha Mokonga. Mpa aba banngodea Pɔlɔ bate: «Dh'asu, ɔɔna da-mɔlɔndɔ a baYuda nde baetiili ang'a Mokonga nde, ago na ba na mouɔ atì a sikisa la Tɔlati nda Mósa. 21 Mpa, ibɔ baɔki a yɔnga l'aɔ bende, oegolisa baYuda nde baiki a lɛɛngɔ atɔɔ doa la Tɔlati nda Mósa, na bende baegusa-i ban'abɔ ganja, ago na bende badoɛ asii nda baYuda. 22 Bɛkɔlɛ ee? Baɔka ndende masa bende oy'okidi ani. 23 Nga a nde bo, ɔkɔlɛ inde beongodea nde. Be ani na baboo banì bande aye bahɔ̀i mosá la Mokonga. 24 Oebɛsɛ, ogɛ n'ibɔ áma mpíta la tosa la boalia na oelèelɛ ntondɔ a dua† l'abɔ. Kesi bato bɔbhu baúbha bende inde baɔka ang'aɔ a nde mbéa. Baúbha go mande bende owɛ nganga odhungilili Tɔlati nda Mósa a lenda l'aɔ. 25 Ang'a bàlebei nde nndaga baYuda aye bɛɛkɛbɛi baloa ngodea l'abɔ bende: Baléa-i eléa nde bagabhi a bɔɛmbɔ a elimelime a esomba. Baléa-i nsangi na nyama nde aekulii na kanga bangia asub'a bosingili†.»
26 Mpa, bha-uma-li, Pɔlɔ ab'aɛbɛsa baboo banì ndɔ aba baga áma sosa l'abɔ a meema. Mbusa a wa, aba baga n'endu a Mokonga nga ga úbhisa la bende boososa l'abɔ a meema asía nde esa sina, na gabha la bɔɛmbɔ a yɔnga nda kela nto†.
Dhunga la Pɔlɔ n'endu a Mokonga
27 A mpiti a sungia la esa sobe-lalɔ ndɔ, baYuda nde ba a lɛɛngɔ a Ajia, ɔna la Pɔlɔ n'endu a Mokonga, aba bajajisa mɔlɔndɔ a bato ndɔ na dhunga l'aɛ. 28 Aba bakoga bate: «Benu baboo nde ba Isilaɛli, bosotabelɛi sɛ! A yɛ mbe, nto nde aki amanisa mba nd'asu na Tɔlati nd'asu na endu nde, a egolisi nde atambisa a mpuɔ-li bhulibhu na ang'a bato bɔbhu. Mpa ago aebhii na baGiliki áma endu a Mokonga nde, aujisisi go mpuɔ nde.» 29 A nde bende, ai n'aye bamɔni Pɔlɔ bona Tɔlɔfimɔ† nde maa Ɛfɛsɔ na bɔma. Aba baaka bende anngisi n'endu a Mokonga†.
30 Bato nde ba asub'a ngiman'a bɔma-li aba bayayala, aba babhia batì. Aba bandhunga Pɔlɔ, na bòla l'aɛ dhɔlɔ a endu a Mokonga, aba bakpema mpume-li dia. 31 Ai bakaba móa l'aɛ, mpa mbinɔ ndɔ ab'ankidia omi nde ma basoda nde ba Lɔma, bende nji a Yɛlusalɛma-li bhulibhu aujuani. 32 Makanga lɛbha, omi ndɔ ab'aɛbɛsa basoda nde baɛ na bande baɛmɛla basoda ndɔ, na ga l'abɔ mbangɔ áma nde bato ndɔ batulani ndɔ. Ɔna la omi na basoda ndɔ, bato-li, aba badoa bɛta la Pɔlɔ. 33 Omi ndɔ, ab'asɛdɛa a mpiti aɛ, ab'adhungisisa Pɔlɔ na sosia la bende bannyangɛ na nkɔndɔ́ ibale. Mpa ab'aulisa ate: «Nto nde a nde màni, na akɔli nde éma sina ajede?» 34 Mpa, asub'a mɔlɔndɔ, kela nto ab'akoga nde ind'aɛ. Makanga bende omi ndɔ aɔki yɔnga anja nga nkokoto ndɔ, ab'aesosia bato nde baɛ ga la na Pɔlɔ a endu a basodad. 35 Kida la áma daela l'a endu ndɔ, basoda-li aba bankumba Pɔlɔ nga bato-li na bakaba bótisa l'aɛ. 36 A nde bende, bato batì ai bam'belea na bakoga bate: «Bɔngɔbɛlɛgɛ!»
Pɔlɔ aɛyɔngɛla mosá la baYuda
37 A mbènɔ nde ai bakaba ngisa l'aɛ asub'a endu a basoda, Pɔlɔ ab'anngodea omi nde ma basoda ndɔ ate: «Aanga neongodea na-yɔnga?» Omi nde ma basoda ndɔ ab'amulisa ate: «Ɔka! Oúbha kiGiliki?» 38 Ate: «Nndaga owɛ yɛu o nde moMisili mmbe, mbènɔ-li abi-mbɛ atì, adhuma aejajisi na ga la na bato ɛlufu ini na ngalagɛ bía babibia?» 39 Emesunga na Pɔlɔ ate: «Eme? Ne nde moYuda nde maa Talasɔ, bɔma nda ɛkɔngɔ nda Kilikia, adha nji nde akakamanigi. Nɛɔmɛmi, omolebeelɛ nɛyɔngɛ na bato nde.» 40 Omi ndɔ, ab'anebeela. Pɔlɔ ab'ama áma nde asengedi, ab'asala n'ibɔ nga bende badh'aɛ. Bɔbhu aba badhaa bojɛɛ, Pɔlɔ ab'ayɔnga n'ibɔ a eluu nda keEbhalania, ate: